DISKURSU HUSI SUA EXELÉNSIA PREZIDENTE REPÚBLIKA DR. FRANCISCO GUTERRES LÚ OLO IHA ANIVERSÁRIU DEKLARASAUN UNIVERSAL KONA-BA DEMOKRASIA BA DALA 21

by Mídia PR Posted on

Ministério Finansas

Dili, 3 Outubru 2018

 Exeléncias,

Señor Prezidente  Parlamentu Nasional

Señores Exis-Titulares Órgauns Soberania

Señoras no señores Deputadus

Señoras no señores Membrus  VIII Governu Konstitusional

Señores membrus Korpu Diplomátiku

Distintus Reprezentantes  Organizasoens  Sosiedade Sivil

Distintus konvidadus

Ha’u agradese  Sua Exa Prezidente Parlamentu Nasional, Sr. Arão Noé tamba convida ha’u loke Konferénsia ida ne’e, ne’ebé foin marka, iha Timor-Leste, ba dahuluk, Deklarasaun Universal kona-ba Demokrasia, asina tinan rua nulu resin ida liubá, iha sidade Cairo, Egipto, husi reprezentantes rai atus ida rua nulu resin ualo nian. Asina mós Deklarasaun ne’e País sira husi PCLP, hanesan Angola , Cabo Verde, Guiné-Bissau , Portugal no  Moçambique.

Ho  haksolok mak ha’u partisipa dala ida tan iha eventu ida organiza husi Parlamentu Nasionál, ne’ebé hahú lao horiuliuk hanesan Asembleia Konstituinte, ita-nia Uma Demokrátiku primeiru, hafoin referendu 1999 no molok ita restaura ita-nia independénsia, iha 20 Maiu 2002.

Ha’u hetan priviléjiu  boot ida tamba ha’u mak lidera Asembleia Magna husi 15 Setembru 2001 to’o 20 Maiu 2002, knaar ne’ebé hariku ha’u-nia esperiénsia husi tinan barak Luta Libertasaun Nasionál  nian kona-ba arte buka konsensu, atu hetan objetivu estratéjiku ne’ebé hothotu hakarak.

Iha fulan neen nia laran, hamutuk ho kolega-deputadu ne’ebé mai husi diversidade ida ho pozisionamentu polítiku liu sanulu resin, diversidade ida ne’ebé aas liu bainhira ita sukat ho mandatu sira seluk,  iha konsege uza Uma-Fatin Demokrátiku ida ne’e,  nu’udar espasu ida ba konsensu maibé tanen nafatin diversidade. La’ós fásil koordena no akomoda hanoin oioin husi deputadu ualo nunu resin ualo kona-ba norma prinsipál sira ba ita-nia Timor-Leste livre no independente.

Maibé ita konsege duni. Ita konsege tamba ita haree katak iha nesesidade atu tuur hamutuk atu harii lalais riin dahuluk boot no importante ida hodi tanen ita-nia Estadu: Konstituisaun Repúblika Demokrátika Timor-Leste.

Ita aprova iha 22 marsu 2002, Konstituisaun moderna ida ne’ebé podér sira ( Órgaun Estadu sira)  iha  ekilíbriu, ho mekanismu sira atu kontrola poder polítiku, órgaun Estadu ida-idak ninia responsabilidade rasik, hatuur prinsípiu separasaun no interdependénsia ba podér sira no regras dempkrátikas. Konstituisaun ne’e konsagra mós direitu umanu hothotu no kbiit tomak /soberania ba povu.

Obra ida ne’e, ne’ebé mai husi ita hothotu, liuliu husi esforsu Timoroan sira-nian, mak loke dalan ba ita harii Estadu modernu ida. Ita hothotu tenke orgulla tamba deputadu ualo nulu resin ualo, reprezentantes Povu  nian, hatene tau ba soren sira-nia hanoin polítiku-partidáriu no hatudu sira-nia maturidade polítika no matenek atu foti aas objetivu estratéjiku ne’ebé ita hothotu hakarak. Konstituisaun ida ne’e reprezenta vontade koletiva ida, ita hothotu ninia hakarak atu tanen mós ezijénsia sira husi sosiedade moderna no Komunidade País Livre sira-nian, iha mundu tomak. Ha’u agradese ba hothotu ne’ebé tulun ita iha knaar boot ida ne’e.

Hafoin restaurasaun independénsia, ha’ u hetan fila fali priviléjiu atu lidera Parlamentu Nasional, susesór Assembleia Konstituinte nian, to’o 30 Jullu 2007, loron ne’ebé saudozu Sr Fernando Lasama simu ha’u-nia knaar, nu’ udar Prezidente Parlamentu.

Vídeo ne’ebé ita foin hare’e, fó-hatene susesu sira ne’ebé ita-nia Parlamentu Nasional hetan ona.  Husi 2002 to’o ohinloron, ita-nia órgaun Estadu ida ne’e aprova ona lei sira ne’ebé tanen Estadu, hamutuk atus ida hitu nulu resin lima. Aprova ona mós rezolusaun  atus tolu sanulu resin neen. Vitória  sira ne’e pertense ba ita hothotu, nu’udar sidadaun  rai ida ne’e nian no ita presiza fó-hatene ba komunidade internasionál.

Ha’ u haree iha programa katak líder istóriku sira sei halo parte painél ba sub-tema Konferénsia ida ne’e nian no ha’ u fiar katak sira sei hato’o sira-nia koñesimentu no prespetiva kona-ba ita-nia Demokrasia ne’ebé lao hela no sei leno dalan ba ita hothotu atu haree saída loos mak ita tenke halo ba oin, atu ita-nia Povu bele fiar nafatin iha ita-nia instituisaun sira no ita-nia polítiku sira, ne’ebé reprezenta Povu iha Parlamentu Nasional.

Konferensista sira sei rona mós oradór internasionál sira ne’ebé mai too iha ne’e atu fahe ba ita sira-nia esperiénsia no koñesimentu iha área Demokrasia no nune’e hamanas liután ideál ida ho valores komúns ne’ebé ita hothotu tanen. Demokrasia ne’e la´ós hatuur hakmatek de’it maibé ita bele hafoun babeibeik .

Señoras no señores

Ho orgullu nio laran-haksolok mak ha’u afirma ohin, iha ne’e, ba belun sira ne’ebé tulun harii no hametin ita-nia Estadu, katak demokrasia lao duni ba oin iha Timor-Leste. Katak ita timoroan la sente mesak ona, tamba ita-nia vontade koletiva hatuir mós Komunidade País livre sira-nian. Buat hothotu ne’ebé ita hakarak hametin iha ita-nia rai kiik ida ne’e, tanen dalahuluk Povu ninia hakarak maibé tanen mós dokumentu internasional importante sira, hanesan Karta Nasoens Unidas no Deklarasaun Universal Direitus Umanus no Deklarasaun Universál kona-ba Demokrasia ne’ebé ohin ita fó-hanoin ninia aniversáriu ba dala rua nulu resin ida, iha Pátria Nicolau Lobato nian.

Bainhira ita afirma-an nu’ udar Povu no Nasaun, iha 28 Novembru 1975, ita halo liuhusi vanguarda ida, FRETILIN, ho Konstituisaun simples ida ne’ebé haree ba sirkunstánsia polítika iha tempu ne’ebá.

Ita deklara mesamesak de’ it, la iha rai seluk asiste, iha ambiente ida ne’ebé ita hamriik ho sentimuntu oioin.

Ita deklara iha époka ida ne’ebé ema oituan de’ it mak fiar katak povu bele tanen  funu kleur ida, katak ita bele simu sakrifísiu ne’ebé de’ it, katak ita bele hetan  ita-nia objetivu estratéjiku boot neébé ita hopthotu hakarak: ita-nia independénsia nasionál.

Bainhira ita afirma-an ba dalahuluk, nu’udar Povu no Nasaun, rai liu saunu resin de’ it mak rekonese ita-nia independénsia;  lima husi Áfrika, ne’ebé iha pasadu istóriku-

kulturál hanesan ita-nian: Moçambique, Angola, Guiné-Bissau, Cabo Verde e São Tomé e Príncipe.

Iha ita-nia prosesu libertasaun nasionál, naruk no ho laran-susar, ita buka hamutuk hadia ita-nia hanoin no ita organiza-an fila fali, liuhusi forma oioin maibé ita hothotu simu orientasaun husi Komandu Luta polítiku-militar ida de’ it. Nu’udar FRETILIN ka liuhusi dalan sira seluk, ne’ebé ikusmai Rezisténsia hakoak liután ita-nia ema, hanesan CRRN/ Conselho Revolucionário de Resistência Nacional, iha 1981, hanesan CNRM – Conselho Nacional da Resistência Maubere, iha 1987 no hanesan CNRT, Conselho Nacional da Resistência Timorense, iha 1998, ita hakruuk ba Komandu ida de ‘it. Ida ne’e ezijénsia

luta nian. Ita iha direitu atu fó-hatene ita-nia hanoin rasik maibé sirkunstánsia sira luta nian la husik halo debate naruk no klean kona-ba oinsá ita hala’o ita-nia luta.  Ita ladún halo reuniaun iha nível nasionál ka rejionál kona-ba polítika oinsá hala’o luta. Desizaun tenke foti lalais no kuadru médiu sira aprende simu orientasaun lideransa nian iha ita-nia luta tomak. Prinsípiu hakruuk ba eskalaun aas liu sai ezijénsia ida ba ita-nia luta, luta izolada ida husi mundu, ne’ebé ita timoroan tenke halo ho ita-nia kbiit rasik.  Iha ambiente luta ida ne’e mak ita ita maán ita-nia mehi ukun-an, liuhsui referendu 1999, ho supervizaun Nasoens Unidas nian. Presu ne’ebé ita “selu” ba ita-nia independénsia aas tebetebes. Nune’e ita tenke hatene oinsá fó onra ba sira ne’ebé sakrifika-an too mate atu ita bele moris  fila fali ho liberdade no demokrasia.

Ha’ u foin ko’alia oituan kona-ba dalan ne’ebé lori ita mai to’o iha ne’e no ohinloron  ita  bele hamriik nu’ udar país ida ne’ebé hametin-an babeibeik ho ita-nia konkista demokrátika.

Señoras no señores

Bainhira ita afirma fila fali, daruak, nu’ udar Povu no Nasaun, liuhusi Restaurasaun Independénsia, iha 20 Maiu 2002, ita halo iha sirkuntánsia oinseluk loos. Ita halo serimónia furak hodi selebra ita-nia Vitória boot ida hamutuk ho dignitáriu internasionál boot barak hanesan matebian Dr Kofi Annan, Sekretáriu Jeral Nasoens Unidas no matebian ne’ebé ita sei la haluha, Dr Sérgio Vieira de Mello, Administrador UNTAET no Reprezentante Espesial Sekretáriu-Jeral Nasoens Unidas  nian ba Timor-Leste. Entidade barak no belun sira husi solidariedade internasional hakarak mai asiste mós.  Selebrasaun internasional  ba vitória ida ne’e , ne’ebé la’ ós ita timoroan nian de ‘it maibé ba sidadaun hotuhotu, hosi rai sira seluk, ne’ebé hadomi pás no liberdade.

Finalmente Estadu Timor-Leste moris fila fali ho buat ne’e bé ita konsege hametin, iha ita-nia Povu nia fuan, liuhusi servisu polítiku pasiente no konsekuente, husi dékada 70:

Iha duni loron ne’e, ita-nia Konsituisaun tama en-vigór, Konstituisaun moderna ida ne’ebé fó poder polítiku ba ita-nia povu liuhusi  deputadu sira ne’ebé partidu polítiku hili  atu reprezenta povu iha Parlamentu Nasional.

Husi vanguarda mesak ida  ita harii fali sistema demokrátiku ida ho partidu oioin liuhusi sufrájiu universál, livre,igual, diretu, sekretu no periódiku. Husi sistema komandu úniku, ita hatuur fali órgaun Estadu ida ne’ebé akomoda deputadu sira husi partidu no koligasaun oioin, ho ideolojia polítika oioin.

Demokrasia konsagra ona iha ita-nia rain ho hanoin no perspetiva oioin, ho ita-nia haree oinseluk no oioin ba vida, ba ema no ba sosiedade.

Nune’e , importante kaer metin buat sira ne’ebé  ita konsegue ona no haree oinsá ita bele no tenke halo hamutuk atu hetan objetivu estratéjiku ne’ebé ita hothotu hakarak.

Hamutuk mak ita hetan independénsia no hamutuk mak ita konkista ita-nia fatin iha Mundu bainhira ita-nia Estadu hetan rekoñesimentu husi komunidade país livre sira-nian, Organizasaun Nasoens Unidas, ne’ebé iha tempu ne’ebá, iha tiha ona, país-membru atus ida sia nulu.

Somos um mosaico variado de etnias, raças, religiões e expressões linguistico-culturais mas já demos exemplos de fraternidade e de tolerância com a nossa convivência pacífica e harmoniosa.

Ita nia ema moris kahur malu ho etnia, rasa, relijiaun no expresaun linguístiku-kultural oioin no ita fó ona ezemplu fraternidade no toleránsia tamba ita hatene moris hamutuk ho dame no laran-haksolok.

Ita simu sosiedade tradisionál ida ne’ebé ladún fó valor ba ita-nia feton sira maibé ohinloron sira hala’ o ona knaar ho susesu iha servisu tékniku-profisionál no produtivu oioin. Feto timoroan kaer knaar importante iha órgauns Estadu nian no iha funsionalismu públiku no sektór privadu. Nune’e ita labele tau ba soren forsa produtiva ne’e. Ita presiza halo buat barak liután ba emansipasaun feto sira-nian. Ha’u-nia laran haksolok tebetebes tamba ha’ u haree  katak Konferensia ida ne’e sei ko’alia kona-ba igualdade jéneru. Ha’ u fiar katak ita hothotu sei halo esforsu liután atu hala’o duni  liberdade no igualdade direitus, tuir  ita-nia Konstituisaun haruka.

Señoras no Señores

Iha ita-nia “ kódigu jenétiku”, iha iha marka demokrasia nian, ne’ebé ita hahú hatama bainhira movimentu nasionalista hahú iha dékada setenta. Povu mak ita-nia baze, ita-nia fonte inspirasaun, ita-nia forsa. Movimentu nasionalista halo ho Povu no husi Povu, ne’ebé  hakarak duni ukun rasik-an. Ho lema “ halo ho ita-nia kbiit rasik”, Povu hamriik

no hala’o Rezist’ensia únika. La’ós elite ida de’it ninia hakarak maibé ho Povu tomak ninia hakarak, mak Rezisténsia hametin-an  tinan ba tinan.

Nune’e, iIta-nia povu prontu hela atu simu poder polítiku bainhira  Estadu fó dalan. Maibé soberania povu nian depende husi faktór barak. Ida mak kiak no mukit ne’ebé sei aas tebetebes iha ita-nia rain.  Enkuantu  kiak no mukit ne’e buras nafatin, enkuantu iha dezigualdade  sosiál, ita-nia sosiedade labele sai demokrátika. Kiak no mukit labele lao hamutuk  ho Demokrasia tamba kiak no mukit la fó dalan ba valor importante sira hanesan dignidade no desénsia umana. Demokrasia ezije ita halo luta hasoru kiak no mukit; ezije luta atu  hamosu desénsia umana, dignidade no respeitu ba Ditreitus Umanus. Ho laran-haksolok mak ha’ u haree katak iha terseira sesaun, konferensista sira sei ko’alia kona-ba kiak no dezigualdade sosiál  ho kontribuisaun husi líder istóriku rua: Dr. Mari Alkatiri no Dr. Ramos Horta.

Señoras  no Señores

Ohinloron ita iha sesu ba meiu komunikasaun lais no efisiente liu ne’ebé fó dalan ba ita iha liu koñesimentu no ita bele hakbesik-an liután ba ema ne’ebé ita labele ko’alia, oin ba oin. Vídeo-konferénsia, telekonferénsia no rede sosiál mosu ohinloron nu’ udar meiu efetivu tebetebes atu troka idéias no koñesimentus, iha momentu ne’ebé de’ it, no nune’e, sidadaun sira bele hasa’e sira-nia kapasidade análize no krítika. Bainhira sosiedade ida ladún iha espíritu krítiku, ladún iha kapasidade atu  haree no hanoin klean, demokrasia labele buras no ambiente ida ne’e loke dalan ba kuda  regjime  autoritáriu sira.

Ikusmai, ha’ u haree katak, ita-nia ema balun, envezde uza teknolojia aas nee hodi aprende babeibeik,  sira uza liután  atu hatún adversáriu polítiku sira-nia dignidade , inklui figura importante sira husi ita-nia prosesu libertasaun nasional no ita-nia Estadu Direitu Demokrátiku. Iha reuniaun sira seluk, ha’u ko’alia ona kona-ba ba uza meius teknolojia aas, teknolojia informasaun husi anónimu no ema sira ne’ebé lahatene katak importante tebetebes hatene respeita dignidade ema seluk  nian. Segunda sessaun

Konferénsia ida ne’e nian sei ko’alia kona-ba asuntu ida ne’e no ha’ u hein katak entidade relevante sira sei hahú hanoin oinsá halakon vísiu aat ida ne’e,  ne’ebé estraga ita-nia relasaun no viola prinsípiu importante liu iha Demokrasia: respeita ema seluk hanesan ita respeita ita-nia an.

Señoras no Señores

Ita presiza haree ohin, hamutuk, sá kompromisus mak ita tenke foti, sá kualidade  mak ita tenke kaer metin iha ita-nia demokrasia. Demokrasia ida ne’e sei nurak hela maibé país sira seluk iha esperiénsia demokrátika naruk liu ita-nian no ita bele hasain lisaun husi ne’ebá no adapta ba ita-nia realidade. Iha prosesu adaptasaun ne’e no harii ita-nia Estadu foun husi abut, ne’ebé hatuir lei no tanen valores demokrátikus, ita presiza lideransa ida ne’ebé iha kapasidade atu hatán ba dezafiu sira ne’e hotu.

Saída mak ita ezije husi lideransa iha país ida ho ita-nia karaterístika rasik? Katak líder sira ne’e hatene inspira, sai modelu ba ita, hatene komporta hanesan ema ne’ebé kaer metin valór demokrátiku aas sira. Líder sira mak edukador ba valor sira no sira mak lalenok  ba valor sira. Valor ida importante ne’ebé líder sira tenke kaer mak hatene rona no respeita opiniaun husi ema seluk.

Apelo, assim, aos líderes dos partidos e coligações, especialmente os que foram eleitos, assim como aos governantes, para que encontremos formas mais efectivas de comunicação com o nosso Povo. Que não visitemos apenas o eleitorado na altura das campanhas e mas que o façamos com maior frequência durante os nossos respetivos mandatos. O nosso povo tem que sentir que o Estado lhes dá oportunidade de participação efetiva no processo político.

Nune’e, ha’u apela  ba líderes partidu no koligasaun sira-nian, liuliu ba sira ne’ebé eleitu husi Povu, no mós ba ukun-nain sira, atu ita hothotu bele hetan dalan efetivu liu atu komunika ho ita-nia Povu. Ita labele vizita eleitoradu de’it bainhira halo kampaña maibé

tenke tuun dalabarak liután, hodi komunika ho Povu.  Ita-nia Povu tenke sente katak Estadu fó dalan ba sira atu partisipa duni iha prosesu polítiku.

Ha’u-nia laran haksolok tamba Prezidente Parlamnetu Nasional fó-hatene ona iha Sesaun Abertura V Lejislatura, katak Parlamentu ida ne’e sei hala’ o demokrasia partisipativa katak sei halo konsulta ba populasaun  kona-ba lejislasaun. Ha’u hakarak  fó- hanoin katak inisiativa hanesan ne’e halo ona  horihuluk. I Governu Konstitusional halo governasaun aberta katak reuniaun alargada  Konsellu Ministrus nian ho populasaun sira, iha distritu kuazi hothotu; durante mandatu Governu oioin iha mós konsulta ho populasaun kona-ba Planu Estratejiku Dezenvolvimentu no Lei kona-ba Rai no Propriedade. Ita labele haluha mós katak Sua Exa Eis-Prezidente Repúblika Sr Taur Matan Ruak vizita suku hothotu atu rona preokupasaun povu nian. Kontaktu diretu sira ne’e hotu, liu interasaun virtuál, halo ita-nia ema sente katak Estadu ne’e pertense ba sira. Demokrasia ne’ebé pratika ho sentimentu pertensa, katak Estadu ne’e ita hothotu nian, sei hametin babeibeik, bainhira Estadu hatene hatán ba preokupasaun sira ne’ebé Povu hato’o ba Estadu.

Hau apela mós ba uklun-nain sira atu sira kumpre sira-nia promesa eleitorál atu Povu labele lakon sira-nia konfiansa iha prosesu eleitorál no líder eleitu sira , atu Povu bele interesa babeibeik iha governasaun país nian no ajuda responsável sira foti desizaun boot sira.

Importante haree klean mós, oinsá Parlamentu Nsional bele dada dalan ba  asaun   Governu nian, halo oinsá de’ it,  atu buka-hetan ben komún ka moris-di ‘ak ba hothotu, no tau ba soren métodu personalista no autoritáriu ka interese polítiku-partidáriu restritu. Tamba Parlamentu Nasional mak órgaun Estadu úniku ne’ebé halo fiskalizasaun, órgaun  labele buka-hetan de’it irregularidades ne’ebé Poder Ezekutivu bele halo,  maibé  tenke garante mós katak transparénsia sei sai prátika ida metin, iha momentu ne’ebé de’it, atu ita bele hasees-an  korrupsaun, vísiu aat seluk ida ne’ebé hasa’e no haklean dezigualdade sosiál.

Peço aos que detêm o poder executivo para que invistam mais na educação e na saúde. Só com uma população saudável e com uma educação que eleve a  sua consciência perante a sua familia, perante a sua comunidade e o mundo, é que podemos garantir o sucesso da Democracia no nosso país.

Ha’u husu ba maluk sira iha Governu atu investe liuliu iha edukasaun no saúde. Ho populasaun saudável ida, ho edukasaun ida ne’ebé hasa’e sidadaun sira-nia konxiénsia ba família sira,  komunidade no mundu, mak ita bele garante Demokrasia hetan susesu iha ita-nia rain.

Señoras no señores

Demokrasia ne’ebé de’it la hotu ho atu eleitorál sira. Ho atu sira ne’e, Povu hili sira-nia Reprezentantes no, liuhusi votu, Povu fó ba partidu ka koligasaun kbiit  atu hetan maioria iha Uma-Fatin Reprezentante sira-nian. Ita ne’e atu demokrátiku ida ne’ebé sei  hatutan babeibeik iha haksesuk maluk kona-ba asuntu interese nasionál. País ida-idak mak  define ninia interese  nasional rasik.

Deputadus sira hetan sira-nia kbiit,  liu husi prosesu demokrátiku no, bainhira sira eleitu, sira sai reprezentantes Povu tomak nian. Nune’e, molok foti desizaun, deputadu sira tenke halo uluki debate  ida ne’ebé nakloke no krítiku. Se la iha debate hanesan ne’e, demokrasia labele moris.

Iha demokrasia,  deputadu sira sai eleitu tamba partidu ka koligasaun mak hili sira. Ida ne;e kestaun delikada ida: deputadu  hili hakruuk ba partidu ka ba ninia konxiénsia? Demokrasia hothotu iha probelam ida ne’e. Konxiénsia aas no dedikasaun de’it mak bele lori deputadu sira atu hasees-an husi manipulasaun votu husi ema seluk no nune’e, bele hala’o tuir  de’it ninia konxiénsia no sentidu dever nu’ udar Reprezentante Povu nian katak, nu’udar Deputadu.

Señoras no señores

Ha’u ko’alia liuliu kona-ba esperiénsia Timoroan sira-nian. Maibé, Demokrasia, iha mundu tomak, sei hasoru hela dezafius oioin. Nune’e, ita sei rona mós ilustres konvidadus ne’ebé sei tatoli mai ita sira-nia esperiénsia no nune’e sira sei hariku liután  ita-nia dinámika demokrátika.

Susesus no obrigadu barak.