PREZIDENTE-da-REPÚBLIKA KONSULTA FDD KONA-BA INÍSIU V LEJISLATURA NO FORMASAUN GOVERNU

by Mídia PR Posted on

KOMUNIKADU IMPRENSA

Dili, 4 Juñu 2018 – Prezidente-da-Repúblika Francisco Guterres Lú Olo, Segunda-feira, Loron-4, fulan Juñu, hala’o konsulta ho Frente Dezenvolvimentu Demokrátiku (FDD) hodi rona hanoin sira kona-ba inísiu V Lejislatura no Formasaun Governu.

Prezidente-da-Repúblika kongratula FDD nu’udar koligasaun partidaria ne’ebé iha eleisaun antesipada, bele hakatliu bareira hodi hetan asentu iha Parlamentu Nasionál.

Xefe-de-Estadu hakruuk ba vontade polítika povu nian hodi fó konfiansa ba AMP atu lori nasaun ne’e ba oin no hein inísiu V lejislatura sei akontese 15 dias hafoin Tribunál Rekursu fó-sai rezultadu eleisaun antesipada.

Ba lideransa FDD sira, Prezidente-da-Repúblika mós informa rezultadu enkontru ne’ebé nia halo oras hirak antes, ho lideransa sira hosi AMP, FRETILIN no PD

Prezidente FDD António Benevídes agradese konvite husi Prezidente-da-Repúblika no hato’o FDD nia postura polítika atu sai opozisaun konstrutiva no edukativa iha V Lejislatura.

Ba Xefe-de-Estadu FDD rekomenda atu fó hanoin ba koligasaun partidu, AMP, ne’ebé sei kaer ukun, atu garante estabilidade governativa to’o tinan-lima.

Banhira AMP aprezenta lista membru VIII Governu atu aprova, FDD husu Prezidente-da-Repúblika, atu bele koordena mós ho Ministériu Públiku no Komisaun Anti-korupsaun, atu bele garante futuru membru VIII Governu sira livre hosi krime korupsaun, nepotismu no koluzaun.

Lideransa FDD ne’ebé partisipa iha enkontru ne’e mak Prezidente FDD, António Benevides, Komisaun Polítika Nasionál, Agostinho Gomes no Prezidente UDT Gilman Exposto dos Santos, Vise Prezidente Frente Mudansa Egídio dos Santos no Prezidente Partidu Dezenvolvimentu Nasionál Fernando Gusmão.

Rohan