XANANA GUSMÃO HASORU MALU HO PREZIDENTE-DA-REPÚBLIKA

by Mídia PR Posted on

KOMUNIKADU IMPRENSA

XANANA GUSMÃO HASORU MALU HO PREZIDENTE-DA-REPÚBLIKA

Palásiu Prezidensiál Nicolau Lobato, loron-11 fulan-Outobru tinan-2018

Xefe Negosiadór Prinsipál ba Asuntu Fronteira Marítima Kay-Rala Xanana Gusmão hasoru malu ho Prezidente-da-Repúblika Francisco Guterres Lú Olo ne’ebé taka ba públiku, hodi informa prosesu sosa asoens ConocoPhillips.

Prezidente-da-Repúblika informa asuntu nee ba jornalista sira hafoin serimónia abertura ba kongresu datolu Camara Comercio Industria Timor -Leste (CCI-TL) iha otél Novo Turismo.

Xefe-de-Estadu informa katak Xefe Negosiadór Prinsipál Xanana Gusmão informa prosesu negosiasaun ninian. Prezidente-da-Repúblika simu informasaun sira ne’e no husu atu Xefe Negosiadór Prinsipál atu aprezenta relatóriu kompletu kona-ba prosesu tomak negosiasaun ninian atu bele diskute no hatene klean liután. Xefe Negosiadór Prinsipál sei hasoru malu fila fali ho Prezidente-da-Repúblika hodi aprezenta relatóriu kompletu prosesu negosiasaun Fronteira Marítima no sosa asoens husi ConocoPhillips.

Durante ne’e Xanana Gusmão nu’udar Prezidente Aliansa Mudansa ba Progresu (AMP) halo krítika makaas hasoru Prezidente-da-Repúblika nia desizaun atu tetu fila fali membru Governu molok fó tomada-de-posse, Xefe-de-Estadu hatan ba jornalista sira:

“Enkontru la’o ho ambiente normál, maski nia (Xanana Gusmão) halo krítika, maibé nu’udar Xefe Estadu, ha’u la ko’alia kona-ba ne’e, iha kestaun ida ne’ebé boot liu mak nasaun no povu nia moris…..Timor-Leste ita hotu ninian, asuntu interese nasionál, interese ita-nia nasaun nian. Ita hotu tenke fó hanoin ba malu. Labele ema ida de’it. Señor Xanana rasik mak husu atu halo enkontru ho ha’u. Klaru katak nia (Xanana Gusmão) hanoin, ida ne’e la’ós interese ema ida nian, grupu ka partidu ida nian. Tanba ne’e ami ko’alia kona-ba interese nasionál maibé la klean. Presiza atu fila fali hodi fó informasoens, relatóriu ofisiál sira atu bele estuda klean liután. Xanana Gusmão hatan atu halo ida ne’e.”

Rohan