PREZIDENTE-da-REPÚBLIKA KUDA AI-OAN IHA PALÁSIU NOBRE

by Mídia PR Posted on

Prezidente-da-Repúblika Francisco Guterres Lú Olo hamutuk ho funsionárius Prezidensia-da-Repúblika iha Sesta-feira loron-9 fulan-Fevereiru, kuda ai-oan iha Palasiu Nobre Lahane, Dili.

Objetivu husi kuda ai-oan ne’e atu bele haburas no hamatak ambiente iha Palasiu Nobre Lahane ne’ebé mak sai hanesan fatin ofisiál hodi realiza atividades Estadu nian.

Iha ninian intervensaun molok atu kuda ai-oan, Xefe-de-Estadu hatete katak kuda ai-oan, hanesan símbolu ida hodi husik hela “liman-fatin” atu bele fó mahon no fó matak-malirin ba fatin ne’ebé hola parte iha istória Timor Leste nian.
“Ita hotu iha Prezidensia–da-Repúblika, ohin, hotu-hotu hiit-an mai atu kuda ai-oan iha fatin Prezidénsia ninian no Estadu nian. Ita husik hela ita-nia ai-oan ne’e bele kaer metin rai ida ne’e no hametin hela ita- nia edifísiu ida ne’ebé kleur ona halo parte istória uluk ninian.

Nune’e mos husik hela memória nafatin ba jerasaun sira. Fó mós matak-malirin ba sira hotu ne’ebé sei mai, aumezmu tempu, bele husik hela fatin ida ne’e para abanbainrua, bainaka sira ruma hanesan Prezidente-da-Repúblika ka Primeiru Ministru sira mai, ha’u konvida ka Prezidente seluk ida bele konvida, kuda ai-oan iha fatin ida ne’e hodi marka sira-nia prezensa”, afirma Prezidente-da-Repúblika.

Hafoi remata kuda ai- oan Prezidente-da-Repúblika hamutuk ho funsionárius Prezidénsia-da-Repúblika han-hamutuk ai-han lokál ne’ebé prepara rasik husi funsionáriu sira.

Mídia PR