PREZIDENTE-da-REPÚBLIKA NIA MENSAJEN BA PARLAMENTU NASIONÁL no NASAUN NOMEIASAUN MEMBRU GOVERNU

by Mídia PR Posted on

 

“Iha ha’u-nia mandatu to’o ohinloron, nu’udar Prezidente Repúblika, ha’u sempre foti desizaun polítika atu garante sidadaun sira partisipa iha vida polítika no kaer metin funsionamentu demokrátiku Estadu nian, tuir ita-nia Lei inan, Konstituisaun Repúblika, no lei sira seluk.

Ha’u hatuir ita-nia lei sira bainhira kontribui ba harii VII Governu Konstitusionál, hafoin eleisaun 2017, bainhira ha’u disolve Parlamentu Nasional no bainhira ha’ u marka eleisaun lejislativa, iha 2018, no mós ho formasaun VIII Governu Konstitusionál.

Ho mós dever hatuir loloos ita-nia lei sira mak ha’u, nu’udar Prezidente Repúblika, ho kbiit ne’ebé Konstituisaun Repúblika fó, ha’u nomeia General Taur Matan Ruak, nu’udar Primeiru-Ministru, indijita husi koligasaun partidus ne’ebé manán eleisaun lejislativa 2018. Tuir mós Konstituisaun Repúblika, ha’u nomeia no fó posse ba membrus Governu ne’ebé Primeiru-Ministru propoin, no nune’e, ha’u garante VIII Governu Konstitusionál harii kedas atu hahú hala’o ninia knaar.

Ho regra hanesan no ho sentidu Estadu mak ha’u halo diálogu ho laran nakloke no moos ho Primeiru-Ministru, kona-ba nomeasaun no fó posse ba membrus Governu sira seluk. Tuir prosedimentu konstitusionál, Primeiru-Ministru mak propoin membrus Governu no Presidente Repúblika mak nomeia no fó posse. Tuir Konstituisaun Repúblika, Primeiru-Ministru de’it mak iha kbiit atu propoin no Prezidente Repúblika de’ it mak bele nomeia no fó posse. Nune’e, iha prosesu hili membrus Governu, ita bele haree katak Konstituisaun Repúblika fó dalan ba Prezidente Repúblika no Primeiru-Ministru atu tetun hamutuk kandidatu sira, molok sira kaer sira-nia knaar, nu’ udar membru Governu ba tinan lima.

Husi lista-proposta ho naran hat nulu resin tolu, hato’o husi Primeiru-Ministru, ha’u nomeia no fó posse ona ba membrus Governu tolu nulu resin rua. Hare’e ba ita-nia relasaun ho responsabilidade institusionál, ha’u la kompreende tambasá mak membru tolu ne’ebé propoin husi Primeiru-Ministru no ha’u nomeia ona, lakoi simu posse!

Ha’u hatete fila fali iha ne’e ha’u-nia hanoin, ne’ebé ha’u hato’o ona ba Primeiru-Ministru, iha ami-nia diálogu, ne’ebé ha’ u halo nafatin ho laran nakloke no moos. Katak ha’u husu atu sukat didiak kandidatu sira ne’ebé Primeiru-Ministru propoin maibé ha’u seidauk nomeia.

Tuir ita-nia Konstituisaun, la iha ema ida mak bele interfere no halo presaun ka ezije ba titulár ne’ebé de’it husi órgaun soberania sira kona-ba sira-nia kbiit konstitusionál. Importante ba hothotu, maibé hothotu duni, atu kompreende momoos, liuliu líderes husi partidu polítiku sira, Deputadus no Membrus Governu katak, sidadaun hothotu, tenke respeita liberdade ne’ebé Konstituisaun fó ba Prezidente Repúblika atu foti desizaun polítika kona-ba nomeasaun membrus Governu ne’ebé propoin husi Primeiru-Ministru. Prezidente Repúblika foti desizaun hafoin sukat klean no hatene loloos ona katak sei proteje interese nasional no Estadu nian, tuir lei haruka. Interese pesoál ka polítiku-partidáriu la tama iha ha’u-nia desisaun, nu’udar Prezidente Repúblika, atu nomeia ka la nomeia membrus Governu propoin husi Primeiru-Ministru.

Ha’u fiar katak, liuhosi diálogu entre Prezidente Repúblika no Primeiru-Ministru, ne’ebé hala’o iha ambiente polítiku ida ne’ebé ami nain rua hare’e hamutuk oinsá serve di’ak liu ita-nia Povu no Nasaun, tuir órgaun soberania no titulár ida-idak ninia kompeténsia, ami nain rua bele hetan kandidatu seluk ne’ebé ha’u bele nomeia no fó posse atu kompleta VIII Governu Konstitusional. Prosedimentu ida ne’e la sees husi ita-nia Konstituisaun no lei sira seluk.

Hare’e ba ha’u-nia kbiit konstituisionál, ha’ u halo buat hothotu atu diálogu ne’e iha susesu, la’ós de’it ba ohinloron maibé ba períodu mandatu tomak Governu ida ne’e nian.

 

Ita labele haluha katak Governu tomak, ne’ebé xefia husi Primeiru-Ministru, tenke hatán ba Parlamentu Nasionál no tenke hatán mós ba Prezidente Repúblika. Tamba Governu tenke hatán ba Prezidente Repúblika, ha’u sei tau aas ha’u-nia relasionamentu ho Primeiru-Ministru, nu’udar Xefe Governu. Tamba ne’e, mak semana-semana, ami nain rua hetan malu no haburas relasaun institusionál, liuhosi diálogu, oin ba oin, ami nain rua de’it, iha Palásiu Prezidensiál Nicolau Lobato.”