PADRE LUIGI HOSI BONEKA-ATAURO HUSU PREZIDENTE-DA-REPÚBLIKA NIA TULUN

by Mídia PR Posted on

Palásiu Prezidente Nicolau Lobato Bairo-Pite loron-23 fulan-ábril – Padre Luigi Fornaiser hosi Koperativa Boneka-Atauro hasoru Prezidente-da-Repúblika hodi husu tulun kona-ba rai ne’ebé oras ne’e uza hodi hala’o aktividade.

“Vizita mai hasoru Prezidente Repúblika atu husu tulun, tanba Atauro iha esperiénsia ho karáter sosiál ruma. Tanba ne’e ami presiza hametin esperiénsia sira ne’e tanba Boneka-Atauro ho Restaurante Manu Kokorek fó servisu ba ema barak, agora dadaun moris tan projetu turizmu-komunitariu,”

Padre dehan, agora ema Atauro-oan sira iha esperiénsia barak kona-ba servisu hirak ne’e, hodi sustenta sira-nia moris tanba ne’e, atu servisu hirak ne’ebé iha Atauro labele paradu, husu tulun nafatin ba Estadu atu prolonga tan tempu uza rai iha Atauro hodi hala’o aktividade.

“Tanba ne’e mak mai atu husu apoiu ba Estadu, ami kontente tanba Prezidente Repúblika hatene no koñese ona Atauro no nia hatene esperiénsia sira ne’e,” Padre, haktuir.

Esperiénsia sira ne’e, la’ós karakter kapitalista tanba ida ne’e servisu koperativa.

Tanba Boneka-Atauro emprega ona feto na’in 62, nune’e husu apoiu nafatin ba Estadu, liu hosi Prezidente Repúblika atu apoiu nafatin rai ne’ebé uza hodi hala’o servisu sira ne’e durante tinan 10.

Aktividade ne’ebé hala’o iha Atauro hodi hakbiit moris inan-feton sira iha Atauro mak hanesan: Boneka, Restaurante, Biojoya, turizmu-komunitáriu iha Makili no esperiénsia seluk tan.

Mídia PR