PRIMEIRU MINISTRU INFORMA SERBISU GOVERNU

by Mídia PR Posted on

Palásiu Prezidente Nicolau Lobato, Kinta-feira loron-20 fulan-Setembru Primeiru Ministru Taur Matan Ruak, hala’o reuniaun semanál ho Prezidente-da-Repúblika Francisco Guterres LúOlo, hodi informa serbisu Governu nian relasiona preprativus Orsamentu Jerál Estadu tinan-2019 no mós orsamentu Jerál tinan-2018 ne’ebé mak oras ne’e iha ona Prezidente-da-Repúblika nia meza atu estuda hodi foti desizaun.

Ba membru Governu ne’ebé seidauk hetan tomada-de-posse, Primeiru Ministru hateten katak sei kontinua ko’alia no Prezidente-da-Repúblika atu hetan solusaun.

Prezidente-da-Repúblika iha nia mensajen ba Parlamentu Nasionál no Nasaun ne’ebé hato’o iha loron-17 fulan-Setembru hateten katak sei kontinua diálogu ho Primeiru Ministru hodi buka solusaun tuir ida-idak nia kompeténsia no bele hetan kandidatu seluk hodi nomeia no fó posse.

Primeiru Ministru hateten katak desizaun atu muda ka troka membru governu ne’ebé pendente ne’e sei depende konsensu iha AMP, maibé to’o agora seidauk iha alterasaun husi AMP ba membru Governu ne’ebé pendente. Maibé, nu’udar Primeiru Ministru sei kontinua ko’alia ho Prezidente-da-Repúblika ho pasiensia hodi bele solusiona situasaun polítika ne’e.

Mídia PR