PREZIDENTE-DA-REPÚBLIKA PROMOVE DIALOGU NO HUSU ATU DIVERSIFIKA EKONOMIA

by Mídia PR Posted on

Palásiu Prezidensiál Nicolau Lobato, loron-17 fulan-Setembru tinan-2018.

Prezidente-da-Repúblika Francisco Guterres Lú Olo Iha mensajen daruak ba nasaun iha Parlamentu Nasionál, apela atu partidu polítiku sira promove diálogu hodi hetan konsensu no husu ba orgaun estadu sira serbisu ba diversifikasaun ekonomia.

Relasiona ho situasaun membru Governu na’in-sia ne’ebé seidauk simu tomada-de-posse, Prezidente-da-Repúblika fiar: “Husi diálogu entre Prezidente-da-Repúblika no Primeiru Ministru ho ambiente polítiku ida hodi serve di’ak liu ba povu no nasaun bele hetan kandidatu seluk ne’ebé bele nomeia no fó posse atu kompleta VIII Governu Konstitusionál.” Ho kbiit konstitusionál ne’ebé iha, Prezidente-da-Repúblika sei halo buat hotu-hotu atu diálogu sai susesu, laos de’it ba ohin loron maibé ba periodu mandatu tomak VIII Governu Konstitusionál.

Prezidente-da-Repúblika ko’alia mós kona-ba responsabilidade, interdependensia no relasaun institusionál atu orgaun estadu hotu-hotu servi de’it ba interese aas Estadu no Nasaun, laos interese grupu ka partidu nian.

Iha nia mensajen ba nasaun, Prezidente-da-Repúblika tau enfaze ba dezenvolvimentu ekonómia atu estadu labele depende de’it ba rekursu ida, tanba minarai no gás rekursu la renovavél, loron ida sei maran. Tuir Xefe-de-Estadu, kresimentu ekonomia nasionál ohin loron iha relasaun maka’as ho volume despezas públikas no sektór privadu ne’ebé sei fraku tebetebes. Dezenvolvimentu ohin loron sai dependente ba finansas públikas. Tanba ne’e, presiza tebes atu atinji dezenvolvimentu sustentavél presiza harii kondisaun sira ne’ebé bele fasilita ekonomia deiversifikada no sustentavél. Dezenvolvimentu sustentavél tenke mai husi kbiit rasik no oinsá uza rekursus renovaveis.

Prezidente-da-Repúblika foti mós kona-ba kestaun dezempregu tanba Timoroan barak ohin loron ne’ebé iha kapasidade atu serbisu hodi produz buat ruma atu hetan rendimentu rasik, la hetan oportunidae atu serbisu. Tanba presiza atu haree intervensaun husi Estadu atu laos ‘diet hasa’e despeza públika maibé mós hamenus despeza públika, dalan ida mak liuhusi diversifika ekonomia nasionál no dezenvolve setór privadu. Atu halo ne’e, Prezidente-da-Repúblika apela atu orsamentu tenke ekilibradu no tau atensaun boot ba ema.

Mobilizasaun ba jerasaun foin-sa’e atu promove no hametin kultura pás no hasees sosiedade husi violénsia sai nu’udar pontu importante ida. Prezidente-da-Repúblika lansa ideia Servisu Síviku Nasionál ba foin-sa’e nu’udar dalan ba tranzmisaun, sosializasaun, formasaun no ensinu no aprendizajen.

Prezidente-da-Repúblika apela atu entidade hotu-hotu luta hasoru korupsaun no kapasita an atu hala’o governasaun di’ak liuhusi harii sistema efisiente, promove transparénsia, hala’o investigasaun kriminál no julgamentu ba kazus korupsaun.

Rohan