RAMOS HORTA KO’ALIA HO XEFE-de-ESTADU KONA-BA INDULTU BA DADUR SIRA

by Mídia PR Posted on

Palásiu Prezidente Nicolau Lobato, loron-07 fulan-Marsu – Eis Prezidente da Repúblika, atuál Ministru Estadu e Konselleiru ba Seguransa Nasionál José Ramos Horta hasoru malu Prezidente-da-Repúblika Francisco Guteres Lú Olo hodi hato’o nia preokupasaun kona-ba indultu ba dadur sira.

Jose Ramos Horta hateten katak tuir regras normál Xefe-de-Estadu mak sei fó indultu iha loron boot sira hanesan, loron Restaurasaun Independénsia 20 de Maio no loron Proklamasaun Independénsia 28 Novembru hafoin Governu liuhusi Ministériu Justisa hato’o lista ba Xefe-de-Estadu.

Jose Ramos Horta subliña katak indultu ne’e laos de’it Prezidente nian direitu konstitusionál, maibé mós sai obrigasaun ida ne’ebé hakerek iha Konstituisaun atu fó oportunidade ba sidadaun sira ne’ebé sai dadur. Prezidente-da-Repúblika mak sukat kazu individuál husi dadur sira tanba justisa laos haree husi faktus ne’ebé Tribunál foti de’it maibé ita haree mós husi razaun tanba saida mak kazu ne’e akontese. Ema hotu respeita desizaun Tribunál tanba ne’e mak ema dadur iha prizaun Becora, Gleno no Suai.

Identifikasaun Prizoneirus ne’ebé atu hetan indultus sei hala’o husi Ministériu Justiça hafoin ida ne’e mak sei aprezenta lista ba Xefe-de-Estadu, maske Governu aprezenta ona lista, maibé Prezidente mós iha direitu atu hili, se iha elementu ruma ne’ebé laiha lista governu ba fó indultu, Prezidente bele halo nia inisiativa rasik, Horta esklarese.

Tuir Jose Ramos Horta katak Prezidente-da-Repúblika konkorda no sei estuda kazu sira ida-idak, haree oinsá bele hatun ema sira ne’e nia todan atu bele kompleta justisa di’ak liután.

Ministru Estadu no Konselleiru ba Seguransa Nasionál louva Prezidente-da-Repúblika Francisco Guterres Lú Olo ninian personalidade katak ema ida que rigurozu nu’udar Prezidente, rigurozu nu’udar jurista no mós iha fuan.
Dadur sira ne’ebé tama kategoria indultu mak primeiru tenki iha komportamentu di’ak no durasaun tinan no razaun umanitária.

Iha mandatu José Ramos Horta nu’udar Prezidente-da-Repúblika iha tinan-lima nia laran (2007-2012) fó indultu ba dadur sira hamutuk ema na’in atus ida resin, no husi mandatu Eis Prezidente-da-Repúblika Taur Matan Ruak (2012-2017) fó indultu ba prizoneirus sira hamutuk ema na’in-lima, Jose Ramos Horta informa.
Mídia PR