LIA MENON HUSI S.EXA. SEÑOR PREZIDENTE FRANCISCO GUTERRES LÚ OLO BA PALESTRA LORON DAHULUK KOMEMORASAUN LORON NASIONAL VETERANU SIRA NIAN

by Mídia PR Posted on

Díli, 2 Marsu 2018

PALÁCIO PRESIDENCIAL NICOLAU LOBATO

Señor Primeiru–Ministru Mari Alkatiri
Señor ex-presidente Taur Matan Ruak
Membrus husi Komisaun Organizadora
Veteranu no veterana sira.

Ha’u hato’o ha’u-nia kumprimentu ba imi hotu ne’ebé prezente iha ne’e, no agradese ba konvite Komisaun Organizasaun haruka mai ha’u hodi partisipa iha komemorasaun loron 3 fulan marsu, Loron Nasionál Veteranu sira ne’ebé hala’o iha loron 3 nia laran.

Ho laran ksolok tebes maka ha’u hare ba inisiativa iha programa ne’e halo komemorasaun nomós valorizasaun ba veteranu sira, iha loron espesial ida ne’e dedikadu ba sira, maibé laos de’it ba sira; ba ita hotu nia moris loroloron nia.

Mártires, veteranu no kombatente sira, hakerek mai ita tinan-24 funu ba libertasaun, istória balun ne’ebé furak husi istória ita-nia nasaun nian.

Sira hakerek istória ida née loloos ho aten-barani, no matenek, liuliu sira servisu ho isin ho klamar tomak no la hein iha futuru ema sei selu fila fali sira-nia sakrifisiu.

Povu Timor-Leste hatudu kapasidade hodi kaer metin valor ne’ebé sira hala’o tiha ona no halo hodi harii ita-nia identidade rasik hanesan povu, ho vitória Restaurasaun
Independénsia, halo ita marka diferensa ho nasaun seluk, ita sai nasaun únika, unidu iha nasaun ida ne’ebé livre.

Iha mundu modernu, moris loroloron iha sosidedade livre no seguru, hanesan ita-nia nasaun, fasil tebes atu haluha katak ita sai livre tanba eroi no veteranu sira, ha’u hanoin valór rezisténsia sira mak halo nasaun ne’e bele hamrik, rezisténsia hotu-hotu ho sentru husi povu lori valor nasaun nian no ita-nia kultura liufali interese ema idak-idak ninian

Rezisténsia, kombatente no povu sira manan tamba sira-nia neon metin ba ita-nia valor no servi ita-nia nasaun ho fuan tomak no ho laran moos. Bele fasil haluha verdade simples ida ne’e – maibé se ita hakarak tebes duni atu lori ita-nia rai ne’e ba oin di’ak liu ita labele haluha.

Etika Rezisténsia nian, maka veteranu no martir sira servi nasaun ho laran luak, nuneé kombatente no povu sira servisu hamutuk ho vontade ida de’it.

Ho laran ksolok haree veteranu na’in-rua iha neé. Ida hala’o servisu iha rai-liur no ida iha frente armada. Sira prontu atu fahe sira-nia istória no esperiénsia uituan, sira-nia vizaun kona-ba rezisténsia no istória ita-nia nasaun. Nasaun ida neé tenki harii oportunidade foun atu veteranu barakliu tan bele mós halo hanesan, sira na’in-rua hodi hatutan ba jerasaun foun sira nia esperiénsia no ezemplu servisu ne’ebé sira hala’o ba nasaun ida ne’e.

Karik laiha espíritu servisu ba nasaun ida ne’e, ita la hetan biban to’o iha fatin ne’ebé ita hakarak atu to’o. Juventude sira presiza hatene no kompriende prosesu ida ne’e hotu.

Tamba kompromisu sira seluk, ha’u husu deskulpa ha’u labele hela hamutuk ho imi iha fatin ida ne’e iha sesaun ne’ebé tuirmai.

Aban, tuir programa komemorasaun, ha’u sei ko’alia kona-ba valores rezisténsia nian, ne’ebé lori ita rai ho kbiit tomak. Ida ne’e mak ha’u hanoin kona-ba dever veteranu sira ba libertasaun nasionál, no oras neé daudaun iha nasaun independente ida.

Ita-nia batalla hasoru okupasaun remata tiha ona, maibé luta ba reforsa soberania no dezenvolvimentu ita-nia rai doben ida ne’e sei hala’o nafatin.

Prosesu luta ida neé presiza partisipasaun hotu hotu nian, ho espíritu servi ba povu no nasaun.

Maun alin sira,
Atu ramata,
Ha’u hato’o ha’u-nia votu kaloroza ba komemorasaun ida ne’ebé dignu no ho ksolok barak ba Loron Nasionál Veteranu sira nian. Ha’u-nia votu ksolok mós ba sesaun tuirmai ho ita-nia ilustre palestra na’in-rua husi ita-nia rai doben ida nee.

VIVA LORON 3 MARSU
VIVA VETERANUS HUSI FRENTE ARMADA, FRENTE DIPLOMATIKA, FRENTE POLITIKA KLANDESTINA.
VIVA POVU TIMOR-LESTE