CHEPTIL RELATA PREOKUPASAUN BA PREZIDENTE-da-REPÚBLIKA

by Mídia PR Posted on


Palásiu Prezidente Nicolau Lobato, Loron-5 fulan-Marsu – Koordenadór National The Civil Society Education Partnership Timor-Leste (CHEPTIL) Jose de Jesus, ho dirigente sira husi organizasaun hitu ne’ebé mak hamahon-an iha CHEPTIL, hanesan Action for Change foundation (ACF), Many Hands one Nation (MAHON), Institute Matadalan Integradu (IMI), Haburas Dezenvolve Talento (HADEZTA) no Feto Hadomi Familia (FHF), hamutuk ho reprezentante União Professór iha Timor-Leste no organizasaun ne’ebé serbisu ba difisiente matan, hasoru malu ho Prezidente-da-Repúblika Francisco Guterres Lú Olo.

Iha reniuan ne’e koordenadór CHEPTIL hato’o sira-nia preokupasaun ba Prezidente-da-Repúblika kona-ba situasaun edukasaun iha Timor-Leste bazeia ba sira-nia observasaun no monitorizasaun ba eskola sira iha Timor Leste.
Preokupasaun sira ne’e mak hanesan infrastruturas bázika eskola nian ladun di’ak, eskola balu la iha bibliotéka, saniamentu eskolar ladun di’ak , profesores la iha kreatividade ba iha hanorin, Labarik sira ho idade tinan 3 to’o tinan 5 barak mak seidauk asesu Pre-Eskolar, liuliu sira ne’ebé iha área rurál no difisiente sira iha nivél nasionál ho porsentu 25 % mak sei moris iha analfabeitu nia laran.

Organizasaun soseidade sivil hirak ne’e serbisu hamutuk iha seitór edukasaun durante tinan balu nia laran, atu bele hadi’a kualidade timoroan hotu iha Timor-Leste.

Iha asaun balu ne’ebé mak Organizasaun Soseidade Sivil ne’e hala’o ona maibé ladun sufisiente, tamba ne’e mak hato’o ba Prezidente-da-Repúblika atu bele fó atensaun ba kualidade edukasaun.
CHEPTIL rekomenda ba Xefe-de-Estadu bainhira halo diskursu públiku bele sita asuntu edukasaun nian hodi aviza ba timoroan hotu atu bele fó prioridade ba edukasaun.

Sira mós husu ba Prezidente-da-Repúblika atu hato’o ba Governu atuál ka Governu foun, hodi hasa’e Orsamentu Estadu ne’ebé aloka ba seitór edukasaun, atu bele hadia sistema edukasaun hotu Iha Timor-Leste liuliu ba povu vulnerável sira iha área rurál.
CHEPTIL rekomenda ba Prezidente-da-Repúblika hato’o mós ba futuru Parlamentu Nasionál atu halo lei ne’ebé adekuadu ba kondisaun no situasaun edukasaun iha Timor-Leste.

Prezidente-da-Repúblika simu rekomendasaun hirak ne’e no hatete, opiniuan sira ne’e válidu no la sees husi Prezidente-da-Repúblika no orgaun sira seluk nia preokupasaun, tamba ne’e Xefe-de-Estadu kompromete sei hato’o ba Parlamentu Nasionál no Governu ne’ebé sei mai, atu bele iha kompromisu ba dezenvolvimentu kualidade edukasaun iha Timor-Leste.
Mídia PR