GOVERNU APOIU DATA ELEISAUN ANTISIPADA NE’EBÉ PR DESIDE

by Mídia PR Posted on

Primeiru Ministru Marí Alkatiri hala’o reniuan semanál ho Prezidente-da-Repúblika Francisco Guterres Lú Olo.

Iha reniuan ne’e Mari Alkatiri hatete Governu apoiu data eleisaun antisipada ne’ebé Prezidente-da-Repúblika deside sei realiza iha loron 12, fulan-Maiu, tinan ida ne’e.

Marí Alkatiri hatete realizasaun eleisaun antisipada maske ho rekursu ne’ebé ladun boot maibé Governu sei apoiu CNE no STAE atu bele organiza eleisaun ida ne’ebé transparente no justu liu.

Primeiru Ministru subliña katak iha eleisaun antisipada ne’e, Governu sei kria kondisaun ne’ebé di’ak atu ema hotu bele ezerse nia direitu.

“ Partisipasaun povu nian iha eleisaun ida ne’e sei boot liu duke 2017, tamba desiminasaun sei halo boot liu. Governu mós diskuti hela atu aumenta tan urnas ka tau besik Sentru Votasaun ba votantes sira iha fatin dook. Nune’e mós Governu sei halo diskusaun oinsá mak estudantes ka traballadores sira iha Dili, bele vota iha Dili”, afirma Primeiru Ministru Marí Alkatiri

Xefe-de-Estadu sei dekreta data ba eleisaun antisipada iha tempu besik nia laran, hafoin hala’o konsulta ho CNE, STAE, Governu no reprezentates partidus polítikus lima, ne’ebé hetan assentu iha Parlamentu Nasionál hanesan FRETILIN, PLP, PD no KHUNTO foin lalais ne’e.

Palásiu Prezidente Nicolau Lobato, loron-8, fulan-Fevereiru.

Mídia PR.