PREZIDENTE-da-REPÚBLIKA LOUVA KOOPERASAUN VETERANUS AUSTRALIA ho TIMOR-LESTE

by Mídia PR Posted on

 

Palásiu Prezidensiál Nicolau Lobato, loron-10 fulan-Setembru tinan-2018: Prezidente-da-Repúblika Francisico Guterres Lú Olo louva kooperasaun veteranus husi Australia no Timor-Leste nu’udar dalan atu hametin relasaun entre nasaun rua.

Iha nia mensajen ba veteranus sira husi Australia, Prezidente-da-Repúblika hateten katak programa Timor Awakening/ Hafanun-an iha Timor hahú rejistra ona rezultadu di’ak laos ba de’it Veteranus Australia maibé mós ba Veteranu Timor-Leste. Programa ne’e presiza apoiu husi ema hotu, liuliu husi Governu Timor-Leste. Liuhusi programa ne’e sei promove fatin istóriku sira hodi nune’e sobrevivente sira mak sei tatoli rasik nia istória no bele hetan istória libertasaun loloos.

Husi grupu Veteranus Australia marka mós prezensa Veteranu Segunda Guerra Mundiál, Alexander Ian Hampel.Prezidente-da-Repúblika haksolok tebes hodi simu Veteranu Segunda Guerra Mundiál Alexander Ian Hampel nu’udar sobrevivente ne’ebé sei moris hodi vizita Timor-Leste. Alexander Ian Hampel partisipa iha operasaun militár no roo ne’ebé uza hetan tiru husi forsa japoneza no mout iha Betano, iha Setembru 1942.

“Ha’u sempre simu Veteranus Austrália ho laran-ksolok tebtebes. Ita-Boot sira-nia prezensa fó-hanoin fila fali mai ha’u, ha’u–nia aman no maluk sira seluk ne’ebé fó kedas apoiu ba forsa Australiana, durante Segunda Guerra Mundial, iha ami-nia rain, atu harii fila fali páz iha mundu,” Prezidente-da-Repúblika hateten.

Prezidente-da-Repúblika hatutan tan katak husi apoiu inkondisionál ne’ebé timoroan sira fó kedas iha Segunda Guerra Mundiál, hatudu katak solidariedade entre ita ema la hatene fronteira no amizade entre povu sira haforsa iha tempu difísil. Biar relasaun direta entre forsa Australiana no timoroan sira ladún kleur, amizade ne’ebé kuda durante Segunda Guerra Mundiál, hametin tiha ona iha tempu ne’ebá. Iha luta libertasaun nasionál, Timor-Leste simu apoiu konsistente no persistente husi eis-Kombatentes barak Segunda Guerrra Mundiál nian no mós husi sira-nia família. Ho lala’ok ki’ik maibé halo beibeik, iha tinan barak nia laran, hamutuk ho komunidade Timorense no ho amigus ne’ebé hetan babeibeik, konsege mobiliza opiniaun públika Australiana hodi apoia povu Timor-Leste ninia hakarak. Ema rihun ba rihun ne’ebé halo manifestasaun iha lurón, iha Setembru 1999, no INTERFET tama iha Timor-Leste, mai husi solidariedade furak no amizade ne’ebé ita harii no hametin ho tempu, hahú kedas no liuliu husi Segunda Guerra Mundiál.

Mídia PR