PREZIDENTE-da-REPÚBLIKA PREOKUPA EMA DESAKREDITA LIDER NASIONÁL

by Mídia PR Posted on

Palásiu Prezidensiál Nicolau Lobato, loron-10 fulan-Outubru, Xefe Estadu Maior Generál Forsas Armadas, Maijór Jenerál Lere Anan Timur hala’o reuniaun ho Prezidente-da-Repúblika Francisco Guterres Lú Olo nu’udar Komandante Supremu Forsas Armadas hodi informa situasaun rai-laran no Forsas Armadas nian.

Maijór Jenerál informa katak situasaun seguransa no defeza la’o ho di’ak iha teritóriu tomak maske iha difikuldades orsamentu no kombustivél maibé serbisu Forsas Armadas kontinua la’o nafatin.

Iha okaziaun ne’e, Prezidente-da-Repúblika hato’o nia preokupasaun kona-ba publikasaun karikatura no edisaun fotografia iha mídia-sosiál, facebook, ho forma ida la apropriadu, kona-ba figuras importantes nasaun no rezisténsia nian hanesan Prezidente-da-Repúblika, Francisco Guterres Lú Olo, Primeiru Ministru Taur Matan Ruak, eis Prezidente-da-Repúblika na’in-rua Xanana Gusmão no José Ramos Horta nomós eis Primeiru Mari Alkatiri.

Lere Anan Timur hateten katak situasaun ida ne’e akontese tamba kestaun morál no kestaun polítika. Tanba ne’e Parlamentu Nasionál presiza konsidera asuntu ne’e.

Antes ne’e, Prezidente-da-Repúblika iha nia diskursu ba nasaun, iha Parlamentu Nasionál, loron-17 fulan-Setembru tinan-2018 husu ba orgaun soberanu ne’e atu halo lejislasaun ida hodi kriminaliza atitude sira ne’ebé desfama no viola ema nia direitu iha media sosiál.

Mídia PR