INTERVENSAUN S.E. PREZIDENTE LÚ OLO IHA KOMEMORASAUN LORON ANZAC 2018

by Mídia PR Posted on

Exelénsias Embaixador sira hosi Austrália no Nova zelándia. Membru governu sira nian. Veteranus. Señores no señóres.

Ho laran-ksolok tebes mak ha’u mai partisipa iha selebrasaun Loron ANZAC nian iha Díli no, hamutuk ho veteranu sira, Australianu no Neozelandés hotu-hotu, fó omenajen ba memória hosi sira-ne’ebé mate iha luta hodi serbí sira-nia rain. Ha’u-nia hanoin tomak mós ba família australianu no neozelandés sira-ne’ebé mak lakon sira-nia ema ne’ebé sakrifika an ba luta.

Ha’u mai iha ne’e hodi fó sasin kona-ba Timoroan sira-nia solidariedade no hato’o ami-nia omenajen ba memória hosi sira-ne’ebé fó sira-nia an tomak ba defeza valores, feto no mane. Importante ita fó sasin ba jerasaun foun sira kona-ba sakrifísiu no espíritu servisu ne’ebé bazeia ba valores, atu nune’e ita bele harii orden internasionál ida ne’ebé hakmatek no estavel liután, iha mundu ida ne’ebé prósperu liután ba ita hotu-hotu.

Ami Timoroan hatene saida mak serbí no mate ba liberdade. Loron ANZAC ne’e halo ha’u hanoin hikas fali Timoroan no Australianu sira-ne’ebé mak luta sorisorin durante Funu Mundiál Daruak iha rain lulik ida-ne’e. Timoroan rihun neenulu fó sira-nia an ba mate iha luta ne’e hodi defende dignidade ema nian. Hosi invazaun Forsa Imperiál Japaun nian iha Fevereiru 1942 militár sira Austrália nian hetan apoiu hosi ami-nia povu. Apoiu hirak-ne’e mak determina ema nia moris no mate.

Ami-nia luta ne’e halo veteranu australianu sira sente “dívida onra” ba povu timoroan. Ha’u pesoalmente lembra luta hirak-ne’e, tanba ha’u-nia aman dezde uluk kedas ho barani fó nia apoiu ba forsa australianu balu iha tempu ne’ebá no mantein rezistensia hasoru forsa husi Japaun too Funu Mundiál Daruak nia rohan. Sentidu servisu, sakrifísiu no aten-barani ida-ne’e influensia ha’u-nia moris iha luta ba independénsia.

Ha’u hakru’uk ba grandeza hosi luta ne’ebé mak ita halo hamutuk ba direitu ba moris, ba pás no ba dignidade. Ha’u hakru’uk ba memória hosi maun-alin no inan-feton sira, rihun ba rihun, ne’ebé mak mate durante Funu Mundiál Daruak no mós ba sakrifísiu hosi Timoroan sira-ne’ebé tinan hirak tan ba oin luta iha rain lulik ne’e to’o ikusmai hetan liberdade.

Iha tinan 1999, valór sivilizasionál sira, hanesan respeitu ba liberdade, igualdade no dignidade ema nian, sai hanesan baze fundamentál ida iha momentu murak ida iha relasaun amizade entre ita-nia povu sira, wainhira Australianu no Neozelandés sira simu sai núkleu sentrál INTERFET nian, hodi tulun salva moris iha Timor-Leste.

Loron ANZAC ne’e la’ós selebrasaun funu. Loron ne’e hodi selebra sakrifísiu ne’ebé mak mane no feto, rihun ba rihun, halo hodi tane aas valór sira-ne’ebé sira rasik banati tuir. Ne’e duni, hanesan onra boot ida mai ha’u hodi ohin mai iha ne’e hamutuk ho veteranu sira Timór, Austrália no Nova Zelándia nian, tanba ohin ha’u selebra mós relasaun entre ita-nia rain sira ne’ebé maka la’o kleur ona.

Ha’u hanoin hikas fali vizita emosionál ne’ebé mak hetan oportunidade atu halo ba Muzeu Veteranus iha Perth. Ha’u hakarak aproveita okaziaun ida-ne’e hodi hato’o ba Ita-Boot sira katak kontribuisaun veteranus Austrália nian hodi haburas turizmu istóriku iha Timor-Leste, importante tebetebes ba ha’u. Ita-nia Istória no valór sira-ne’ebé ita-nia povu sira fahe lisuk hanesan ai-riin ba relasaun amizade ne’ebé metin entre ita-nia nasaun tolu, no sai mós hanesan fundasaun ba lasu familiár no amizade nian ne’ebé metin entre ita-nia povu sira.

Ha’u sei serbisu nafatin hamutuk ho imi hodi hametin relasaun sira-ne’e, ita-nia amizade no prátika valór sira-ne’ebé halibur ita hamutuk.

Obrigadu ba Ita-Boot sira ne’ebé mai iha fatin ida-ne’e hodi hamutuk ho povu timoroan selebra loron ida-ne’e ne’ebé importante ba Ita-Boot sira – ba ita hotu.