DEKLARASAUN HOSI SUA EXELÉNSIA FRANCISCO GUTERRES LÚ OLO PREZIDENTE REPÚBLIKA DEMOKRÁTIKA TIMOR-LESTE KONA-BA SITUASAUN IHA SÍRIA

by Mídia PR Posted on

 

Palásiu Nicolau Lobato, 7 Marsu, 2018 – Terus ne’ebé mak ema rihun ba rihun hasoru iha fatin oioin iha mundu, liuliu iha Síria, tuir buat ne’ebé ita rona, labele husik komunidade internasionál sente indiferente.

Konflitu iha Síria halakon ona ema rihun ba rihun nia vida, inklui labarik rihun ba rihun no ema sivíl kilat-laek seluseluk. Feto ho mane, ema boot ka labarik, maka vítima inosente ba hahalok aat ne’ebé halo ita-nia konxiénsia hakfodak.

Hahalok aat ne’e hanesan violasaun ba valór sira sivilizasaun nian ne’ebé mak ita defende no mós ba Direitus Umanus fundamentál sira-ne’ebé rekoñese hosi komunidade Nasaun sira-nian no hatuur iha direitu internasionál.

Timor-Leste fó valór ba Solidariedade Internasionál, no ami-nia povu hetan ona esperiénsia kona-ba hasoru terus boot.

Timoroan sira-nia Direitus Umanus hetan violasaun durante tinan barak nia laran maibé komunidade internasionál balun nonook hela. Bazeia ba Karta Nasoins Unidas no nu’udar membrus komunidade internasionál nian, ita labele taka matan ba situasaun ida-ne’e.

Timor-Leste fiar katak diálogu no negosiasaun hanesan instrumentu fundamentál ne’ebé mak presiza hodi rezolve konflitu no haksesuk malu.

Komunidade internasionál iha devér atu kontribui hodi loke dalan ho urjente ba solusaun polítika, hakmatek no negosiadu ida ba konflitu iha Síria no tulun hakotu terus ema barak nian ne’ebé iha direitu ba moris.

Lori ami-nia povu nia naran, no hodi valór sira-ne’ebé sai nu’udar matadalan Estadu Timor-Leste nian, ha’u hato’o ami-nia rain nia apoiu ba apelu ne’ebé mai hosi Amu-Papa Francisco no Sekretáriu Jerál Nasoins Unidas António Guterres, atu hapara kedas violénsia no implementa sesar fogu, hodi bele fó dalan ba inisiativa hirak ne’ebé buka rezolve konflitu iha Síria liuhosi negosiasaun.

Ita hotu iha devér atu serbisu hodi kria oportunidade hirak nebe diak ba labarik sira iha Síria, no iha fatin seluseluk ne’ebé moris iha funu, atu nune’e sira bele moris ho seguransa, haksolok iha uma-kain nia laran, iha sira-nia família laran, iha sira nia komunidade no kontribui ba dezenvolvimentu Umanidade nian.

TANBA NE’E MAK AMI HATETE LAE BA FUNU!