DISKURSU BOAZVINDAS BA KORPU DIPLOMÁTIKU HOSI S.E. PREZIDENTE FRANCISCO GUTERRES LÚ OLO PREZIDENTE REPÚBLIKA DEMOKRÁTIKA TIMOR-LESTE

by Mídia PR Posted on

Dili, 23 Fevereiru, 2018 –

Señora no Señór Embaixadór sira
Membrus Korpu Diplomátiku no Konsulár
Distintu Konvidadu sira

Ho laran-ksolok boot maka ha’u fó boazvindas ba Ita-Boot sira.
Ha’u saúda liuliu señora no señór Embaixadór sira-ne’ebé maka foin aprezenta kredensiál, no mós embaixadór hotu-hotu no pesoál diplomátiku no konsulár sira-ne’ebé rezidente. Ha’u hein katak Ita-Boot sira bele hetan estadia di’ak iha ami-nia rain. Ba embaixadór no embaixadora sira-ne’ebé mak hakat mai Timor-Leste iha momentu ida-ne’e hodi partisipa iha ita-nia enkontru ne’e, ha’u hato’o mós ha’u-nia votus estadia di’ak no produtivu.
Tinan ida-ne’e ha’u-nia rain komemora aniversáriu

Restaurasaun Independénsia ba dala 16, ne’ebé, nu’udar ksolok boot ida ba ha’u no Timoroan hotu-hotu atu fó boazvindas ba Ita-Boot sira iha ambiente pás, estabilidade no maturidade demokrátika, ne’ebé fó sasin ba vontade ne’ebé mak ami-nia povu hatudu beibeik ona ho laran-metin no mós ba konsolidasaun no maturidade ami-nia instituisaun sira-nian ne’ebé boot, iha nivel hotu-hotu.

Prosesu integrasaun Timor-Leste nian ba komunidade internasionál la’o hela ho di’ak. Prosesu negosiasaun kona-ba fronteira rai-maran ho Indonézia besik atu remata ona. Aleinde ne’e mós, hanesan ksolok boot ida ba ha’u atu ko’alia kona-ba progresu ne’ebé mak hetan ona relasiona ho prosesu tau baliza ba fronteira tasi nian hamutuk ho Austrália, ne’ebé, ami nasaun rua ne’e lakleur tan sei asina akordu. Timor-Leste sempre hatudu konfiansa ba relasaun amizade no viziñansa di’ak, no fiar katak diálogu no negosiasaun nu’udar meius ida atu halakon konflitu internasionál. Timor-Leste mak nasaun dahuluk atu uza mekanizmu konsiliasaun obrigatória hosi Konvensaun Nasoins Unidas ba Lei Tasi nian, hodi hatudu ami-nia fiar ba komunidade internasionál nia instituisaun multilaterál sira.

Prosesu negosiasaun fronteira ne’e halo ami fiar no kaer metin ba valór diálogu nian, no kontribui ona atu hametin amizade no solidariedade ne’ebé eziste tinan barak ona entre ami-nia povu sira, liuliu ho governu no povu Austrália liga ho fronteira tasi nian.

Liga ho negosiasaun rekursus, ami la haluha prioridade ne’ebé mak ami fó ba dezenvolve know-how nasionál hodi realiza ami-nia vizaun kona-ba ekonomia ida ne’ebé mak fó valór liu ba rekursus naturais Timór nian no iha kapasidade atu esporta sasán ho kualidade di’ak ba rai-li’ur. Só nune’e mak ami bele sai hanesan nasaun ida ho rendimentu médiu/aas to’o tinan 2030 no kontribui liután ba inovasaun, dinamizmu no prosperidade rejiaun ida-ne’e nian. Tuir loloos, só nune’e de’it mak ita hotu bele kontribui hodi alkansa Objetivu Dezenvolvimentu Sustentavel sira komunidade internasionál nian ne’ebé bele konta ho Timor-Leste nia empeñu tomak.

Ita-nia rainmoris iha estabilidade no pás nia laran tanba Timoroan sira la tolera ona ema fakar tan buat murak ne’ebé hamutuk hetan iha tinan 15 ikus ne’e no la tolera mós dezestabilizasaun.

Timor-Leste hatuur ona prioridade lubuk ida ne’ebé ezijente, mak hanesan diversifikasaun ekonómika, dezenvolvimentu sustentavel no hametin setór privadu emprezariál. Ha’u bele dehan ba Ita-Boot sira katak Estadu no sidadaun sira Timor-Leste nian fó sira-nia empeñu tomak ba prioridade sira-ne’e. Iha kazu barak, prioridade sira-ne’e relasiona ho kompromisu multilaterál ka bilaterál ne’ebé mak ami asume no hakarak lori tan ba oin.

Tanba ne’e mak ami-nia sistema sosiál no polítiku tenke orienta ba prioridade dezenvolvimentu nasionál sira-ne’e. Nasaun labele – no Timoroan sira lakohi – soe tempu arbiru de’it.

Ha’u foti okaziaun ida-ne’e hodi hato’o ba Ita-Boot sira ami-nia rekoñesimentu ba kooperasaun no empeñu ne’ebé ami-nia parseiru sira hatudu iha nivel bilaterál no multilaterál, hodi kontribui ba dezenvolve liután ami-nia prioridade nasionál sira. Konsolidasaun institusionál ne’ebé maka ami hala’o ona no hakarak hametin liután hanesan mós rezultadu hosi parseria sira-ne’ebé estabelese tiha ona. Buat ne’e bele dehan mós kona-ba serbisu ne’ebé foin hahú ba diversifikasaun ekonómika. Apoiu ne’ebé ami-nia parseiru sira fó mai ami valoriza tebes hosi Timoroan sira.

Exelénsias,
Demokrasia iha Timor-Leste mak Restaurasaun Independénsia nia “oan doben” ida. Demokrasia mak hanesan rezultadu diretu hosi ami-nia povu nia luta. Buat ne’ebé independénsia lori ba nasaun ida-ne’e ba dala uluk maka Estadu Direitu, liberdade no garantia sira-ne’ebé hametin respeitu ba dignidade sidadaun sira-nian. Demokrasia murak tebes ba ami. Maibé la limita de’it ba hili ukun-na’in sira. Demokrasia tenke moris nafatin iha sidadaun hotu-hotu nia leet hodi defende sira-nia direitu hotu, inklui direitu atu moris di’ak liután iha sira-nia rain rasik.

Ne’e duni, ha’u hateke ho atensaun – no hakfodak – ba dezafiu sira-ne’ebé sistema demokrátiku sira hasoru iha tinan ikus hirak liubá. Tuir ha’u-nia haree, nasaun barak hasoru hela krize reprezentatividade ne’ebé liga ho dezafiu demokrátiku atu harii governu hirak ne’ebé estavel, ne’ebé bele hetan konfiansa hosi sidadaun sira.

Iha nasaun balun mosu fali modelu ukun populár. Maski nune’e, maneira ukun ne’e hala’o tuir respeitu ba regra sira demokrasia reprezentativa nian, hodi hatudu momoos forsa hosi ideia Estadu Direitu nian no protesaun ba direitu, liberdade no garantia sira.

Dezafiu sira-ne’ebé demokrasia hasoru liga ho sosiedade sira-nia mudansa teknolójika ne’ebé lais. Dala ruma dezafiu sira-ne’e mosu hosi dezigualdade ne’ebé kadavés boot liután liga ho distribuisaun rendimentu. Buat ne’e mak karik mudansa teknolójika nia konsekuénsia ne’ebé ita bele haree ho matan rasik.

Klaru ke sosiedade timoroan nia situasaun la hanesan ho nasaun dezenvolvidu sira-nian. Biar nune’e, iha fatór balun ne’ebé komún:

– Ida, mak dezigualdade ne’ebé kadavés boot liután. Maski iha ona polítika hirak ne’ebé di’ak hodi tulun grupu kbiit-laek sira, maibé iha tinan 10 ikus ne’e dezigualdade iha distribuisaun rendimentu iha Timor-Leste sai aat ba beibeik.

– Hosi parte seluk, iha eleisaun ikusliu, votante timoroan sira hatudu katak sira fó valór liu ba prioridade rua mak hanesan “rigór orsamentál” no “governasaun di’ak”.

Eleitoradu hosi nasaun dezenvolvidu sira toman ho prioridade sira-ne’e. Agora kona-ba rezultadu eleitorál hatán ka lae ba votante sira-nia preokupasaun, ne’e buat ketak ida, depende ba kada nasaun.

Kona-ba kazu Timor-Leste nian, iha 2017 votante sira fó maioria ba partidu lubuk ida ho diskursu polítiku ne’ebé foka liu ba prioridade mak hanesan luta hasoru korrupsaun no governasaun nia rigór. Maski nune’e, mensajen rigór ne’e, ne’ebé foka liu ba interese públiku no promete atu halo mudansa, ikusmai mensajen ne’e la hetan maioria parlamentár ne’ebé klaru.

Hafoin halo tiha reflesaun ne’ebé kle’an, ha’u haree katak nesesáriu husu sidadaun sira atu klarifika situasaun ne’e. Ita hakarak karik sidadaun sira fó fiar ba polítika – no ba polítiku-na’in sira -, ita tenke hatene rona sira.

Votante sira bele – no tenke – kontribui hodi rezolve situasaun polítika ne’ebé oras ne’e hanetik implementasaun ba ami-nia prioridade estratéjika sira liga ho dezenvolvimentu ekonómiku no sosiál. Ba ami, Restaurasaun Independénsia hanesan meius ida hodi ikusmai bele dezenvolve ami-nia rain no halakon kiak. Urjente tebes atu kumpre objetivu nasionál ida-ne’e no presiza serbisu hamutuk hodi lori sai jerasaun timoroan oinmai hosi kiak.

Halakon kiak no dezenvolvimentu ekonómiku nasionál hanesan ezersísiu soberania ne’ebé fundamentál, ne’ebé hametin koezaun no unidade nasionál. Liuhosi dezenvolve nasaun mak ita bele tane aas Timoroan sira-nia kapasidade realizasaun no soberania nasionál.

Molok atu hakotu, ha’u hakarak ko’alia uitoan tan kona-ba ha’u-nia perspetiva relasiona ho realidade internasionál no ami-nia integrasaun internasionál nu’udar nasaun.

Ita moris iha mundu ida ne’ebé nakonu ho inserteza no dezafiu foun hirak: mudansa klimátika; fluksu migratóriu ne’ebé boot; terrorizmu no rede kriminozu internasionál ne’ebé aumenta ba beibeik; polu influénsia internasionál hirak ne’ebé habelar ba beibeik; no proliferasaun nukleár. Hanesan ha’u dehan iha kotuk, ita moris iha sosiedade hirak nakonu ho dezigualdade ne’ebé sae aas ba beibeik. Ida-ne’e fó impaktu ba Nasaun sira-nia estabilidade no koezaun nasionál.

Valór sira-ne’ebé mak hatuur iha Konstituisaun, liuliu promove relasaun amizade no kooperasaun entre povu no Estadu hotu-hotu, sai hanesan matadalan ba Timor-Leste nia polítika esterna. Ha’u fiar katak valór sira-ne’e adekuadu hodi fó dalan ba Timor-Leste nia kontribuisaun no tulun ami atu hasoru dezafiu koletivu foun hirak ne’ebé komunidade internasionál enfrenta.

Ha’u-nia rain haka’as an atu hasa’e ninia partisipasaun no kooperasaun, iha nivel multilaterál no bilaterál, hodi hametin estabilidade no seguransa rejionál no internasionál, liuhosi dezenvolve ami-nia parseria sira. Estabilidade hanesan fatór xave ida hodi haburas ekonomia, seguransa no populasaun nia moris-di’ak iha rejiaun.

Ami fiar katak ema interesadu sira tenke partisipa ho ativu iha prosesu rezolve no hatán ba dezafius ohin loron nian. Ezemplu partisipasaun di’ak ida mak ha’u-nia rain nia kontribuisaun ba grupu Nasoins “g7 plus”, ne’ebé halibur hamutuk nasaun ruanulu ne’ebé foin sai hosi konflitu ka hasoru hela frajilidade institusionál. “g7 plus” fó ona kontribuisaun pozitivu tebes ba kooperasaun ho parseiru dezenvolvimentu sira no promove onakooperasaun “frajil ba frajil” ne’ebé importante iha área mak hanesan dame no rekonsiliasaun, jestaun rekursus naturais no jestaun finansas públikas.

Ha’u hakarak hato’o ha’u-nia ksolok ho komprensaun ne’ebé iha kona-ba objetivu sira grupu ne’e nian, inklui mós resposta ne’ebé mak ami hetan hosi parseiru dezenvolvimentu sira, inklui estadu no instituisaun parseiru sira. Ema interesadu sira-nia partisipasaun liuliu iha kazu país ka rejiaun sira-ne’ebé afeta hosi konflitu no frajilidade institusionál, mak bele hametin estabilidade.

Mudansa klimátika mak kala dezafiu boot liu hodi realiza prioridade dezenvolvimentu povu sira-nian no estabilidade sistema internasionál nian.

Akordu París, ne’ebé Timor-Leste ratifika ona, hanesan responsabilidade ida Estadu ida-idak nian hodi proteje planeta hosi risku, karik posivel, no koordena resposta koletiva hirak hasoru vulnerabilidade ne’ebé hamosu hosi klima. Ha’u-nia rain tau konsiderasaun liuliu ba konsekuénsia hosi nivel tasi sae iha rai-kotun sira Pasífiku nian, ne’ebé ezije komunidade internasionál no Nasaun sira-ne’ebé mak afeta diretamente hosi problema ne’e atu serbisu hamutuk.

Mundu hasoru hela dezafiu boot ida liga ho fluksu migratóriu ne’ebé mak akontese daudaun hela. Ema tokon ba tokon buka protesaun ka oportunidade ekonómika hirak ne’ebé di’ak, no dala barak sira monu ba situasaun hirak ne’ebé halo ita-nia konxiénsia la hakmatek.

Timor-Leste apoia realizasaun Konferénsia Intergovernamentál ida kona-ba migrasaun no konsidera katak urjente tebes atu hadi’ak koordenasaun no kualidade akollimentu ba refujiadu sira. Konferénsia internasionál hirak-ne’e bele kontribui ba rezolve fluksu migratóriu sira-nia abut hodi kria oportunidade foun hirak iha rejiaun sira-ne’ebé ho situasaun ekonomia ne’ebé fraku.

Ha’u foti oportunidade ida-ne’e hodi saúda governu no povu Singapura nian ne’ebé agora daudaun kaer prezidénsia ASEAN nian. Timor-Leste prepara an nafatin hodi tama ba ASEAN nu’udar meius ida hodi hakle’an tan ninia kontribuisaun ba dezenvolvimentu rejiaun ne’ebé ami halo parte ba no iha relasaun amizade no kooperasaun ne’ebé espesiál.

Hosi parte Komunidade Rain sira-ne’ebé Ko’alia Lia-Portugés, ho laran-ksolok boot mak ha’u informa katak ha’u hakarak no espera atu partisipa iha Konferénsia Xefe Estadu no Governu CPLP nian ba dala 12, ne’ebé sei hala’o iha fulan-Jullu oinmai iha Cidade da Praia. Simeira ida-ne’e sei marka inísiu ba prezidénsia CPLP nian hosi Kabuverde.

Iha momentu ne’ebé mak ami prepara an hela atu selebra aniversáriu Restaurasaun Independénsia ba dala 16, ha’u hanoin hikas fali povu sira-ne’ebé seidauk bele realiza sira-nia direitu ba autodeterminasaun ne’ebé rekoñese ona iha Direitu Internasionál. Povu sira-ne’e mak povu Palestina no povu Sahrawi. Kestaun palestiniana só bele rezolve karik Estadu soberanu rua moris hamutuk iha pás nia laran no respeitu ba malu. Tuir ami-nia haree mós katak hala’o direitu ba autodeterminasaun povu Sahrawi nian hanesan devér komunidade internasionál nian no sei fó prestíjiu ba ONU no nasaun rua hotu, Marrokos no Sara Osidentál.

Exelénsias,

Dezafiu boot sira-ne’ebé ha’u haree iha ita-nia oin labele halo ita haluha katak kooperasaun internasionál ba pás no dezenvolvimentu hamosu ona rezultadu hirak ne’ebé di’ak tebes iha tinan hirak ikus ne’e. Ezemplu ba ida-ne’e mak ha’u-nia rain, no nasaun seluseluk tan.

Tanba ne’e mak, molok atu hakotu, ha’u hakarak hato’o ha’u-nia otimizmu no antesipasaun. Ha’u propoin brinde ida:
Mai ita hasa’e diálogu no kooperasaun internasionál, hametin povu sira-nia pás no moris-di’ak.