PREZIDENTE-da-REPÚBLIKA INFORMA KALENDÁRIU ELEISAUN ANTISIPADA BA PARTIDUS HO ASSENTU PARLAMENTAR

by Mídia PR Posted on

Prezidente-da-Repúblika Francisco Guterres Lú Olo hala’o reniaun ho reprezentante partidus ho assentu parlamentár, Komisaun Nasionál ba Eleisaun (CNE) no Diretór Jerál Sekretariadu Tekniku Administrasaun Eleitorál (STAE), hodi ko’alia kona-ba kalendarizasaun ba eleisaun antisipada.

Iha reuniaun ne’ebé konvoka husi Xefe-de-Estadu ne’e, reprezentantes partidus FRETILIN, CNRT, PLP, PD no KHUNTO, rona husi Prezidente-da-Repúblika esplikasaun kona-ba kalendáriu ba eleisaun antisipada ne’ebé antes Xefe-de-Estadu konsulta uluk ona ho CNE no STAE.

Prezidente CNE Alcino Baris no Diretór Jerál STAE, Aclinio Branco iha okaziaun ne’e informa mós ba reprezentantes partidus sira, preparasaun ne’ebe órgaun eleitorál rua ne’e halo no prosesu tomak ne’ebé partidu sira tenki kumpri hodi bele konkorre iha eleisaun antisipada.

Laiha objesaun husi reprezentantes partidus polítiku sira ba kalendáriu ne’ebé aprezenta husi Xefe-de-Estadu no hotu-hotu konkorda atu kumpri kalendáriu ne’ebé iha.

Partidus sira ne’e mós hato’o sira-nia prontidaun atu partisipa iha eleisaun antisipada tuir data ne’ebé sei determina husi Xefe-de-Estadu.

Prezidente-da-Repúblika iha enkontru dala rua ne’ebé halo ho Ministru Estatal, CNE no STAE, husu esforsu órgaun eleitorál rua ne’e atu kria kondisaun ne’ebé la difikulta sidadaun sira no bele lori ema barak atu ezerse sira-nia direitu iha sentru votasaun.

Xefe-de-Estadu mós husu CNE no STAE atu bele asegura realizasaun eleisaun ho loos no moos, hanesan eleisaun parlamentár iha tinan kotuk, ne’ebé hetan apresiasaun husi mundu internasionál.

Ba partidu sira Prezidente-da-Repúblika espera bele koopera di’ak ho parte kompetentes no dezeja sira-nia susesu iha eleisaun antisipada.

Enkontru ho reprezentante partidus polítiku sira hanesan aktu ikus husi Prezidente-da-Repúblika molok determina data ba realizasaun eleisaun antisipada.

Palásiu Prezidente Nicolau Lobato, Bairro Pite, loron-7 fulan-Fevereiru.

Mídia PR