XEFE ESTADU MAJÓR-JENERÁL HUSU PR FÓ TOMADA-de-POSSE ba MINISTRU DEFEZA

by Mídia PR Posted on

Palásiu Prezidente Nicolau Lobato, loron-26 fulan-Juñu: Xefe Estadu Majór Jenerál Forsas Armadas Majór-Jenerál Lere Anan Timur, Vise Xefe Estadu Brigadeiru-Jenerál Filomeno Paixão no Brigadeiru-Jenerál, Falur Rate Laek hasoru malu ho Prezidente-da-Repúblika Francisco Guteres Lú Olo, hodi hato’o sira-nia preokupasaun kona-ba Ministru Defeza ne’ebé mak oras ne’e seidauk iha.

Iha enkontru ne’e, Major Jenerál Lere Anan Timur hato’o preokupasaun relasiona ho Ministru Defeza ne’ebé seidauk iha tanba iha dokumentus barak ne’ebé presiza asina. Tanba ne’e Xefe-de-Estadu Maior F-FDTL husu atu Prezidente-da-Repúblika bele fó uluk tomada-de-posse ba Ministru Defeza.

Prezidente-da-Repúblika sei konvoka reuniuan Konsellu Superior Defeza no Seguransa iha loron-5 fulan-Jullu, tuku 11 atu foti desizaun relasiona estatutu Vise Xefe Estadu Majór ne’ebé hetan kargu polítiku foun nu’udar Ministru Defeza.

Konsellu Ministru haruka ona karta ba Prezidente-da-Repúblika ba ezonerasaun Vise Xefe Estadu Majór Brigadeiru Filomeno Paixão, antes ezonera nee, Prezidente sei konvoka reuniuan Konsellu Superior Defeza no Seguransa atu rona opiniaun sira.

Filomeno Paixão ne’ebé nomeia nu’udar Ministru Defeza seidauk bele simu tomada-de-posse tanba kestaun administrativa. Ministru Defeza sei simu tomada-de-posse hafoin haloos kestaun administrativa ninian.

Lere Anan Timur informa katak Prezidente-da-Repúblika sei vizita Portugál iha loron-10, fulan-Jullu, tanba ne’e presiza rezolve kestaun refere atu Ministru Defeza bele hala’o ona nia funsaun.

Mídia PR