Prezidente-da-Repúblika konsulta AMP kona-ba inísiu V Lejislatura no Formasaun Governu

by Mídia PR Posted on

KOMUNIKADU IMPRENSA

Dili, 4 Juñu 2018

Prezidente-da-Repúblika Francisco Guterres Lú Olo, Segunda-feira, Loron-4, fulan Juñu, hala’o konsulta ho Aliansa Mudansa ba Progresu hodi rona hanoin sira kona-ba inísiu V Lejislatura no Formasaun Governu.

Prezidente-da-Repúblika kongratula AMP nu’udar koligasaun partidaria ne’ebé manan iha eleisaun antesipada. Xefe-de-Estadu hakruuk ba vontade polítika povu nian hodi fó konfiansa ba AMP atu lori nasaun ne’e ba oin no hein inísiu V lejislatura sei akontese 15 dias hafoin Tribunál Rekursu fó-sai rezultadu eleisaun antesipada.

Prezidente AMP Xanana Gusmão agradese konvite husi Prezidente-da-Repúblika hodi ko’alia kona-ba tomada-de-posse deputadu V Lejislatura. Prezidente AMP hateten katak Formasaun Governu sei akontese hafoin tomada-de-posse deputadu V Lejislatura tanba Governu maihusi Parlamentu Nasionál.

Iha enkontru ne’e, Prezidente AMP informa akordu koligasaun pre eletorál ne’ebé rejista iha Tribunal no hafoin eleisaun sei funsiona nu’udar bankada ketak-ketak iha Parlamentu Nasionál. Prezidente AMP hatutan katak sei hakerek karta hodi esplika kona-ba akordu pre eletorál ne’ebé partidu CNRT, PLP no KHUNTO asina hodi rejista iha Tribunál nu’udar koligasaun partidaria.

Prezidente AMP hatutan liután katak indijitasaun ba Primeiru Ministru sei akontese hafoin tomada-de-posse ba deputadu V Lejislatura. Hafoin tomada-de-posse deputadu V Lejislatura, lider AMP sei mai hasoru Prezidente-da-Repúblika hodi ko’alia kona-ba formasaun VIII Governu Konstitusionál.

Lideransa AMP ne’ebé partisipa iha enkontru ne’e mak Prezidente AMP Xanana Gusmão, Porta Voz Taur Matan Ruak, Konselleiru KHUNTO Naimori no nia Prezidente Armanda Berta no Sekretáriu Jerál CNRT Francisco Kalbuady.

Hafoin konsulta ho lideransa AMP, Prezidente-da-Repúblika sei kontinua rona hanoin sira husi partidu polítiku FRETILIN, PD no FDD iha loron hanesan kona-ba inisiasaun V Lejislatura no Formasaun Governu.

Rohan