MENSÁJEN HOSI PREZIDENTE REPÚBLIKA FRANCISCO GUTERRES LÚ OLO KONA-BA BA ELEISAUN ANTESIPADA

by Mídia PR Posted on

 Palácio Prezidente Nicolau Lobato Dili, 20 Fevereiru 2018

 

Povu doben Timor-Leste,

Buibere no Maubere sira hotu!

 Tempu to’ona!

Ohin, loron 20 fevereiru prazu hahú tama eleisaun antesipada, tuir Dekretu N. 07/2018.

Prezidente Repúblika ho haraik-an, agradese Povu Timor-Leste tamba fó fiar tomak ba Prezidente.

Povu fó ezemplu di’ak ba mundu, katak hatene hein ho maturidade, kompriende no simu didi’ak Prezidente Repúblika nia desizaun hodi konvoka eleisaun antesipada, tuir Konstituisaun no lei haruka.

Povu doben mak na’in ba rai lulik Timor-Leste!

Povu mak tenke kaer rasik nia kuda talin.

La iha tan ema seluk!

 

Prezidente Repúblika fó mós obrigadu wain, ba Igreja katólika nia hierarkia. Obrigadu wain ba konfisoens relijioza sira hotu ne’ebé, la’ós fó de’it fiar ba Prezidente Repúblika, maibé ajuda esplika situasaun, no halo ita-nia Povu sente, kompriende no tuur hakmatek.

Obrigadu wain mós, ba organizasaun sosiedade sivíl barabarak, juventude, feto, veteranu, akadémiku sira, no ikus liu, importante tebetebes hato’o mós obrigadu barak ba Partidu Polítiku sira hotu, ne’ebé simu ho liman rua desizaun hosi Prezidente Repúblika, hodi konvoka eleisaun antesipada.

Obrigadu wain no respeitu boot ba imi hotu!

Ita atu hakaat ba eleisaun, iha loron 12 fulan Maiu.

Molok atu ba eleisaun, Partidu Polítiku no koligasaun sira, sei tama ba kampaña eleitoral, fulan ida tomak.

Fulan tomak atu hakbesik-an ba Povu, ho respeitu, esplika didi’ak, no fó-hatene, sira-nia programa:

  • Medida saída mak sira sei foti atu hadi’a kualidade edukasaun no saúde?
  • Dalan ida ne’ebé sira sei tuir, atu hadi’a Povu nia moris, povu nia ekonomia?
  • Oinsá lós mak sira harakak ukun Povu?
  • Oinsá sira-nia hanoin kona-ba Povu nia partisipasaun, hodi ukun Nasaun Timor-Leste?

Ita hotu akompaña katak Partidu Polítiku sira, konsentra daudaun sira-nia atensaun no organiza-an atu kampaña.

 

Prezidente Repúblika fiar Povu nia partisipasaun iha eleisaun ida ne’e sei aas atu fó mensájem momós ba Polítiku sira!

Povu sei partisipa, no sei rona didi’ak Partidu Polítiku sira-nia programa hodi ukun, sira-nia planu atu hadi’a povu nia moris, sira-nia dalan atu lori Nasaun Timor-Leste ba dezenvolvimentu.

Prezidente Repúblika, hanesan aman ba Nasaun fó hanoin no husu, ba ita ida-idak katak tenke respeita Povu Timor-Leste.

Juventude, feto no mane sira hotu, tenke hakruk ba katuas, ferik sira, hanesan mós ba sira-nia maluk sira.

Kampaña la’ós tempu atu fahe Povu !

Kampaña atu hametin unidade, iha Povu nia leet, bazeia ba programa ne’ebé di’ak liu ba Povu nia moris.

Ita labele fó fatin ba ema aproveita períodu kampaña, insulta malu, fahe malu bazeia ba saída de’it: autonomista ka nasionalista, relijiaun, rasa, frente klandestina, armada ka diplomátika…

Ita uma-kain ida de’it, Nasaun Timor-Leste!

So ema ne’ebé la hadomi Povu Timor-Leste mak bele aproveita kampaña hodi fahe Povu, kuda ódiu, ka halo vingansa ba malu.

 Ita-nia kultura no demokrasia la hanorin ita insulta malu! Ita-nia Povu la gosta buat ida hanesan ne’e, no la respeitu inan/aman, la respeitu ita- nia na’i -ulun sira!

Tempu to´o ona, atu fó liman ba malu!

 

Prezidente Repúblika husu ba militante no simpatizante Partidu Polítiku hotu-hotu atu prepara-an, no ajuda aprezenta didi’ak sira-nia programa. Esplika ba Povu tamba saída mak sira-nia programa di’ak liu.

Ita hotu tenke tane aas interese Povu no Nasaun ida ne’e nian. Ita hotu tenke serbisu hamutuk ba Paz no dezenvolvimentu, ba estabilidade no progresu hodi kaer metin nafatin domin, lia lós no justisa iha ita-nia rai lulik Timor-Leste!

Buibere no Maubere sira hotu!

Ho ida ne’e mak PrezidenteRepúblika, ho haraik-an, husu ba ita hotu. Husu atu ita hotu haka’as-an, dala ida tan, mai hamutuk partisipa iha eleisaun antesipada, ho respeitu tomak ba ita-nia kultura!

Mai ita hotu partisipa, defende ita-nia direitu ba dezenvolvimentu, ba demokrasia, tuir nafatin bei’ala sira-nia mehi, atu labele sai atan ba ema ida.

Tempu to’ona!