Prezidente-da-Repúblika konsulta FRETILIN kona-ba inísiu V Lejislatura no Formasaun Governu

by Mídia PR Posted on

KOMUNIKADU IMPRENSA

Dili, 4 Juñu 2018

Prezidente-da-Repúblika Francisco Guterres Lú Olo, Segunda-feira, Loron-4, fulan-Juñu,hala’o konsulta ho FRETILIN hodi rona hanoin sira kona-ba inísiu V Lejislatura no postura polítika partidu relasiona formasaun VIII Governu.

Prezidente-da-Repúblika kongratula FRETILIN nu’udar partidu polítiku ne’ebé kontinua hetan fiar husi povu atu kontribui nafatin iha prosesu dezenvolvimentu nasionál.

Xefe-de-Estadu hakruuk ba vontade polítika povu nian hodi fó konfiansa ba AMP atu lori nasaun ne’e ba oin no hein inisiasaun V lejislatura sei akontese 15 dias hafoin Tribunál Rekursu fó-sai rezultadu eleisaun antesipada.

Sekretáriu Jerál Mari Alkatiri informa katak FRETILIN nia postura polítiku ba oin mak sei sai opozisaun nu’udar forma ida kontinua kontribui ba dezenvolvimentu nasaun no estadu Timor-Leste.

Hatan ba inisiasaun V Lejislatura, Vise Prezidente FRETILIN ne’ebé mós asume kargu nu’udar Prezidente Parlamentu Nasionál informa katak sei halibur lider bankada sira hodi determina loron inisiasaun lejislatura, 15 dias hafoin Tribunal Rekursu anunsia rezultadu eleisaun.

Lideransa FRETILIN ne’ebé partisipa iha enkontru ne’e mak Sekretáriu Jerál FRETILIN Mari Alkatiri, Vise Prezidente Aniceto Guterres, Sekretáriu Adjuntu Jose Reis no Cipriana Perreira.

Ohin, Prezidente-da-Repúblika sei rona hanoin sira husi partidu polítiku no koligasaun partidaria ne’ebé iha asentu iha Parlamentu Nasionál kona-ba inisiasaun V Lejislatura no Formasaun Governu, hahú husi AMP, FRETILIN, PD no FDD.

Rohan