PREZIDENTE FRANCISCO GUTERRES LÚ OLO SAÚDA KORPU DIPLOMÁTIKU NO DESTAKA ESPÍRITU DEMOKRÁTIKU  TIMOROAN SIRA-NIAN

by Mídia PR Posted on

 

Dili, Palásiu Nobre Lahane, 23 Fevereiru, 2018 – Prezidente Repúblika Francisco Guterres Lú Olo ohin bolu atensaun ba importánsia demokrasia nian durante resepsaun boazvindas ne’ebé oferese hosi Sua Exelénsia ba korpu diplomátiku.

Xefe Estadu aproveita okaziaun ne’e hodi agradese ba komunidade internasionál ba apoiu ne’ebé fó nafatin ba hametin no dezenvolve nasaun, hodi dehan “Apoiu ne’ebé ami-nia parseiru sira fó mai ami valoriza tebes hosi Timoroan sira”.

“Demokrasia iha Timor-Leste mak Restaurasaun Independénsia nia “oan doben” ida. Demokrasia mak hanesan rezultadu diretu hosi ami-nia povu nia luta”, Xefe Estadu dehan ba diplomata sira no bainaka seluseluk ne’ebé mak marka prezensa iha Palásiu Nobre Lahane, iha Dili.

Iha okaziaun ida-ne’e, Xefe Estadu hahi’i mós progresu ne’ebé Timor-Leste halo ona kona-ba demokrasia. “Buat ne’ebé independénsia lori ba nasaun ida-ne’e ba dala uluk maka Estadu Direitu, liberdade no garantia sira-ne’ebé hametin respeitu ba dignidade sidadaun sira-nian”, nia hatete.

Prezidente mós subliña katak demokrasia la’ós de’it vota. “Demokrasia murak tebes ba ami. Maibé la limita de’it ba hili ukun-na’in sira. Demokrasia tenke moris nafatin iha sidadaun hotu-hotu nia leet hodi defende sira-nia direitu hotu, inklui direitu atu moris di’ak liután iha sira-nia rain rasik”, nia dehan.
“Ita-nia rain moris iha estabilidade no pás nia laran tanba Timoroan sira la tolera ona ema fakar tan buat murak ne’ebé hamutuk hetan iha tinan 15 ikus ne’e no la tolera mós dezestabilizasaun”, Xefe Estadu hatutan.

Liga ho negosiasaun ne’ebé mak agora daudaun hala’o hela kona-ba fronteira tasi no rai-maran nian, Prezidente lembra hikas fali kona-ba Timor-Leste nia konfiansa ba negosiasaun no diálogu.

“Timor-Leste sempre hatudu konfiansa ba relasaun amizade no viziñansa di’ak, no fiar katak diálogu no negosiasaun nu’udar meius ida atu halakon konflitu”, nia dehan.

“Liga ho negosiasaun rekursus ami la haluha prioridade ne’ebé mak ami fó ba dezenvolve know-how nasionál hodi realiza ami-nia vizaun kona-ba ekonomia ida ne’ebé mak aumenta valór ba rekursus naturais Timór nian”, Prezidente Repúblika subliña.

“Só nune’e mak ami bele sai hanesan nasaun ida ho rendimentu médiu/aas to’o tinan 2030 no kontribui liután ba inovasaun, dinamizmu no prosperidade rejiaun ida-ne’e nian”, nia hatete.

“Só nune’e de’it mak ita hotu bele kontribui hodi alkansa Objetivu Dezenvolvimentu Sustentavel sira komunidade internasionál nian ne’ebé bele konta ho Timor-Leste nia empeñu tomak”, Prezidente Lú Olo hatutan.

Iha okaziaun hanesan, Prezidente Repúblika afirma mós katak diálogu kontribui ona hodi hametin relasaun amizade ho nasaun viziñu sira.

“Prosesu negosiasaun fronteira ne’e halo ami fiar no kaer metin ba valór diálogu nian, no kontribui ona atu hametin amizade no solidariedade ne’ebé eziste tinan barak ona entre ami-nia povu sira, liuliu ho governu no povu Austrália liga ho fronteira tasi nian”, Prezidente Repúblika dehan mós.

Molok atu hakotu, Prezidente Lú Olo akompaña hosi bainaka sira-ne’ebé mak marka prezensa iha Palásiu Lahane, halo brinde ida hodi dehan “Mai ita hasa’e diálogu no kooperasaun internasionál, hametin povu sira-nia pás no moris-di’ak”.

Midia PR