DISKURSU HUSI SUA EXELÉNSIA DR. FRANCISCO GUTERRES LÚ OLO

by Mídia PR Posted on

DISKURSU HUSI SUA EXELÉNSIA DR. FRANCISCO GUTERRES LÚ OLO
PREZIDENTE REPÚBLIKA DEMOKRÁTIKA TIMOR-LESTE
IHA TOMADA-DE-POSSE
DR. FILOMENO PAIXÃO NIAN BA MINISTRU DEFEZA/
VIII GOVERNU KONSTITUSIONÁL

Palásiu Prezidente Nicolau Lobato, Díli, 9 jullu 2018

Sua Exa, Prezidente Parlamentu Nasional, Sr. Arão Noel
Sua Exa, Primeiru-Ministru, Sr. Taur Matan Ruak
Señor Juiz-Prezidente Tribunal Rekursu, Dr. Deolindo dos Santos
Señores Eis-Titulares Órgauns Soberania
Señoras e Señores Deputadus
Señoras no Señores Membrus VIII Governu
Autoridades Relijiozas no Militares
Membrus Korpu Diplomátiku no Konsular
Membrus no kolaboradores Ajénsias Internasionais
Dirijentes no ativistas husi Organizasaun sira husi Sosiedade Sivil
Ha’u nia maun-bin-alin doben sira
Belun sira,

Uluk nanain, ha’u saúda Ministru Defeza ne’e bé ha’u foin fó pose liubá, hatuir proposta mai husi Sua Exelénsia Primeiru-Ministru, Sr. Taur Matan Ruak, tuir Konstituisaun, artigu 106, númeru 2 haruka.

Ha’u saúda mós família Sr. Ministru Defeza ba apoiu ne’ebé fó ba nia to’o ohinloron. Família ne’ e sei fó nafatin apoiu ba nia bele hala’o ho di‘ak ninia misaun nu’udar reponsável prinsipál ba polítika no asaun sira ne’ebé VIII Governu Konstituisionál sei hala’o iha área defeza nian.

Ha’u hato’o mós kumprimentus, ho laran ksolok, ba hothotu iha ne’e, no mós ba maluk timoroan sira ne’ebé la iha ne’e, ne’ebé, liuhusi meiu oioin, testemuña dala ita tan, atu solene ida ne’ebé fó pose ba membru governu Timor-Leste.
Iha loron 22 Juñu liubá, ha’u fó posse ba Xefe VIII Governu Konstitusionál, Sr Taur Matan Ruak no mós ba membru Governu rua nulu resin hitu.

Sr Primeiru-Ministru propoin no ha’u nomeia mós VIII Governu , Sr Kay Rala Xanana Gusmão, nu’udar Ministru Konselleiru ba Primeiru-Ministru no Sr Alfredo Pires, nu’udar Ministru Petróleu, maibé sira nain rua la mosu iha serimónia tomada-de-posse ne’ebé ha’ u preside iha Palásiu Lahane.
La marka prezensa ne’ e la tama iha ha’ u-nia responsabilidade ka kompeténsia konstitusionál, nu’udar Prezidente Repúblika.

Tuir loloos, ohin, ita testemuña mós tomada-de-posse membru na’in tolu tuir mai, ne’ebé ha’u nomeia mós ba VIII Governu Konstitusionál:
– Sr Kay Rala Xanana Gusmão nu’ udar Ministru-de-
Estadu, Konselleiru ba Primeiro-Ministru no Ministru
Planeamentu no Investimentu Estratégiku;
– Sr. Alfredo Pires nu’ udar Ministru Petróleu no Minerais
– Sr. Rogério Araújo Mendonça nu’udar Sekretáriu Estadu
Peskas.

Maibé, Sua Exelénsia, Sr Primeiru-Ministru, fó-hatene ofisialmente katak maluk nain tolu, propostu ba VIII Governu, sei la mai ohin simu posse tanba razaun polítika.

Señor Primeiro-Ministru
Señoras no Señores
Prezidente Repúblika mak guardiaun ba Konstituisaun no tenke foti desizaun tuir Konstituisaun haruka. Desizaun sira ne’ebé ha’u foti, nu’udar Prezidente Repúblika, iha forsa no valór tanba ha’u foti tuir Konstituisaun haruka.

Iha 20 Maiu 2017, ha’ u jura katak ha’u sei kumpri no sei haruka kumpri Konstituisaun no bainhira ha’u simu posse, ha’u mós hato’o ha’u-nia kompromisu atu sai Prezidente hothotu nian no ba hothotu, ba órgaun soberania hothotu no ba ita-nia povu doben. Ohin, ha’u hatete dala ida tan, katak ha’ u sei kaer nafatin ha’u-nia kompromisu ida ne’e to’ o mandatu nia rohan, iha 2022.

Kona-ba ha’u-nia relasaun ho órgaun soberania sira seluk, ha’u kumpri to’o agora no sei kontitinua kumpri prinsípiu separasaun no interdependénsia poderes. Katak órgaun soberania ida-idak iha ninia knaar keta-ketak maibé iha relasaun ba malu. Ita labele hasees husi prinsípiu ida ne’e tamba tama iha ita-nia Konstituisaun. Kona-ba kestaun nomeasaun membrus ba VIII Governu Konstitusionál, ha’u kaer metin prinsípiu ida ne’e no hakarak tebetebes katak ita-nia instituisaun sira funsiona ho di’ak atu ta’u matan ba ita hothotu nia moris di’ak.

Ha’u hanoin katak ohin oportunidade di’ak atu ha’u hatete fila fali katak ha ‘u la veta ema ida husi lista governu ba mandatu tinan lima, ne’ebé Senõr Primeiru-Ministru hato’o mai ha’u.

Ha’u husu de’it ba Señor Primeiru-Ministru atu tetu didia’k ninia proposta nomeasaun ba membrus Gover nu. Ha’u halo ida ne’e, nu’udar Prezidente Repúblika, tanba ha’u mós iha devér atu kontribui ba governasaun di’ak no ba Estadu nia naran di’ak. Ha’u halo mós ida ne’e atu hatán ba ezijensia sira ne’ebé mai husi sosiedade sivíl ne’ebé boot babeibeik: katak membrus Governu tenke ema sériu, la hasoru alegasaun ka akuzasaun katak oinsá de’it sira viola maka’as lei no nune’e, bele hamosu situasaun ida ne’ebé sátan sira-nia knaar konstitusionál, nu’udar membru governu.

Maioria povu la hatene konseitu jurídiku sira, hanesan, prezunsaun inosénsia no sentensa tranzitada-en-julgadu maibé ita-nia ema hatene rekoñese ona sinál sira ne’ebé hatudu korupsaun. Ita-nia povu sente ona katak korupsaun mosu ona iha ita-nia país tomak. Mensájens sosiedade sivíl nian la ko’alia hasoru rezultadu eleisaun antesipada maibé fó-hatene deskonfiansa, katak sira la fiar maluk balun ne’ebé tama iha lista-proposta ba Governu husi Señor Primeiru-Ministru. Hare’e ba situasaun ida ne’e, ha’u, nu’udar Prezidente Repúblika, iha devér atu hare’e oinsá de’it, atu povu labele lakon konfiansa iha ita-nia ukun nain no instituisaun sira. Tuir ha’u-nia hare’e, deskonfiansa ne’e la mosu se ita uza métodu transparente no prevensaun bainhira halo nomeasaun.

Señor Primeiru-Ministru
Señoras no Señores
Membrus Governu ne’ebé la hasoru sátan legál ne’ebé de’it bainhira simu posse mak bele hala’o sira-nia knaar babeibeik durante mandatu tinan lima. Situasaun ida ne’e la’ós fó de’it dalan ba governu tomak ukun tinan lima tuituir malu maibé loke dalan mós ba halo ita-nia ema fó fiar ba VIII Governu.
Ha’u fiar katak Señor Primeiru-Ministru sei halo buat hothotu atu hatama ba Governu maluk sira ne’ebé kredível, efisiente no efetivu, ne’ebé bele garante governasaun transparente no ho susesu iha tinan lima tuir mai.

Señor Primeiru-Ministru
Señoras no Señores
Ha’u fó posse ba maun ida ne’ebé luta hamutuk ho ita ba UKUN-RASIK AN. Maun ida ne’ebé hatudu ninia kualidade iha organizasaun no komandu forsas armadas durante ita-nia luta libertasaun nasional no hafoin restaurasaun independénsia. Komandante ida ne’ebé servisu ho kbiit profisionál hodi haburas F-FDTL – FALINTIL-FORSA DEFEZA TIMOR-LESTE. Nia hala’o servisu barbarak iha Komandu F-FDTL no ohin ita temi liuliu mak ninia kontribuisaun ba konseitu foun estratéjiku militár hodi moderniza ita-nia forsas armadas. Konseitu ida ne’e aprova husi VI Governu Konstitusionál, iha Dezembru 2016.

Señor Ministru Defeza. Ha’u hat’o ohin ita-nia povu ninia rekoñesimentu ba ita-nia dedikasaun ba FALINTIL, F-FDTL no ba kauza nasionál.

Timoroan ida ne’ebé hasai uluk liu kursu promosaun ba ofisiál jenerál, iha Portugal, mSeñor Ministru Defeza, Filomeno Paixão.

Ho knaar difísil ne’ebé nia simu no hala’o dadaun, Señor Ministru Defeza hatudu mós vontade atu estuda no kapasidade atu hetan rezultadu di’ak. Tanba ne’e mak nia konsege duni halo kursu direitu iha Fakuldade Direitu Universidade Nasional Timor Loro Sa’e, iha tinan 2012.

Ohin hahú dezafiu foun ida ba Señor Ministru ninia vida profisionál. Ha’u- hatene katak Ita-Boot sei hatán ba dezafiu ida ne’e ho dedikasaun no entuziasmu nafatin, atu hetan susesu mós iha misaun foun ida ne’e.

Ha’u konta ho Exelénsia atu lori knaar espesiál ida ne’e ba oin nu’udar responsável ida ne’ebé sei haburas no hala’o polítika no lala’ok sira ne’ebé sei kaer metin sobreania ba ita-nia rai furak ida ne’e.

Viva Povu Timorense. Viva Timor-Leste