PREZIDENTE-da-REPÚBLIKA MARKA ELEISAUN ANTESIPADA BA LORON-12 FULAN-MAIU

by Mídia PR Posted on


Palásiu Prezidensiál Nicolau Lobato, loron-9 fulan- Fevereiru 2018- Prezidente-da-Repúblika hili loron-12 fulan-Maiu Tinan-2018, hanesan loron-realizasaun eleisaun antesipada ba Parlamentu Nasionál.

Markasaun ba loron refere liu husi dekretu Prezidénsial nº /2018 loron- 7 fulan- fevereiru, ne’ebé publika ohin, iha Jornál-da-Repúblika.

Iha preámbulu badak, dekretu ne’e fó-hanoin fali kona-ba kompeténsia Xefe-de-Estadu atu marka loron ba eleisaun, tuir artigu 86 alínea c) Konstituisaun Repúblika Demokrátika Timor-Leste.

Iha preámbulu ne’e mós fó-hanoin fali lejislasaun ne’ebé fundamenta dekretu ne’e maka, lei n0 9/2017 loron-5 Fulan-Maiu, ne’ebé tinan kotuk, atualiza dispozisoens balu iha Lei Eleitorál ba Parlamentu Nasionál.

Prezidente-da-Repúblika tetu ho kuidadu no rona mós opiniaun hosi entidades oioin molok foti desizaun hodi hakat ba eleisaun antisipada.

Xefe-de-Estadu mós konsulta kalendáriu eleitorál ho CNE, STAE, Governo no reprezentantes partidus polítikus ho assentu parlamentar: FRETILIN, CNRT, PLP, PD no KHUNTO.

Mídia PR