KOMUNIKADU IMPRENSA PREZIDENTE-da-REPÚBLIKA HAKOTU APLIKASAUN REJIME DUODÉSIMÁL

by Mídia PR Posted on

 

 

Palásiu Prezidensiál Nicolau Lobato, loron-27 fulan-Setembru tinan-2018

Prezidente-da-Repúblika Francisco Guterres Lú Olo hakotu aplikasaun rejime duodésimál liuhusi promulgasaun Lei No. 2/V Orsamentu Jerál Estadu 2018.

Tuir Konstituisaun RDTL artigu 88 fó kbiit ba Prezidente-da-Repúblika atu iha prazu loron tolu-nulu nia laran promulga ka uza direitu veto ba diploma lejislativu ne’ebé simu husi Parlamentu Nasional iha loron-11 fulan-Setembru. Maski sei falta semana rua atu kompleta loron tolu-nulu tuir Konstituisaun haruka, Prezidente-da-Repúblika deside atu promulga antes.

Prezidente-da-Repúblika halo promulgasaun ba Orsamentu Jerál Estadu 2018 ho montante $ 1.277,4 miloens ho razaun sira: laiha fundamentu ruma atu halo pedidu fiskalizasaun preventiva, selu empreza atu kria kampu servisu atu hasa’e ekonómia iha ra-laran, fasilita estadu tama iha ezekusaun orsamentál normál hodi kumpre obrigasaun prioritárias hanesan sidadaun vulnerável, Veteranus, Bolsa da Mãe, tusan ba ospitál iha rai-li’ur no mina ba jeradór.

Biar nune’e, Prezidente-da-Repúblika hato’o dezafiu sira ne’ebé hasoru ho promulgasaun Orsamentu Jerál Estadu. Prezidente-da-Repúblika levanta kapasidade ezekusaun ne’ebé ki’ik relasiona ho tempu limitadu tebes no taxa ezekusaun orsamentu desde 2012-2017 kuaze pursentu 79 de’it, alokasaun orsamentu ne’ebé barak liu ba infraestrutura no ladun tau osan ba edukasaun no saúde. Alokasaun orsamentu makaas ba projetu Tasi Mane maski seidauk hatene loloos saida mak sei akontese ho Greater Sunrise.

Prezidente-da-Repúblika husu atu orgaun kompetente sira atu hatoman-an gasta osan ho kuidadu hodi la repete prátika gastus la nesesáriu. Liuhusi investimentu di’ak mak bele lori Fundu Minarai laos de’it ba jerasaun ohin loron mak goza maibé mós ba jerasaun tuirmai.

Prezidente-da-Repúblika mós husu atu Governu halo ezekusaun despeza públika ho rigor tanba tempu ezekusaun ne’ebé badak tebes no previzaun makroekonómiku halo ho di’ak no tuir realidade, selu kotu tusan atu labele monu tan ba tusan seluk, harii Komisaun Inkéritu Parlamentar atu halo prosesamentu pagamentu bele tuir dalan ne’ebé loos, transparante no rigor, Governu no Parlamentu Nasionál hadi’ak kestaun normativa no regulamentár atu bele artikula ho di’ak liután Lei Fundu Minarai, Lei Orsamentu no Jestaun Finanseiru ne’ebé iha ligasaun ho reseitas.

Prezidente-da-Repulika apela mós ba orgaun kompetente atu orsamentu iha futuru tenke iha ekilíbru ho alokasaun justu entre dezenvolvimentu umanu no dezenvolvimentu fíziku no hatun graduál despeza labele boot liu reseitas, investimentu lori retornu sosiál no ekonómiku, hatuur as prinsípiu sustentabilidade Estadu no sosiedade, hasa’e reseita doméstika ho hatun dependénsia ba Fundu Minarai.

Prezidente-da-Repúblika husu atu Parlamentu Nasionál hatene natureza meius modernu komunikasaun sosiál tanba halo análize no promulgasaun Lei Orsamentu Jerál Estadu nu’udar knaar konstitusionál Prezidente nia ne’ebé bele halo iha rai-laran no iha rai-li’ur durante viajem ofisiál ka traballu. Tanba ne’e, lalika uza argumentasaun ne’ebé ignora ka distorsa realidade ne’e.

 

 

Rohan