PREZIDENTE-da-REPÚBLIKA SAI PATRONU UNE-TL

by Mídia PR Posted on

Palásiu Prezidente Nicolau Lobato, Terça-feira loron-11 fulan-Setembru`: Prezidente-da-Repúblika Francisco Guterres Lú Olo iha serimonia investidura simu kargu nu’udar patronu ba União Nacional dos Escuteiros de Timor-Leste (UNE-TL).
Iha serimónia investidura, Prezidente-da-Repúblika informa katak nu’udar patronu ba UNE-TL ne’e sei hamutuk ho estrutura no membrus tomak hodi haburas liután organizasaun ne’e durante mandatu nu’udar Xefe-de-Estadu.

Iha nia diskursu Prezidente-da-Repúblika hateten: “Ha’u sei buka fó tulun ba organizasaun ne’e, tuir dalan oinsá de’it, no promove organizasaun ne’e, iha rai-laran no rai-liur. Ha’u hein katak, ho lala’ok oioin, organizadu no ho lideransa di’ak nafatin, ita bele dada tama eskuteiru foun barak liután, ne’ebé sei sai sidadaun no líder responsável.”

Prezidente-da-Repúblika rekoñese katak Organizasun ne’e foin harii tinan sanulu resin tolu liubá maibé halo ona lala’ok barak ne’ebé hatudu dedikasaun tomak atu eduka labarik no joven sira atu sai sidadaun responsável , iha aspetu hothotu: ba sira-nia an rasik, ba sira-nia família rasik, ba ita-nia povu tomak, ba ita-nia rai doben Timor-Leste no mós ba komunidade internasionál.

Prezidente-da-Repúblika apresia inisiativa UNE-TL ne’ebé mak hala’o atividades hodi halo reflorestasaun ka kuda ai-oan iha fatin balu ne’ebé prezija. Atividades ne’e sai mós komprimisiu polítika Prezidente-da-Repúblika nian, oinsa fó atensaun ba meiu-ambiente no dezenvolvimentu sustentável.

Prezidente-da-Repúblika sei hamutuk ho entidade kompetente, inklui organizasaun sosiedade sivíl, hanesan UNE-TL no sira seluk, atu kuda ai-oan tokun 1 durante nia mandatu nu’udar Prezidente-da-Repúblika tuir kompromisu polítiku hodi fó atensaun ba kestaun sira ne’ebé iha ligasaun ho meiu-ambiente no dezenvolvimentu sustentavel.

Hanesan patronu, Xefe-de-Estadu, husu ba UNE-TL atu hatutan ninian kompromisu importante sira ba ema seluk atu bele kompriende: halibur Povu tomak, sei la hare’e ba ema ida-idak ninia partidu, ninia estatutu sosiál no ekonómiku, relijiaun, etnia ka rasa, sei sai Prezidente hotu-hotu nian no ba ema hotu; sei la haluha no sei la hasees ema ne’ebé de’it ka grupu ne’ebé de’it no sei fó atensaun ba kestaun sira ne’ebé iha ligasaun ho meiu-ambiente no dezenvolvimentu sustentável.

Mídia PR