PREZIDENTE-DA-REPÚBLIKA KONTINUA DIALOGU HO AUTORIDADE LOKÁL LIUHUSI TELEKONFERENSIA

by Mídia PR Posted on

Palásiu Prezidente Nicolau Lobato, loron-4 fulan-abril tinan-2018 – Prezidente-da-Repúblika Francisco Guterres Lú Olo halo dialogu ho autoridade lokál, veteranu no organizasaun sosiedade sivil no partidu polítiku sira husi munisípiu Baucau, Viqueque, Lautem no Manatuto iha sidade Baucau hodi hametin liután pás no estabilidade iha eleisaun antesipada.

Telekonferensia ho tema Promove Diálogu Hodi Garante Pás no Estabilidade iha Prosesu Eleisaun Antesipada. Iha diálogu ne’e Prezidente-da-Repúblika hakarak rona preokupasaun husi autoridade lokál, organizasaun sosiedade sivil, veteranu no partidu polítiku sira relasiona ho preparasaun ba eleisaun antesipada.

Prezidente-da-Repúblika hetan akompañamentu husi Ministru Administrasaun Estatál Valentim Ximenes, Ministru Defeza no Seguransa Jose Agostinho ‘Somotxo’, Vise Ministru Dezenvolvimentu no Obras Públika Renato Monteiro, Prezidente CNE Alcino Baris no Diretór Jerál Acilino Manuel Branco hodi hatan preokupasaun husi autoridade sira kona-ba preparasaun ba eleisaun antesipada ligadu ho estrada, eletrisidade, seguransa no kestaun lojístika no kampaña eleitorál.

Prezidente-da-Repúblika louva povu nia maturidade polítika ne’ebé hatudu tiha ona iha eleisaun Prezidente-da-Repúblika no lejislativa no simu desizaun eleisaun antesipada. Xefe-de-Estadu husu atu komponente hotu-hotu iha munísipiu haat kontinua fó sira-nia kontribuisaim ba eleisaun ida ne’ebé la’o iha pás no estabilidade nia laran nu’udar parte ida atu hametin liután demokrasia iha ita-nia rain.

Iha diálogu ne’e, Prezidente-da-Repúblika esplika desizaun ne’ebé foti hodi hakotu krize polítika. Desizaun ida ne’ebé atu fo kbiit ba povu hodi hili partidu polítiku sira atu ukun. Desizaun polítika ho eleisaun antesipada nu’udar esperiénsia dahuluk no sei sai lisaun dala ida de’it ba lider polítiku sira hotu hodi husik dalan ida ne’ebé moos ba jerasaun sira tuirmai.

Diálogu liuhusi telekonferénsia ne’e nu’udar inisiativa dahuluk husi Prezidente-da-Repúblika atu halo tuir kompromisu polítiku hodi loke espasu ba povu atu bele ko’alia diretamente ho Xefe-de-Estadu no sai Prezidente ba povu tomak.

Xefe-de-Estadu halo tiha diálogu dahuluk ho autoridade lokál, organizasaun sosiedade, veteranu no partidu polítiku sira husi munisípiu Bobonaro, Liquiça, no Ermera iha Maliana iha loron-19 fulan-marsu tinan-2018.

Mídia PR