PREZIDENTE REPÚBLIKA DESIDE ELEISAUN ANTISIPADA no DISOLVE PARLAMENTU NASIONÁL

by Mídia PR Posted on

KOMUNIKADU IMPRENSA
Prezidente Repúblika Francisco Guterres Lú Olo uza nia kompeténsia tuir Konstituisaun Repúblika Demokrátika Timor-Leste hodi hakotu krize institusionál ne’ebé mosu hafoin formasaun VII Governu Konstitusionál liuhusi anunsia eleisaun antisipa no disolve Parlamentu Nasionál.

Krize institusionál mosu hafoin Bankada Opozisaun iha Parlamentu Nasionál rejeita Programa VII Governu Konstitusionál no orsamentu rectifikativu, hatama mosaun sensura hasoru Governu no destituisaun hasoru Prezidente Parlamentu Nasionál.

Prezidente Repúblika promove dialogu ho entidade oioin hodi rona solusaun ba krize institusionál ne’ebé nasaun enfrenta, desde fulan Outobru 2017, inklui ho lider istóriku sira.

Hafoin rona entidade oioin husi konfisaun relijioza sira, organizasaun sosiedade sivil, veteranu, organizasaun feto, defisiente, setór privadu no universitária hodi rona opiniaun sira relasiona situasaun polítika atuál, hotu-hotu fó fiar ba Prezidente-da-Repúblika atu ezerse nia kompeténsia tuir mandatu konstitusionál.

Iha loron 23 Janeiru 2018, Prezidente-da-Repúblika rona partidu polítiku iha asentu Parlamentár nia solusaun ba krize institusionál. Partidu polítiku sira maski iha opsaun rasik ba solusaun, maibé fó fiar ba Prezidente Repúblika hodi hakotu krize institusionál.

Tuir konstituisaun, Prezidente Repúblika sei foti desizaun hafoin rona opiniaun husi Konsellu Estadu. Iha loron 24 Janeiru 2018, reuniaun dahuluk Konsellu Estadu ne’ebé prezide husi Prezidente Repúblika, membru sira fiar katak Xefe Estadu sei foti desizaun di’ak ba nasaun.

Atu hakotu krize institusionál Prezidente Repúblika anunsia eleisaun antisipada no disolve Parlamentu Nasionál tuir artigu 86 alinea f Konstituisaun Repúblika.
Prezidente Repúblika seri marka data ba eleisaun antisipada, tuir lei haruka.

Mídia PR

Palásiu Prezidente Nicolau Lobato, Bairru Pite, Díli, loron-26 fulan-Janeiru 2018.