PREZIDENTE-DA-REPÚBLIKA APELA ATU HAMUTUK BUKA SOLUSAUN

by Mídia PR Posted on

Palásiu Prezidensiál Nicolau Lobato, loron-13 fulan-Setembru tinan-2018. Prezidente-da-Repúblika Francisco Guterres Lú Olo haksolok hodi simu xefe bankada no membru Aliansa Mudansa ba Progresu(AMP) no UDT nian hodi ko’alia kona-ba lista membru Governu ne’ebé pendente.

Portavoz ba Bankadas AMP no atuál vise xefe bankada Partidu Libertasaun Populár (PLP), Francisco Vasconcelos hato’o preokupasaun kona-ba lista pendente ba membru Governu na’in-sia ne’ebé seidauk simu tomada-de-posse sei fó impaktu boot ba ezekusaun Orsamentu Jerál Estadu 2018 ne’ebé foin lalais aprova iha Parlamentu Nasionál.

Prezidente-da-Repúblika informa katak laiha problema ida ne’ebé laiha solusaun. Solusaun ba problema tenke mai husi koridór estadu ninian. Prezidente-da-Repúblika hamutuk ho Primeiru Ministru halo dialogu hela oinsá bele ultrapassa problema ida ne’e. Prezidente-da-Repúblika husu atu líder sira iha AMP tulun Primeiru Ministru hodi hamutuk ho Xefe-de-Estadu solusiona situasaun polítika ne’ebé nasaun enfrenta.

Francisco Vasconcelos informa katak pozisaun AMP mak kontinua buka solusaun liuhusi dalan diálogu, tanba laiha problema ida mak laiha nia solusaun. Tamba Timor-Leste hatudu ona nia kapasidade hodi rezolve problema hotu tanba ne’e laiha problema ida mak la iha solusaun. Portavoz ne’e hatutan tan katak troka membru Governu pendente ne’e kompeténsia Governu ninian maibé bankada AMP mai fó hanoin oinsá líder sira buka solusaun ba problema atu prosesu dezenvolvimentu la’o ba oin.

Francisco Vasconcelos informa mós katak vizita Prezidente-da-Repúblika ba tasibalun nu’udar aktu importante hodi reprezenta nasaun atu sai mensajeiru ba pás no hatudu ba mundu katak maski nasaun foun maibé iha kbiit rasik atu ultrapassa nia dezafiu sira.

Prezidente-da-Repúblika hato’o katak vizita ba tasibalun importante maibé Parlamentu Nasionál mak iha kompeténsia atu deside.

Relasiona ho Orsamentu Jerál Estadu 2018 ne’ebé Parlamentu Nasionál aprova, Prezidente-da Repúblika informa katak sei estuda hela

no sei ezerse nia mandatu konstitusionál.

Líder bankada ne’ebé halo audiénsia ho Prezidente-da-Repúblika mak Duarte Nunes no Maria Teresinha Viegas (CNRT), Cornelio Gama no Francisco Vasconcelos (PLP), António Tilman no Olinda Guterres (KHUNTO) no Gilman Santos (UDT).