PREZIDENTE-da-REPÚBLIKA TO’O HIKAS DILI HAFOIN VIZITA ESTADU BA INDONÉZIA

by Mídia PR Posted on

Palásiu Prezidente Nicolau Lobato, Loron-2 fulan-Jullu: Prezidente-da-Repúblika to’o hikas iha Dili iha loron 30 fulan Juñu hafoin halo nia vizita estadu ba país viziñu Indonézia.

Prezidente-da-Repúblika, Francisco Guterres Lú Olo ho Espoza Cidalia Nobre Mouzinho Guterres ho delegasaun Timor-Leste nian to’o iha Aeroportu Internasionál Nicolau Lobato, Dili, ho aviaun TNI Angkatan Udara Skadron Udara 17, Boeng 737-400 iha oras 14:00 OTL no simu husi Primeiru-Ministru Taur Matan Ruak, membru governu VIII Governu Konstitusionál no funsionáriu Prezidénsia Repúblika nian.

Iha konferensia imprensa, iha salaun VIP Aeroportu Internasionál Nicolau Lobatu,Prezidente-da-Repúblika hato’o nia agradesementu wain ba povu Timor-Leste tomak ne’ebé solidariza Prezidente nia vizita liu husi mensajén wainhira Xefe de Etadu hala’o hela nia knaar iha Jakarta Indonézia.

“Ha’u hakarak manifesta ami nia gratidaun boot teb-tebes ba timor-oan hothotu, ne’ebé kontinua solidariza liu husi mensajen barak ne’ebé hato’o mai ami bainhira sei iha hela Jakarta hodi halo servisu. Ne’e sentidu solidariedade ida que boot tebes-tebes, no mos hanesan apoiu moral e polítiku ida boot teb-tebes ba Prezidente Repúblika, imi nia Prezidente”

Vizita estadu Prezidente Lú Olo ba Repúblika Indonezia nian ne’e hanesan vizita de estadu dahuluk hafoin simu pose iha 20 Maio 2017.

Durante vizita loron rua iha Indonézia Prezidente Repúblika halo atividade prinsipál lubun ida hanesan, Iha loron 28 fulan Juñu, presta omenajen ba erois no martires-da-patria iha semitériu dos erois iha Kalibata, vizita ofisiál ba Palásiu Bogor, hodi hasoru malu ho nia omólogu Joko Widodo ho nia Espoza Iriana Jokowi no iha lokraik vizita ba Institute Agríkula Bogor (IPB-Sigla lia-Indonézia).

Lú Olo taka nia atividade ofisiál iha Repúblika Indonézia hodi vizita ba Parlamentu Indonézia nian iha loron 29 fulan Juñu 2018 no fila mai Dili iha Sabadu, loron 30 fulan Jūnu, tinan 2018.

Media PR