Intervensaun Xefe Casa Sivil, FRANCISCO MARIA de VASCONCELOS, iha seremónia fúnebre Saudozu Raimundo Gusmao Cruz

by Mídia PR Posted on

“Ha’u lori Prezidente nia mensajén hodi hato’o ba ita-boot sira hotu katak, ohin loron, ita lakon tan ema di’ak ida iha ita nia rai. Timor nia oan ida asua’in tebes. Iha tempu susar hatudu nian dedikasaun, hatudu ninian komitmentu ho ninian konviksaun ba povu no patria ida ne’e. Tamba ne’e Xefe-de-Estadu rekoñese no valoriza kontribuisaun ne’ebé mak halo ba povu no ba nasaun Timor Leste.

Prezidente-da-Repúblika mós iha tempu rezisténsia nia laran, subar iha saudozu ninian familia nia leet. Kuidadu nia no haree to’o ohin loron sai Prezidente-da-Repúblika.
Tamba ne’e Prezidente-da-Repúblika hato’o sentidu kondolénsia profundas ba familia, faluk no oan kiak.

Ita ema moris iha mundu, ita-nia dalan mak atu mate. Maibé hanesan ema ne’ebé fiar mate la’os hanesan dalan ikus maibé odamatan atu tama moris seluk ida. Tamba ne’e ami hakarak hato’o ba família sira hotu, ita hotu bele triste, ita hotu bele laran susar maibé triste la lori ita ba dalan di’ak.

Ho korajén ho fiar metin ba Maromak ita hotu sei banati tuir saida mak ita-nia saudozu Raimundo Gusmão hatudu hela ba ita, liuliu ba ita-boot sira familia, liuliu oan sira, kaer metin prinsípiu no valores ida ne’e.

Ida ne’e mak hanesan riku ida ne’ebé ema barak laiha. Imi-nia aman husik hela eránsa, husik hela riku ne’e ba imi.
Ikus liu, husi Prezidénsia-da-Republika hato’o ami-nia sentidu kondolénsia no solidaridade ba família Saudozu Raimundo Gusmao Cruz, Boa Viagem!”

Jardim dos Herois Metinaro, loron-29 fulan-Janeiru.