PREZIDENTE-da-REPÚBLIKA KONSULTA PD KONA-BA INÍSIU V LEJISLATURA NO FORMASAUN GOVERNU

by Mídia PR Posted on

KOMUNIKADU IMPRENSA

Dili, 4 Juñu 2018 – Prezidente –da-Repúblika Francisco Guterres Lú Olo , iha segunda-feira, loron-4 fulan-Juñu hala’o konsulta ho Partidu Demokrátiku hodi rona sira-nia hanoin ba inísiu V Lejislatura no postura polítika PD relasiona ho formasaun VIII Governu Konstitusionál.

Prezidente-da-Repúblika kongratula Partidu Demokrátiku hanesan Partidu polítiku ida ne’ebé simu desizaun eleisaun antesipada. Xefe-de-Estadu louva PD nu’udar partidu polítiku ida ho korajen boot hakat ho ninian identidade rasik iha eleisaun antesipada maske enfrenta difikuldade oioin.

Prezidente-da-Repúblika informa konsulta ne’ebé halo tiha ona ho AMP no FRETILIN.

Prezidente PD Mariano Asanami Sabino informa katak partidu nia postura polítiku ba oin mak sei sai opozisaun iha Parlamentu Nasionál hodi kontribui ba interese Estadu. Mariano Sabino hatete maske PD lakon kadeira rua, maibé sei respeita povu nia dezisaun liuhusi votus ne’ebé fó.

Partidu Demokrátiku kongratula Prezidente-da-Repúblika nian esforsu, hodi garante prosesu sira durante eleisaun antesipada la’o ho di’ak. Kongratulasaun ka apresiasaun ba Xefe-de-Estadu ne’e, aprova husi konferénsia Nasionál PD nian foin lalais ne’e. PD fó sira-nia apoiu 100% ba Prezidente-da-Repúblika nia dezisaun ba formasaun VIII Governu.

Lideransa PD ne’ebé partisipa iha enkontru ne’e Prezidente Mariano Asanami Sabino, Sekretáriu Jerál António da Conceição, Prezidente CPN Adriano Nascimento, Vise Prezidente CPN Lourdes Bessa no Sekretáriu CPN Manuel Tomas Carvalho.

Ohin, Prezidente-da-Repúblika rona hanoin sira husi partidu polítiku no koligasaun partidaria ne’ebé iha asentu iha Parlamentu Nasionál kona-ba inisiasaun V Lejislatura no Formasaun Governu, hahú husi AMP, FRETILIN, PD no FDD.

Rohan