PREZIDENTE REPÚBLIKA PROMULGA DEKRETU-LEI ESTATUTU ORGÁNIKU KONSELLU KOMBATENTE LIBERTASAUN NASIONÁL

by Mídia PR Posted on

KOMUNIKADU IMPRENSA

Dili, loron-26 fulan-marsu 2018

PREZIDENTE REPÚBLIKA PROMULGA DEKRETU-LEI ESTATUTU ORGÁNIKU KONSELLU KOMBATENTE LIBERTASAUN NASIONÁL

Prezidente Repúblika promulga ona proposta Dekretu-Lei ne’ebé mak aprova Estatutu Orgániku Konsellu Kombatente Libertasaun Nasionál iha loron 21 fulan-marsu 2018. Diploma legál ne’e ninia intensaun atu define estrutúra, objetivu no kompeténsia sira Konsellu Kombatente ne’e nian. Konsellu ne’e hamrik nu’udar asosiasaun públika ida ne’ebé mak sai nu’udar orgaun sentrál ba organizasaun sira hotu veteranu nian iha Timor-Leste. Konsellu ne’e nu’udar orgaun konsulta Governu nian kona-ba asuntu hirak ne’ebé relasionadu ho veteranu.

Prezidente Repúblika promulga diploma ne’e tanba hakarak tebes atu envolve veteranu sira iha prosesu dezenvolvimentu nasionál ne’e no mós hakarak atu kontribui ba prosesu hadia veteranu sira-nia moris liuhosi Konsellu ne’ebé refere.

Iha tinan 2017, Prezidente Repúblika veta diploma ne’ebé mak foin hetan promulgasaun ne’e tanba Prezidente Repúblika iha dúvida balu kona-ba konteúdu diploma ne’ebé refere ligadu ho aspetu konstitusionalidade no legalidade. Iha momentu ne’ebá, Prezidente Repúblika la promulga tanba hakarak atu iha diploma legál ida ho kualidade di’ak, hodi nune’e la hamosu problema iha prátika. Prezidente Repúblika jura defende no halotuir Konstituisaun no Lei sira. Tan ne’e mak iha momentu ne’ebá Prezidente Repúblika hato’o ninia dúvida liuhosi veto no hato’o nafatin disponibilidade ba Governu no ba Parlamentu Nasionál atu halo serbisu hamutuk ba kestaun veteranu sira-nian.

Prezidente Repúblika hein katak entidade públiku hothotu ho komponente privadu tomak, sei halo esforsu hamutuk hodi konkretiza ita hotu nia mehi atu halo ema hothotu, inklui veteranu sira, ne’ebé durante tinan barak dedika an tomak ba ita-nia ukun rasik an, bele sente duni ukun rasik ne’e ninia rezultadu.

Promulgasaun Dekretu-Lei ne’e parte husi kumpri kompromisu polítika Prezidente Repúblika durante nia mandatu hodi hatur as kestaun Kombatentes Libertasaun Nasionál no Veteranus Luta Independénsia nian. Ho promulgasaun Dekretu-Lei ne’e bele halibur veteranu sira hotu-hotu hodi hamutuk kontinua kontribui ba dezenvolvimentu nasionál.