SIMPÓSIU INTERNASIONÁL OPORTUNIDADE EMPREZARIÁL IHA TEMPU RESESAUN EKONÓMIKA

by Mídia PR Posted on

MENSAJEN HOSI SUA EXELÉNSIA FRANCISCO GUTERRES LÚ OLO,
PREZIDENTE REPÚBLIKA DEMOKRÁTIKA TIMOR-LESTE

HATO’O HOSI DR. FRANCISCO MARIA DE VASCONCELOS
XEFE CASA CIVIL PREZIDENTE REPÚBLIKA NIAN

IHA OKAZIAUN SIMPÓSIU INTERNASIONÁL OPORTUNIDADE EMPREZARIÁL IHA TEMPU RESESAUN EKONÓMIKA, PROMOVE HOSI ASOSIASAUN EMPREZARIÁL FETO TIMOR-LESTE NO SEKRETARIA ESTADU IGUALDADE JÉNERU NO INKLUZAUN SOSIÁL

Exelénsias
Sra. Sekretária Estadu Igualdade Jéneru no Inkluzaun Sosiál;
Sra. Prezidente no señoras dirijentes hosi Asosiasaun Emprezariál Feto Timor-Leste;
Señoras no señores partisipantes iha Simpóziu Internasionál Oportunidade Emprezariál iha Tempu Resesaun Ekonómika;

Emprezárias Timor-Leste.
Lori S.E. Prezidente Repúblika Francisco Guterres Lú Olo nia naran, no ha’u-nia naran rasik, ho laran-ksolok ha’u saúda Exelénsia sira no hato’o votus susesu ba partisipante sira-ne’ebé mak mai partisipa iha sorumutu hirak-ne’e.

Ba Sra. prezidente Ergolina Fernandes Alves, no mós ba dirijente no emprezária hotu-hotu ne’ebé mak membru Asosiasaun ida-ne’e nian, ha’u hahú hodi hato’o señór Prezidente Repúblika nia kumprimentus no votus parabens. Xefe Estadu haksolok hamutuk ho imi hodi selebra, tinan ida-ne’e, aniversáriu Asosiasaun Emprezariál Feto Timor-Leste ba dala sanulu. Parabens.

Feto timoroan sira-nia partisipasaun ativu iha kompañia sira, iha ekonomia no iha nivel sosiedade hotu-hotu hatudu momoos sidadaun feto ho mane sira-nia hakarak atu fahe lisuk responsabilidade iha prosesu dezenvolvimentu, hodi harii nasaun ida no futuru ida ne’ebé di’ak liután.

Lakleur ita sei selebra aniversáriu Restaurasaun Independénsia ba dala 16. Ita-Boot sira-nia partisipasaun, no sidadaun hotu-hotu nian, hanesan sinál ida ne’ebé pozitivu tebetebes katak ita-nia povu prontu atu kaer rasik kuda-talin sosiedade nian – inklui iha setór emprezariál – hodi haburas Timor-Leste.

Empeñu governu nian liuhosi Sra. Sekretária Estadu Igualdade Jéneru no Inkluzaun Sosiál, Sra. Laura Pina, hodi organiza simpóziu ida-ne’e, merese mós ita temi iha ne’e no hahi’i. Estadu serbisu di’ak liután bainhira halo diálogu no hatene rona sidadaun sira hodi koopera hamutuk ho organizasaun sosiedade sivíl hirak.

Prezidente Repúblika hatete dala barak ona katak feto sira-nia partisipasaun fó impaktu boot tebes ba kualidade dezenvolvimentu nian, inklui kualidade ita-nia demokrasia nian. Ne’e duni, Konstituisaun RDTL hatuur prinsípiu igualdade direitu, inklui igualdade direitu entre feto no mane.

Feto nafatin mak kaer responsabilidade boot liu ba oan sira-nia edukasaun no saúde – maski tuir loloos aman sira mós presiza envolve an liután iha oan sira-nia dezenvolvimentu.
Maibé la’ós edukasaun oan sira-nian de’it. Feto timoroan sira-nia serbisu iha to’os-laran importante tebetebes ba ekonomia uma-laran iha fatin sidade no mós iha área rurál. Liuhosi ekonomia uma-laran, feto sira-nia serbisu fó impaktu maka’as ba ekonomia nasaun.

Feto sira-nia koñesimentu kona-ba jestaun ekonómika tenke boot no oportunidade dezenvolvimentu ekonomia uma-laran nian mós tenke barak, atu nune’e produsaun no dimensaun ekonomia nasaun nian bele sai boot liután.

Hanesan vantajen ida katak família sira hadi’ak jestaun ba sira-nia rendimentu, inklui família sira ho rendimentu ki’ik, la’ós iha fatin sidade, maibé mós iha kiosk, iha foho no iha to’os-laran ne’ebé maioria ita-nia povu, no ita-nia feto timoroan, hela bá.
Hasa’e feto sira-nia koñesimentu sei kontribui mós, iha kazu barak, ba hasa’e ekonomia uma-laran no ekonomia nasaun.

Koñesimentu espesializadu sosiedade sivíl nian, inklui koñesimentu ne’ebé mak Asosiasaun Emprezariál Feto Timor-Leste iha kona-ba jestaun ekonómika no oportunidade emprezariál, bele kontribui hodi hasa’e feto sira-nia kapasidade atu hadi’ak ekonomia uma-laran – sorisorin ho sira-nia la’en no oan sira.

Asesu ba informasaun no partisipasaun feto sira-nian sai hanesan prioridade fundamentál ida ba ita-nia dezenvolvimentu.
Asosiasaun Emprezariál Feto Timor-Leste hamutuk ho Sekretaria Estadu Igualdade Jéneru no Inkluzaun Sosiál hili tema ba Simpóziu ida-ne’e mak Oportunidade Emprezariál iha Tempu Resesaun Ekonómika.

Tema hirak-ne’e hatudu momoos kondisaun ekonomia Timor-Leste iha faze dezenvolvimentu nasionál daudaun nian.
Ita-nia ekonomia, atu book an, depende maka’as ba despeza públika, ne’e katak, Orsamentu Estadu.

Kompañia sira-nia atividade no emprezáriu Timor-Leste sira-nia desizaun atu investe depende maka’as ba akizisaun sasán no servisus ne’ebé mak atu hola hosi departamentu sira Estadu nian.

Ita hotu – responsavel públiku ka sidadaun, emprezáriu no serbisudór – tenke konxiente nafatin kona-ba ekonomia Timor-Leste nia realidade ne’e.

Ita hotu hakarak diversifika ekonomia nasionál no fó kapasidade boot liu ba kompañia no emprezáriu sira, maibé realidade mak ne’e: investimentu sei depende maka’as liu ba Orsamentu Estadu.

Krize ekonómika balun ita labele kontrola tanba depende ba situasaun ekonomia internasionál nian.
Maibé iha krize seluk ne’ebé ita bele kontrola tanba hetan sira-nia abut iha rai-laran, la mai hosi li’ur. Oras ne’e daudaun nasaun hasoru hela resesaun ekonómika ida ne’ebé mosu iha rai-laran.

Luta polítika ne’ebé mak akontese durante fulan balun nia laran, laiha nesesidade, hanetik aprovasaun Orsamentu Estadu no hamosu situasaun karénsia ba kompañia sira, ba serbisudór barabarak no sira-nia família, maski ita-nia rain iha osan hodi halo ekonomia la’o nafatin.

Tanba ne’e mak bolu sidadaun – sidadaun hotu-hotu – atu halo reflesaun kona-ba situasaun iha rai-laran no tulun hakat liu krize ne’e, sein prejudika ambiente armonia no estabilidade iha sosiedade nia leet. Biar dezafiu ne’ebé mak nasaun enfrenta hela, Timoroan sira, feto no mane, hatudu momoos ona katak sira hadomi pás no armonia.

Inisiativa feto emprezária hirak-ne’e hanesan parte ida hosi sosiedade nia reflesaun ne’e.

Ha’u rona katak tópiku ne’ebé mak propoin ba Simpósiu ida-ne’e nian maka debate kona-ba avaliasaun ba potensiál ekonómiku Timor-Leste nian no mós kona-ba oinsá governu no setór privadu bele serbisu hamutuk hodi hamenus impaktu hosi krize ekonómika; saida mak setór privadu no emprezáriu sira bele halo iha tempu krize? no oinsá kontribui ba dezenvolvimentu ekonomia sustentavel ida nian, inklui kapasitasaun ba ajente ekonómiku sira?
Tema sira-ne’e importante tebes.

Ha’u fiar metin katak dezafius daudaun nian bele kontribui hodi hasa’e kooperasaun entre setór privadu no Estadu, ohin loron no aban-bainrua, iha projetus ba interese públiku ne’ebé mak fó vantajen ba sosiedade no emprezáriu sira hotu.

Ha’u hakotu hodi hato’o señór Prezidente Repúblika nia prioridade ida – no preokupasaun ida: katak emprezáriu no setór privadu sira-nia investimentus no desizaun ekonómiku buka duni tuir interese públiku. Só ho hanoin ba interese públiku de’it mak bele asegura katak investimentu privadu sira sei tulun hasa’e ekonomia nasionál.

Estratéjia ekonómika sira-ne’ebé di’ak liu, inklui estratéjia sira setór privadu nian, mak estratéjia sira-ne’ebé kontribui ba ekonomia nasionál atu sai boot liután ho sustentavel, tanba kreximentu hirak-ne’e rasik mak sei hasa’e kompañia sira-nia oportunidade ekonómika sira aban-bainrua. Ida-ne’e mak dalan ba dezenvolvimentu.

Ida-ne’e mak dalan ne’ebé bele fasilita kooperasaun ne’ebé sei lori vantajen ba Estadu no mós ba emprezáriu sira hotu. Dalan ne’e tenke tuir interese sidadaun sira-nian no iha rigór ba jestaun ekonomia.

Señora emprezária sira, señora no señór partisipante sira, ha’u hakotu hodi hato’o ha’u-nia votus susesu ba semináriu ida-ne’e no mós ba kooperasaun entre investidór sira, kompañia sira no Estadu, atu nune’e ita bele harii ekonomia ida ne’ebé sustentavel hodi lori ita hotu-hotu iha Timor-Leste ba moris-di’ak.

Obrigadu barak ba Ita-Boot sira hotu. Ha’u-nia votus serbisu di’ak.

Dili, 26 Abríl 2018