PREZIDENTE-da-REPÚBLIKA SEI HATO’O NIA DESIZAUN BA PÚBLIKU

by Mídia PR Posted on

Palásiu Prezidente Nicolau Lobato, Sesta-feira loron-14 fulan-Setembru Bankada Parlamentár FRETILIN hasoru malu ho Prezidente-da-Repúblika Francisco Guterres Lú Olo hodi informa posizaun FRETILIN nian ne’ebé foti iha Parlamentu Nasionál durante debate Orsamentu Jerál Estadu tinan-2018.

Bainhira remata reuniaun ho Prezidente-da-Repúblika, Xefe Bankada Parlamentar FRETILIN Aniceto Guterres hatete katak pontu esensiál ne’ebé hato’o ba Xefe-de-Estadu mak FRETILIN nia preokupasaun sira kona-ba polítika fiskál no dívida laos finanseira iha Orsamentu Jerál Estadu tinan-2018.

“Kuandu debate (OJE 2018) , iha deklarasaun polítika FRETILIN afirma tiha ona hanesan preokupasaun kona-ba polítika fiskál e preokupa mós ba dívida laos finanseira ne’ebé to’o agora ita lahatene nia totál ne’e hira, nia orijin ne’e hira, e projetu sira ne’e ejiste duni ka la’e. Sa tan ninia kualidade ita lahatene, to’o agora laiha informasaun, ne’e preokupa tebes”.

Aniceto Guterres hatete, Prezidente-da-Repúblika mak iha kompeténsia ne’ebé konstituisaun fó atu promulga ka la promulga orsamentu ne’e, iha Konstituisaun Prezidente-da-Repúblika iha loron-30 hodi estuda orsamentu refere molok foti desizaun.

Orsamentu Jerál Estadu tinan-2018, ne’ebé hato’o husi Parlamentu Nasionál, Prezidente-da-Repúblika simu ona, no presiza tempu atu estuda orsamentu refere no sei foti desizaun.

Prezidente-da-Repúblika informa katak bainhira foti ona desizaun relasiona ho Orsamentu Jerál Estadu tinan-2018 sei ofisialmente fó-sai liuhusi mensajen ba públiku atu povu hotu bele akompaña.

Bankada Parlamentár FRETILIN hasoru malu ho Prezidente-da-Repúblika ohin, kompostu husi, xefe bankada, Aniceto Longuinhos Guterres Lopes, Vise Prezidente na’in-rua: Deputadu Francisco Miranda Branco no Deputada Josefa Alvares Perreira.

Mídia PR