PROKURADÓR JERÁL-da-REPÚBLIKA RELATA SERBISU MENSÁL BA PR

by Mídia PR Posted on

Palásiu Prezidente Nicolau Lobato, Loron-4 fulan-Jullu: Prokuradór Jerál-da-Repúblika José Ximenes hala’o reniaun mensál ho Prezidente-da-Repúblika Francisco Guterres Lú-Olo hodi informa funsionamentu Ministériu Públiku nian durante fulan ida nia laran.

Hahú husi loron-1 to’o 30, fulan-Juñu, Ministériu Públiku rejista no konsege finaliza prosesu krime hamutuk 2.562 ho maioria kazu rejista iha Díli ho prosesu hamutuk 1.300, Baucau 400 resin, Suai 300 no Oecusse mak rejista prosesu krime ho númeru ki’ik liu.

Entre prosesu hirak ne’e, Ministériu Públiku liu husi Prokuradória Distritál Dili, konsege halo ona akuzasaun ba prosesu hamutuk 1400 no arquiva prosesu 1000 resin, iha teritório Timor laran tomak.

Iha sorin seluk, serbisu Gabinete Sentral Kombate ba Kriminalidade Organizada, rejista iha fulan neen nia laran, prosesu hamutuk 96. Husi númeru ne’e, termina ona prosesu hamutuk 47. Husi prosesu hamutuk 47 ne’e, 25 prosesu mak akuzadu no arquiva purvolta 22 prosesu.

Iha sorin seluk Prokuradór Jerál-da-Repúblika hato’o mós nia preukupasaun ba Xefe-de-Estadu kona-ba suspensaun husi Tribunál Rekursu ba sidadaun ida hosi Indonézia ne’ebé komete krime.

“Sidadaun estranjeiru ida husi Alor, Indonésia, hatama ikan illegal dala neen mai Timor-Leste. Oras ne’e iha prisaun preventiva, bainhira dezisaun sai , fo tiha pena ba tinan tolu, suspende ba tinan tolu. Tanba ne’e mak Prokuradória-da-Repúblika la simu dezisaun ne’e, tamba nia asaun ne’e ba dala neen ona. Ita halo rekursu , Tribunál Rekursu altera nia suspensaun ba tinan 10, se nune’e, bainhira desizaun Tribunál Rekursu sai, arguidu halai lakon tiha ona ba fali nia rai”, lamenta Jose Ximenes.

Mídia PR