PREZIDENTE REPÚBLIKA HATO’O BOAS-VINDAS BA VETERANUS AUSTRÁLIA

by Mídia PR Posted on

LIA FUAN BADAK HUSI PREZIDENTE REPÚBLIKA IHA LORON APREZENTASAUN BOAS-VINDAS BA VETERANUS AUSTRÁLIA

Sua Exelência, Sekretáriu Estadu Veteranus, Sr. Gil Oan-Soro

Sua Exelénsia, Embaixador Austrália, Sr Peter Roberts

Senhor Alexander Ian Hamper, Xefe Delegasaun Veteranus Austrália

Senhores Veteranus Austrália

Ha’u-nia doben kompañeiru luta sira iha ne’e.

Ha’u sempre simu Veteranus Austrália ho laran-ksolok tebtebes. Ita-Boot sira-nia prezensa fó-hanoin fila fali mai ha’u, ha’u–nia aman no maluk sira seluk ne’ebé fó kedas apoiu ba forsa Australiana, durante Segunda Guerra Mundial, iha ami-nia rain, atu harii fila fali páz iha mundu.

Husi apoiu inkondisionál ne’ebé maluk timoroan sira fó kedas iha Segunda Guerra Mundial, ita aprende katak solidariedade entre ita ema la hatene fronteira no katak amizade entre povu sira haforsa iha tempu difísil. Biar relasaun direta entre forsa Australiana no timoroan sira ladún kleur, amizade ne’ebé kuda durante Segunda Guerra Mundiál, hametin tiha ona iha tempu ne’ebá.

Iha ita-nia luta libertasaun nasionál, ita simu apoiu konsistente no persistente husi eis-Kombatentes barak Segunda Guerrra Mundial nian no mós husi sira-nia família. Ho lala’ok kiik maibé halo beibeik, iha tinan barak nia laran, hamutuk ho komunidade Timorense no ho amigus ne’ebé ita hetan babeibeik, ita konsege mobiliza opiniaun públika Australiana hodi apoia povu Timor-Leste ninia hakarak. Ema rihun ba rinhun ne’ebé halo manifestasaun iha liurón, iha Setembru 1999, no INTERFET tama iha Timor-Leste, mai husi solidariedade furak no amizade ne’ebé ita harii no hametin ho tempu, hahú kedas no liuliu husi Segunda Guerra Mundial.

Ho haksolok boot tebtebes mak ita simu ohin, iha ita-nia país livre no independente, veteranu ida ho otas boot liu, husi Austrália, husi grupu veteranus ne’ebé mai Timor-Leste, iha Segunda Guerra Mundiál, Senhor Alexander Ian Hampel, sobrevivente mesak ne’ebé sei moris, se ha’u la sala, husi roo ne’ebé hetan tiru husi forsa japoneza no mout iha Betano, iha Setembru 1942. Nia vizita Timor-Leste ho ona otas 95 no ida ne’e iha signifikadu espesiál tebtebes ba faze ohinloron rekonstrusaun país nian. Ita hatene katak vizita ida ne’e sei dada liután veteranus Australianus no sira-nia família no mós Australianu sira seluk atu tulun ita-nia rain, liuhusi dalan oioin. Ha’u nota katak iha grupu ne’e, iha mós veteranus Segunda Guerra Mundial sira-nia oan. Señor Bruce Hampel, veteranu Alexander Hampel nia oan, señora Ashleigh Sherwood, veteranu Cameron nia oan-feto. Mai mós senhor Michael Batchelor, veteranu Segunda Guerra Mundial nia aman, no mós veteranu ida husi Finlândia, señor Ari Wekku Saaski no veteranu ida husi Suécia, señor Jorgen Sellberg.

Vizita ida ne’e husi Veteranus Austrália tama iha programa Timor Awakening / Hafanun-an iha Timor. Ita hahú rejista ona rezultadu di’ak husi programa ne’e, la ós ba Veteranus Austrália de’it, maibé ba Veteranus Timor-Leste mós.

Ita hothotu tenke apoia Programa ne’e, liuliu Governu Timor-Leste, tamba Programa ne’e la’ós fó benefísiu diretu de’it ba veteranu sira, maibé, lala’ok oioin ne’ebé hala’o husi Programa ne’e, sei ajuda haburas Turismu Históriku lalais liu. Hare’e ba ezemplu Labalou/Loi Huno, iha Viqueque, ita tenke haburas mós fatin históriku sira seluk no tenke halo lalais liu, atu sobrevivente sira  mak tatoli rasik no ita bele hetan ita-nia istória libertasaun loloos.

Ha’u aproveita oportunidade ida ne’e hodi saúda veteranus no amigus Australianus ne’ebé ajuda iha tempu difísil luta libertasaun nasional no mós sira ne’ebé servisu iha Timor-Leste no sira seluk ne’ebé hatutan nafatin solidariedade ba ita, iha sira-nia hela fatin.

Obrigadu.

 

Dili, 10 Setembru 2018