DISKURSU HOSI S.E. PREZIDENTE FRANCISCO GUTERRES LÚ OLO IHA SERIMÓNIA ABERTURA BA SEMINÁRIU HALA’O HOSI REDE FETO HO TEMA “FETO NIA VOTU DETERMINA FUTURU NASAUN”

by Mídia PR Posted on

Dili, 26 Marsu 2018

Señora Sekretária Estadu Laura Menezes Lopes
Señora Prezidente Administrasaun Rede Feto nian, Judite Dias Ximenes
Señora Diretora Ezekutiva Rede Feto nian, Sabina Fernandes Seac

Uluknanain ha’u hato’o ha’u-nia hako’ak boot ba imi hotu. Ha’u saúda dirijente no ativista sira, hosi organizasaun oioin feto sira-nian, iha fatin ida-ne’e no iha munisípiu hotu-hotu.
Servisu ne’ebé organizasaun feto sira hala’o dadaun, iha territóriu tomak, kontribui maka’as ba dezenvolvimentu sosiál, iha Timor-Leste.

Ha’u saúda parseria organizasaun feto sira-nian ho governu liuhosi Sekretaria Estadu ba Igualdade Jéneru no Inkluzaun Sosiál.

Importante tebes ba Estadu loke odomatan ba inisiativa oioin hosi sosiedade sivíl tamba polítika ida ne’ e ajuda mós hasa’e feto sira-nia knaar sosiál iha sosiedade.

Liuhosi imi-nia partisipasaun ativa, nu’ udar feto ida-idak ho kbiit rasik no/ka liuhosi organizasaun feto sira-nian, imi bele hatudu, loron-loron, katak imi mós importante, iha prosesu konstrusaun nasionál, iha nível hotu-hotu: la’ós de’it iha polítika, maibé iha mós ita-nia sosiedade laran, iha ida-idak nia uma laran, iha sidade ka aldeia, iha to’os-fatin ka natar laran ka servisu-fatin ne’ebé de’ it, iha ita-nia rai-doben ida ne’e.

Ha’u fó parabéns ba Rede Feto no organizasaun feto hotu-hotu ne’ebé hala’o servisu oioin to’o ohinloron. Ha’u apresia tebes no akompaña beibeik imi-nia atividade, nu’udar sidadaun ne’ebé preokupa mós ho promosaun sosiál feto sira-nian. Ha’u halo ida ne’e uluk tiha ona, molok ha’u sai Prezidente Repúblika.

Ha’u agradese konvite hosi Rede Feto no hosi Sra. Sekretária Estadu atu loke semináriu ida-ne’e, ne’ebé maluk sira sei haksesuk no fó-hanoin ba malu kona-ba votu hosi feto sira no ninia importánsia ba ita-nia nasaun, abanbairua.

Hare’e ba populasaun Timor-Leste nian, soren-balun mane, soren-balun feto.
Nune’ e kualidade demokrasia nian, iha Timor-Leste, depende mós hosi feto sira.

Maibé ita la hare’e de’ it ba kestaun númeru feto nian, iha ita-nia rain. Ita tenke hare’e mós ba aspetu seluk-seluk tan.

Ita-nia Konstituisaun RDTL hatuur prinsípiu katak sidadaun hotu-hotu, feto ka mane, iha direitu hanesan.
Maibé, iha ita-nia sosiedade, feto sira seidauk iha oportunidade hanesan ho mane sira, atu hala’o sira-nia direitu. Nune’e, bainhira ita valoriza feto sira-nia lala’ok no ita promove feto sira-nia partisipasaun, iha prosesu hari’i ita-nia nasaun, ita mós hala’o no hametin dadaun ita-nia Konstituisaun.

Bainbain feto sira mak kaer liuliu responsabilidade tau matan ba labarik sira-nia edukasaun no saúde. Hanesan ita hotu hatene, ida ne’e akontese tamba servisu uma laran nian, la fahe hanesan entre mane no feto.
Maioria feto timoroan, maizumenus 70%, hela no servisu iha área rurál sira.

Servisu maluk feto sira-nian, iha área rurál sira, importante tebetebes ba ekonomia uma-laran nian. Maibé maluk feto sira ne’e seidauk hetan kondisaun hanesan no la iha oportunidade hanesan atu partisipa iha prosesu dezenvolvimentu ba prioridade nasionál sira.
Atu ita bele iha dezenvolvimentu sustentável, importante tebetebes katak hotu-hotu iha asesu ba bee-moos.

Kualidade bee nian no kualidade saneamentu públiku nian fó impaktu ba saúde komunidade nian, inklui hamenus labarik sira mate barak no beibeik.

Loroloron, sesé mak kuru bee iha ita-nia suku no aldeia? Loroloron, sesé mak kuru bee dala barak? Ita restaura ita-nia Independénsia tinan sanulu resin lima liubá. Bainhira ha’u bá munisípiu sira, ha’u hare’e mak feto no labarik-feto, liuliu labarik-feto, la’ o dook tebetebes hodi kuru no lori bee ba sira-nia uma. Feto sira mak kaer liu responsabilidade fó-han no eduka oan sira kona-ba saúde.

Atu ita bele hala’o dezenvolvimentu ho di’ak, ita hotu presiza hare’e oinsá hato’o informasaun ba feto sira no oinsá ita envolve feto sira bainhira implementa polítika kona-ba uma, bee no saneamentu, saúde públika no edukasaun.

Maluk feto sira partisipa maka’as, iha vida polítika nasaun ida ne’e nian, no nune’e, hala’o ona direitu ida ne’ebé Konstituisaun fó ba sidadaun hotu-hotu – ida-ne’e hamanas ha’u-nia laran no ha’u sente haksolok tebetebes.

Biar nune’e, ha’u husu ba imi hotu, inklui departamentu hotu-hotu Estadu nian, atu labele haluha katak partisipasaun polítika ne’e sai direitu ida ne’ebé tenke loke odamatan ba direitu sira seluk: direitu ba edukasaun, ba saúde, ba bee-moos no uma. Direitu sira-ne’e hatuur ona iha Konstituisaun RDTL maibé ema barak seidauk hetan.

Estadu tenke hare’e oinsá sidadaun hotuhotu bele hetan lalais direitu sira ne’ e iha sira-nia moris loroloron. Maluk feto sira tenke partisipa no kontribui atu sidadaun hotu-hotu hetan direitu sira-ne’e.
Ita-nia maluk feto sira tenke tama mós iha prosesu dezenvolvimentu. Ida ne’e nesesidade estratéjika ida atu ita hetan objetivus dezenvolvimentu sustentável ne’ebé ita estabelese ona – inklui diversifikasaun ekonomia nasionál ne’ebé sei depende beibeik hosi oinsá ita hasa’e ekonomia família nian, iha área rurál sira.

Nune’e, bainhira ita prepara-an atu vota hodi hili fali ita-nia reprezentante sira, iha Parlamentu Nasionál, ita labele haluha katak ita-nia demokrasia – ita-nia prosesu polítiku – tenke sai instrumentu ida atu halibur ita. Hamutuk mak ita bele hadi’a lalais rai ida ne’e no hamutuk mak ita bele hetan kondisaun-moris di’ak liután ba povu tomak.

Maun, bin no alin sira,

Povu doben Timor-Leste.

Ita bele hetan objetivu sira ne’e hotu, se ita kaer metin pás no unidade, iha ita-nia sosiedade.
Atu hetan objetivu sira-ne’e, ita tenke servisu hamutuk, mane no feto. No sosiedade tomak tenke aprende valoriza feto sira-nia partisipasaun hodi dezenvolve sosiedade no ekonomia, iha Administrasaun Públika, iha setór privadu emprezariál no iha área rurál sira, iha aldeia sira, no iha to’os-fatin no natar-laran, iha fatin sira ne’ebé maioria povu hela no servisu.

Ha’u fiar katak, semináriu ida-ne’e, tuir organizadora sira-nia hanoin no hakarak, sei kontribui ba hasa’ e formasaun ba ativista no dirijente organizasaun feto sira-nian, ne’ebé halo parte Rede Feto no organizasaun sira seluk.
Ha’u hakarak saúda señór Prezidente Alcino Barris, hosi Komisaun Nasionál Eleisoens, Sr Diretór Acilino Branco hosi Sekretariadu Tékniku Administrasaun Eleitorál, oradora no moderadora sira, iha debate ida ne’e. Kooperasaun ida ne’e di’ ak tebetebes no importante ba ita hotu.

Ha’u fiar katak, iha sorumutu ida ne’ e, partisipante sira sei iha oportunidade atu haklaken no hare’e klean liután oinsá Rede Feto no organizasaun feto timoroan sira-nian sei hala’o servisu aban-bainrua – iha semana hirak oinmai no iha tinan hirak oinmai.
Organizasaun feto timoroan sira-nian bele konta ho Prezidente Repúblika nia apoiu atu promove feto sira-nia partisipasaun, la’ós de’it iha eleisaun antesipada, iha 12 Maiu, maibé, hafoin eleisaun mós.

Feto timoroan sira bele konta ho Prezidente Repúblika nia apoiu atu hetan oportunidade hanesan ho mane, iha prosesu hari’i moris-di’ak ba ita-nia nasaun no mós ba família ida-idak: oportunidade ba asesu, partisipasaun no promosaun, iha nível responsabilidade hotu-hotu, no oportunidade atu kontribui ba prosesu hari’i nasaun seguru no buras liu, ne’ebé garante no respeita feto sira-nia dignidade.

Eleisaun 12 Maiu oinmai importante tebes ba objetivu ida-ne’e. Liuhosi eleisaun no dalan sira seluk tan, ita bele hari’i dadaun sosiedade ida ne’ebé inkluzivu, katak hako’ak ema hotu, livre no ho moris di’ak liután ba ema hotu-hotu, feto no mane. Ita hotu hamutuk, mane no feto, sei dezenvolve ita-nia rain no garante futuru ida ne’ebé di’ak liután ba ita-nia oan sira.

Feto nia votu determina futuru nasaun nian mak motto ba semináriu ida ne’e.
Prioridade nasional sira tenke hala’o duni ho feto sira-nia partisipasaun. Dalan ida ne’e de’ it mak bele tanen metin ita-nia demokrasia.
Viva feto Timor-Leste. Viva Organizasaun Rede Feto Timor.

Viva povu Timor-Leste! Viva Timor-Leste.
Ha’u-nia votus susesu!