MENSAJEN PREZIDENTE-da-REPÚBLIKA BA KAMPAÑA IDA HAKMATEK NO RESPEITA MALU

by Mídia PR Posted on

Povu doben Timor-Leste.

Kampaña polítika hahú ona iha semana ida. Ha’u kontente tanba la’o ho hakmatek, ho trankuilidade.

Tempu ba kampaña tenke ser tempu oportunidade ida ne’ebé ita hotu hamutuk atu hateten ba povu.

Tempu ida ne’e atu aprezenta ita-nia ideia. Aprezenta ita-nia liña de asaun, ita-nia programa polítika.

 

Tempu ba kampaña labele uza hodi insulta malu. Atu halo deturbasaun ba ita-nia istória. Atu halo kleuk ita-nia pasadu.

Ita-nia sidadaun sira hakarak rona ideias, sira lakohi rona insultus ne’ebé dirijente polítiku sira halo ba malu.

Ita-nia joven sira hakarak simu edukasaun husi demokrasia no debate. Sira lakohi simu edukasaun husi demagojia ka insultus.

Futuru ita-nia rain nia, futuru ita hotu nian, aprezenta liuhusi programa polítiku.

 

Aprezentasaun programa sira, nia klarifikasaun iha debate sai esensiál liu iha kampaña ida ho kualidade.

Insulta. Se mak uza insulta. Ita hatun ita-nia an de’it. Ita la ajuda ita-nia povu.

La hetan dalan ba demokrasia atu eduka sidadaun sira sai responsavel.

 

Nune’e, Ha’u apela respeitu nafatin Paktu ne’ebé dirijente polítiku sira asina ona.

Moderasaun sai hanesan ejijénsia ida ba ita iha kampaña polítika ida ne’e.

Liafuan delikadu hatudu respeitu ba ita-nia an rasik.

Respeitu mós ba ita-nia adversáriu polítiku sira, liuliu respeita ita-nia povu.

 

Veteranu sira fó ezemplu ida boot tebetebes ho kualidade morais ne’ebé as tebetebes.

Veteranu sira mak sai fontes inspirasaun ba ita hotu. Bele kontinua sai ezemplu ba joven sira.

 

Hodi tau as dignidade pasadu nian. Ita-nia pasadu labele haluha. Ita respeita ita-nia pasadu.

Ita fiar ba ita-nia istória. Bainhira halo nune’e, ita harii dadauk baze ba futuru ne’ebé ita so harii ho laran-moos, laos ho ko’alia bosok.

 

Tempu atu ita diskute ho seriedade no laran-hakmatek futuru ita-nia rai nian.

Lalika odio malu, laiha nesesidade, atu bele ajusta kontas ba ita-nia pasadu. Tau todan ba ita-nia pasadu.

 

Tempu atu diskute programa. Programa ne’ebé responde ba nesesidade ita-nia povu nian. Be moos, saneamentu, edukasaun, eskola ho kualidade, saúde, ospitais, klínika, estrada, agrikultura atu bele fó saúde di’ak ba ita-nia povu.

Nomós iha kampaña, ita tenke sai ezemplu.

Ha’u fiar metin iha ita boot sira.

Ha’u fiar ba povu tomak

Viva povu Timor-Leste. Viva Timor-Leste