KONSELLU SUPERIOR DEFEZA no SEGURANSA ASEITA EZONERASAUN FILOMENO PAIXÃO

by Mídia PR Posted on

Palásiu Prezidente Nicolau Lobato, loron-5 fulan-Jullu – Prezidente-da-Repúblika Francisco Guterres Lú Olo prezide reuniaun Konsellu Superior Defeza Seguransa hodi ko’alia kona-ba ezonerasaun Vise Xefe Estadu Maior Forsas Armadas, Brigadeiru Jenerál Filomeno Paixão, atu asume kargu Ministru Defeza iha VIII Governu Konstitusionál.

Reprezenta Chefe Casa Civil Gregório Sousa informa katak iha reuniaun Konsellu Superior Defeza no Seguransa, membru hotu-hotu fó sira-nia votus unanimidade atu ezonera Brigadeiru Filomeno Paixão. Iha tempu badak nia laran Prezidente-da-Repúblika sei hasai Dekretu Prezidensial-da-Repúblika relasiona ho desizaun refere.

Antes ne’e VIII Governu Konstitusionál haruka ona proposta ba Prezidente-da-Repúblika atu ezonera Vise Xefe Estadu Maior, Brigadeiru Jenerál Filomeno Paixão husi nia kargu atuál tanba hetan nomeisaun ba Ministru Defeza iha VIII Governu Konstitusionál.

Konsellu Superior Defeza e Seguransa kompostu husi Prezidente-da-Repúblika Francisco Guterres LúOlo, Primeiru Ministru Taur Matan Ruak, Xefe Estadu Maior Forsa Forsas Armadas, Maijor Generál Lere Anan Timur, Komandante Jerál PNTL Komisáriu Julio Hornay, Ministru Negosiu Estranjeiru e Kooperasaun Dionisio Babo, Ministru Justiça Manuel Carceres, Diretór serbisu Nasionál Intelejensia Manuel Serano, David Diaz Mandati (deputadu FRETILIN), Adérito Hugo da Costa (deputadu CNRT), Abel Pires (deputadu PLP) no Cristina da Silva .

Mídia PR