DISKURSU HOSI SUA EXELÉNSIA PREZIDENTE REPÚBLICA FRANCISCO GUTERRES LÚ OLO HAFOIN PARTIDU POLÍTIKU NO KOLIGAUN SIRA ASINA PAKTU UNIDADE NASIONAL MOLOK TARU MALU IHA ELEISAUN 12 MAIU 2018

by Mídia PR Posted on

Comissão Nacional de Eleições
Díli, 7 Abril 2018

Señora no señor sira,
Sua Exelénsia Prezidente Tribunál Rekursu, Dr. Deolindo dos Santos
Sua Exelénsia Ministru Defeza no Seguransa, Sr. José Agostinho Sequeira “Somotxo”, reprezenta Primeiru-Ministru
Membrus VII Governu
Prezidente no Komisáriu sira hosi Comissão Nacional das Eleições
Líderes no Reprezentantes hosi partidus polítikus no koligasoens eleitorais
Ilustres membrus husi Korpu Diplomátiku no Konsulár
Povu doben Timor-Leste.

Ho laran-haksolok mak ha’u saúda Ita-Boot sira hotu-hotu iha ne’e. Ha’u hato’o ha’u-nia hako’ak boot ba maluk hotu-hotu, iha Timor-Leste tomak no namokari iha rai-li’ur. Importante tebetebes partisipa iha eleisaun tuir mai, atu haforsa ita-nia demokrasia.

Ha’u kontente tebetebes tamba Comissão Nacional das Eleições foti inisiativa hamosu Paktu Unidade Nasionál ida ne’e.

Hamutuk, no ho pás no estabilidade, ita bele kontribui atu Timor-Leste hakat ba oin. Hamutuk ita sei haburas babeibeik ita-nia rai doben, atu ita hotu-hotu moris di’ak liután – ohinloron no iha tinan lima tuir mai.

Ita-nia abut ne’ebé identifika ita, nu’udar povu oinseluk, mak ita-nia tradisaun sira ne’ebé mai hosi ita-nia bei’ala sira. Nune’e, ita labele haluha tradisaun sira ne’e. Maibé ita mos bele hariku liután ita-nia kultura ho inovasaun, buat foun sira ne’ ebé, ita timoroan bele hamosu/kria ohinloron no abanbairua, ho ita-nia matenek rasik. Nune’e, ita sei sukat no kahur tradisaun be’iala sira-nian ho inovasaun oioin, atu haburas babeibeik ita-nia rain ho di’ak maibé, ita kaer-metin nafatin ita-nia identidade, nu’udar timoroan.

Serimónia tradisionál sira ne’ebé loke sorumotu ida ne’e, mai hosi ita-nia kultura nasionál, hosi ita-nia abut. Mai ho fiar no obriga ita halo tuir tamba fó kastigu.

Ita-nia tradisaun hatete: “La’ós ai-manas mánas kedas iha nia hún”. So’e-lia ida ne’e kasu ba ita hotu katak sala-na’in lalika doko-an katak nia hisik ona nia sala. Ninia sala ne’e sei tódan iha ninia hanoin, loron ruma: aban, bainrua ka loron seluk ikus mai. Ita-nia lia-nain sira bele haklaken liután.

No – ita labele haluha – katak sidadaun Timor-Leste nian tenke hatuir mós lei formál sira katak lei sira ne’ebé ita halo, hafoin ita ukun-an. Lei formál sira iha estatutu rasik ho regras rasik, ho kastigu sira ne’ebé lei sira ne’e fó-sai no hatodan.

Maluk sira ne’ebé asina ohin, promete kumpre Paktu ne’e. Ha’u fiar katak sei kumpre tamba maluk sira ne’e halo ho maturidade polítika no ho neon no hakarak ida de’it: atu serve ita-nia rain no povu ne’ébé ita hotu-hotu hadomi.

Ho honra no orgullu boot tebetebes mak ita simu informasaun katak, Timor-Leste mak país demokrátiku liu, iha ita-nia rejiaun Sudeste Aziátiku, tuir klasifikasaun hosi Economist Intelligence Unit, organizasaun privada ida ne’ebé hala’o servisu independente, katak la servisu ba governu no la hali‘is ba influénsia hosi ema ka entidade ne’ébé de’it. Indese Demokrasia 2017 ne’ébé publika iha Janeiru 2018, di’ak tebetebes tamba hamorin Timor-Leste nia naran iha komunidade internasionál. Ne’e mós konfirma dala ida tan apresiasaun di’ak sira ne’ebé ita-nia rain hetan tiha ona, iha tinan hirak liubá, kona-ba demokrasia.

Timor-Leste la’ós de’it país demokrátiku liu, iha rejiaun ASEAN nian. Iha rejiaun tomak Ázia-Pasífiku nian, entre país lima ne’ebé demokrátiku liu, ida mak Timor-Leste. Indise demokrasia Timor-Leste nian hanesan ho Japaun nian. Biar Timor-Leste nurak liu iha Ázia! Biar ita foin hahú hari’i instituisaun demokrátika sira tinan rua nulu liubá! Ita la’o lalais maibé kaer-metin ho kbiit tomak no matenek rasik, ita-nia prosesu haburas demokrasia babeibeik.

Importante tebetebes ba Timor-Leste hetan avaliasaun internasionál hanesan ne’e: kona-ba ita-nia kualidade demokrasia, ita-nia kualidade edukasaun ka ita-nia dezenvolvimentu sosiál en-jerál. Importante tebetebes tamba Governu sira seluk, emprezáriu no insvestidór sira tuir hela informasaun hosi Unidade Informasaun no Análize Economist nian.

Indise demokrasia ne’e valoriza nível partisipasaun sidadaun sira-nian – mane no feto – bainhira fó-hatene ba mundu katak Timor-Leste bele hala’o eleisaun livre, pasífiku no justu. Valoriza ita, nu’udar timoroan, tamba ita bele hala’o direitus, liberdades no garantias ne’ebé ita-nia Konstituisaun haruka tuir.
Restaurasaun Independénsia, iha 20 Maiu 2002 mak loke dalan ba ita hala’o fila fali direitus sira ne’ebé ita ohinloron iha, hafoin luta naruk ho sakrifísiu oioin.

Nu’udar oan Timor-Leste nian, ha’u sente laran haksolok tebetebes. Ho orgullu mak ha’u dehan katak ita-nia povu konkista ona demokrasia ida ho kualidade. Susesu ida ne’e mai hosi ita ida-idak, família ida-idak, grupu komunitáriu, partidu polítiku no instituisaun hotu-hotu. Mai hosi ita hotu, nu’udar povu Timor-Leste!
Ha’u admira no apresia tebetebes maturidade polítika ida ne’ebé ita-nia povu hatudu dala ida tan, iha fulan hirak liubá.

Ha’u fiar katak eleitór sira hotu-hotu, hatene momoos ona saída mak demokrasia no tambasá mak tenke vota fila fali. Ha’u fiar katak eleitór ida-idak sei hili tuir ninia hakarak rasik no sei hili ho fiar –metin ba partidu ka kloligasaun ne’ebé sei ukun di’ak liu, tinan lima tuir mai.

Importante mak rezultadu hosi eleisaun 12 Maiu loke dalan atu haklean liután timoroan hotu-hotu nia determinasaun. Ha’u apela ba sidadaun hotu-hotu atu servisu maka’as liután ba prioridade sira ne’ebé hala’o lalais dezenvolvimentu no nune’e, hadi’a kondisaun moris ba povu tomak.

Paktu Unidade Nasionál ida ne’e kesi partidu no koligasaun polítiku hotu-hotu nu’udar kompromisu atu hatuir duni.
Se Paktu ida ne’e mak kompromisu ida atu garante pás no estabilidade ba prosesu eleitorál no hafoin eleisaun, ha’u fó ha’u-nia apoiu, nu’udar Prezidente Repúblika;

– Hare’e ba kompromisu eleitorál 2017, ne’ebé halo ho laran moos, no ha’u hakarak promove no defende nafatin;
– No hatuir devér no kompeténsia sira ne’ebé Konstituisaun fó ba Xefe Estadu.

Maibé, la’ós Xefe Estadu de’it mak iha dever atu garante pás, estabilidade no kondisaun atu sidadaun sira hala’o sira-nia direitus, inklui direitu ba dezenvolvimentu. Ita hotu-hotu iha devér atu kontribui ba dezenvolvimentu, liuliu maluk sira ne’ebé hakarak tanen no lidera povu, atu serve di’ak liu Timor-Leste no timoroan hotu-hotu.

Dala ida tan, ha’u hakarak hato’o votus atu Paktu Unidade Nasionál ida ne’e kontribui duni ba hametin ita-nia sosiedade no país. Ba forsa polítika hotu-hotu ne’ebé sei taru malu iha eleisaun tuir mai, ba líder polítiku sira hotu, tuan ka foun, ha’u hakarak hato’o lia-menon badak ida:

Ita-Boot sira-nia krítika durante kampaña eleitorál tenke foka liuliu ba polítika no programa eleitorál husi forsa polítika ida-idak. Labele ataka ema.

Krítika importante tebetebes bainhira maluk sira ko’alia ba malu, oin ba oin, ka liuhusi meiu seluk. Liuhusi krítika maibé, ho laran hakmatek no matenek, ita bele hetan dalan foun di’ak liu ka, hadi’a ita-nia an, atu haburas lalais ita-nia dezenvolvimentu.

Pás iha ita-nia rain hari’i liuhusi sakrifísiu povu nian, husi ita hotu-hotu. Ita-nia povu lakoi rona ataka ema. Ita-nia povu lakoi ataka ema tamba tama iha partidu A, B ka C. Labele!
Eleitór sira hakarak rona Ita-Boot sira-nia programa polítiku atu haburas Timor-Leste. Kampaña eleitorál tuir mai ne’e tenke livre no halo ho neon moos no hakarak atu hadi‘a ita-nia rain di’ak liután.

Ha’u apela ba líder sira, ba kandidatu hotu-hotu, ba ativista sira no ba sidadaun hotu-hotu: Lalika insulta malu. Lori ba kampaña Ita-Boot sira-nia polítika dezenvolvimentu. Ba ita-nia rain nia di’ak, ita hotu-hotu tenke haka’as-an, atu eleisaun ne’e, sai akontesimentu importante ida, atu ita hakat ba oin, iha ita-nia prosesu oinsá haburas ita-nia rai doben Timor-Leste no halakon kiak no mukit!

Ha’u apela ba hotu-hotu atu fó tulun ba eleisaun ne’e, nu’udar ita-nia vontade atu hala’o kultura demokrátika iha ita-nia rain no manán rekoñesimentu no admirasaun hosi komunidade internasionál. Ita sei hamorin nafatin ita-nia naran, nu’udar timoroan no ita-nia rain, Timor-Leste.

Ita hotu-hotu sei kontribui atu nakfilak polítika ba instrumentu dezenvolvimentu atu hatuur moris-di’ak ba povu tomak.
Ha’u hakotu ha’u-nia diskursu ho votus servisu di‘ak ba líder sira, ativista sira no membrus husi partidu no koligasaun sira ne’ebé sei taru malu iha eleisaun tuir mai ne’e. Ita-Bo’ot sira, mak foku prinsipál, iha serimónia ida ne’e. Ha’u hato’o boa sorte ba Ita-Boot sira hotu-hotu.

Rai lulik ida ne’e husu ita hotu-hotu nia tulun, ita hotu-hotu nia partisipasaun, atu tuir nafatin bei’ala sira-nia mehi:
– Defende ita-nia direitu ba dezenvolvimentu;
– Defende Rai Timor-Leste nia direitu ba demokrasia no moris di’ak ba ema hotu-hotu.
Tempu to’o ona! Maromak sei tulun ita!
Viva povu tomak! Viva Timor-Leste!