Palásiu Prezidente Nicolau Lobato, loron-3 fulan-Agostu, ekipa Core Group Transparency Timor-Leste hasoru malu ho Prezidente-da-Repúblika Francisco Guterres Lú Olo hodi hato’o sira-nia apresiasaun ba pozisaun hodi hametin boa governasaun.
Rede organizasaun sosiedade sivíl ne’ebé tau matan ba kestaun transparansia hato’o mós kona-ba harii relasaun entre organizasaun sosiedade sivíl ho Prezidente-da-Repúblika ba asuntu transparansia no boa governasaun.
Reprezentante Core Group Transparency Timor-Leste Juvinal Dias informa mós atu Xefe-de-Estadu kontinua iha komunikasaun di’ak ho lider polítiku sira seluk no rekomenda atu iha futuru ema ida atu ba ukun tenke liuhusi dalan fit and proper test atu nune’e ukun-na’in sira bele tulun povu Timor-Leste sai husi ki’ak ba moris di’ak.
Prezidente-da-Repúblika apresia esforsu serbisu organizasaun sosiedade sivíl ba transparansia nian no iha kompromisu atu serbisu hamutuk ba dezenvolvimentu Timor-Leste ida ne’ebé di’ak liu.
Mídia PR
————