RAMOS HORTA RELATA NIA SERBISU BA PR

by Mídia PR Posted on

Palásiu Prezidente Nicolau Lobato, Loron- 2 fulan-Jullu: Eis Prezidente-da-Repúblika Dr. Jose Ramos Horta hala’o reuniaun ho Prezidente-da-Repúblika Francisco Guterres Lú Olo, hodi relata nia serbisu sira iha estranjeiru.

Eis Prezidente no Premiadu Nobel ba Pás partisipa iha aktividade internasionál iha Myanmar hodi ko’alia problema ne’ebé nasaun enfrenta, enkontru ho Sekretáriu Jerál ONU iha Finlandia, konsellu altu nivel ba mediasaun no partisipa enkontu ONU nia iha Nova Yorke nu’udar eis Prezidente Komite Altu Nivel ba Oprasaun da Pás ne’ebé partisipa husi polísia mundu tomak nian inklui Komisáriu PNTL Julio Hornay.

Hafoin vizita iha Nova Yorke kontinua, premiadu Nobel da Pás partisipa iha enkontru internasionál iha Korea Sul durante semana ida hodi ko’alia kona-ba peninsula Korea nian.

Ramos Horta informa mós vizita ne’ebé sei halo iha tempu badak, hanesan Alemañha hodi partisipa reuniaun kona-ba problema oi-oin Europeia nian no problema refujiados sira no sei ba Portugal hodi akompaña Prezidente-da-Repúblika Francisco Guterres Lú Olo nia vizita Estadu iha nasaun refere.

Hafoin vizita iha Koreia do Sul, Eis Prezidente-da-Repúblika ne’e, husu ba Xefe-de-Estadu hodi hamutuk ho governu tau matan ba traballadór Timor oan sira ne’ebé serbisu iha Koreia do sul. Husu mós atu haklean liu tan relasaun bilateral ho nasaun ne’e, tamba rai sira iha Asia, Koreia do Sul iha simpatia boot tebes ba Timor-Leste tamba nasaun rua ne’e iha istoria luta ne’ebé hanesan, tanba ne’e iha disponibilidade atu simu tan traballadores timoroan sira.

Eis Prezidente-da-Repúblika ne’e kontente tebes ho vizita estadu husi xefe-de-estadu ba Indonésia ne’ebé Prezidente Repúblika Joko Widodo simu ho di’ak tebes. Ne’e hatudu relasaun Timor-Leste ho Indonésia metin ba beibeik iha futuru.

Sei asuntu balu mak tenki la’o ba oin, hanesan fronteira terestre 2% ne’ebé mak to’o agora seidauk rezolve, e hahu tan negosiasaun kona-ba fronteira Maritima entre Timor ho Indonésia, ajenda ne’e mai tiha ona husi VI no VII Governu Konstitusionál, klaru buat sira nee sei halo hanesan follow up husi governu atuál.

Lidér nasionál na’in-rua ne’e mós ko’alia kona-ba lista membru VIII Governu ne’ebé Prezidente-da-Repúblika sei tetu. Ba kestaun ne’e Horta hatete Prezidente-da-Repúblika laiha kompetensia atu veta, maibé Xefe-de-Estadu iha obrigasaun Konstitusionál atu haree se mak tama iha governu tenki iha integridade para fó kredibilidade ba governu tamba ne’e nia fi’ar Prezidente-da-Repúblika sei kontinua halo dialogu ho Primeiru Ministru para bele hetan dalan ida ba situasaun ida ne’e.