PROKURADÓR JERÁL REPÚBLIKA RELATA SERBISU MENSÁL BA PR

by Mídia PR Posted on

Palásiu Prezidente Nicolau Lobato, Bairro Pite, Loron-12 fulan-Fevereiru – Prokuradór Jerál-da-Repúblika José Ximenes hala’o reniuan mensál ho Prezidente-da-Repúblika Francisco Guterres Lú-Olo.

Iha reniuan ne’e, José Ximenes hato’o ba Xefe-de-Estadu kona-ba atividades Ministériu Públiku nian iha fulan Janeiru ne’ebé hareeliu ba rezultadu retiru anúal instituisaun ne’e nian, iha loron-12-13 Janeiru.

Iha retiru anúal ne’e, Ministériu Públiku identifika problema balu iha kazu sivil, ne’ebé durante ne’e barak mak sei pendenti tamba Tribunál julga de’it kazu Kriminal sira.

Nune’e mós husi rezultadu retiru iha loron-19 fulan Janeiru foin lalais ne’e, iha Konsellu Superior halo inspesaun dahuluk ba ofisiais justisa sira para bele hetan promosaun. Prosesu ida ne’e sei la’o nafatin durante tinan ida ne’e nia laran.

Aleinde ne’e ko’alia kona-ba kontentór sia ne’ebé foin lalais ne’e hetan preende husi Unidade Polísia Marítima (UPM) iha Porto Díli, tanba iha indikasaun forte tula material sira ne’ebé produz droga, tuir Jose Ximenes, Ministériu Públiku halo ona koordenasaun ho PNTL hodi detein autór sira ne’ebé maioria ho nasionalidade Indonézia.

Autór sira ne’e hatan ona iha Tribunál ne’ebé fó sentensa “aprezentasaun periódika”.

Mas desizaun Tribunál nian ne’e, tuir José Ximenes, Ministériu Públiku la aseita tanba autores hirak ne’e sidadaun estranjeira no laiha rezidénsia permanente tan ne’e laiha sentidu atu halo “aprezentasaun Periodika”.

Ba Insatisfasaun ida ne’e, Jose Ximenes hatete, oras ne’e, Ministériu Públiku hato’o ona Rekursu ba Tribunál Rekursu atu tetu fila-fali sentesa ne’ebé aplika ba autór sira.

Mídia PR