CCI-TL KONVIDA PREZIDENTE-da-REPÚBLIKA ATU LOKE KONGRESU

by Mídia PR Posted on

Palásiu Prezidente Nicolau Lobato, Bairo Pite, loron-9 fulan-Outubru, Prezidente Cámara Comérsio Indústria Timor-Leste (CCI-TL) Oscar Lima ho ekipa, hasoru malu ho Prezidente-da-Repúblika Francisco Guterres Lú Olo hodi konvida ba abertura Kongresu CCI-TL.

Kongresu CCI-TL sei hala’o iha loron 11-12 fulan-outobru ho objetivu atu hametin liután setór privadu liuhusi programa ne’ebé sei defini no eleje nia lideransa. Bazeia ba situasaun setór privadu ne’ebé seidauk forte, Prezidente Komisaun Organizadora ba Kongresu CCI-TL, Hergui Luina Fernandes Alves informa katak hili tema ba Kongresu CCI-TL Reforçar o Setór Privado Mais Creativo, Produtivo e Sustentavél. Liuhusi Kongresu CCI-TL nia membru sira sei tau hanoin hamutuk hodi haforsa ekonomia nasaun.

Prezidente-da-Repúblika haksolok ho tema sentrál Kongresu CCI-TL tanba relevante ho situasaun ekonomia ohin loron nian. Tanba ne’e, Prezidente-da-Repúblika husu CCI-TL atu bele enfrenta dezafiu sira hodi bele hadi’a di’ak liután iha futuru.

Prezidente-da-Repúblika mós husu ba CCI-TL hanesan setór privadu, kria oportunidade hodi hadi’ak ekonomia iha rai-laran no presiza iha lejislasaun hodi hametin serbisu setór privadu iha Timor-Leste.

Mídia PR