lansamentu Manual Treinamentu ba Servidór Públiku no Website CEPAD

by Mídia PR Posted on

 Korrupsaun ne’e moras aat ida. Bele oho Povu ida no Nasaun ida.

Mai ita hamutuk halakon korrupsaun, hametin pás no demokrasia, hala’o dezenvolvimentu no lori moris-diák ba ita-nia Povu.

Liafuan badak hosi Sua Exelénsia Prezidente Repúblika,

Dr. Francisco Guterres Lú Olo

iha okaziaun lansamentu Manual Treinamentu ba Servidór Públiku no Website CEPAD

 

Señor Diretor CEPAD, Dr. João Boavida

Señores Diretores no funsionárius hosi liñas ministeriais

Señores Membrus no parseirus CEPAD nian,

Señores parseirus internasionais CEPAD nian

Ilustres konvidadus,

Señoras no Señores,

Uluknanain ha’u hakarak agradese Diretor CEPAD tanba konvida ha’u, nu’udar Prezidente Repúblika, atu lansa ba públiku Manuál Treinamentu Anti-korrupsaun ba servidór públiku no mós Website CEPAD nian.

 Inisiativa ida ne’e di‘ak tebtebes tanba manuál ida ne’e sai matadalan  ba servidor públiku atu oinsá serve sidadaun sira ho di’ak bainhira husu informasaun kona-ba Servisus Estadu nian.

 Manuál  kona-ba Sidadaun sira-nia direitu atu hetan informasaun, lansa tiha ona. Nune’e, manuál rua ne’e hatudu dalan ba soren-soren: katak sidadaun ida-idak iha direitu atu husu no atu hetan informasaun no servidór públiku sira iha dever no responsabilidade atu hatán ho di’ak.

Sidadaun aprende hosi manuál sira ne’e katak Estadu iha devér atu harii sistema efisiente ba servisus públikus no hatuur servidór públiku ne’ebé hatene oinsá serve públiku ho laran kamán no efisiénsia. Sidadaun ida-idak presiza hatene loloos ninia direitu no oinsá nia bele hetan asesu ba servisus públikus ne’ebé Estadu Timor-Leste oferese ohinloron no ba oin.

Liuhosi hatene loloos ida-idak ninia direitu, dever no responsabilidade, mak ita bele hametin relasaun di’ak entre servidór públiku no sidadaun ida-idak no,  nune’e,  Estadu Timor-Leste bele serve povu tomak,  tuir ita-nia Konstituisaun haruka.

Nune’e, ha’u fó parabéns ba CEPAD, Grupu Traballu Nasionál no ajénsia internasionál sira ne’ebé fó liman ba ita timoroan, atu lori ba oin projetu ida ne’ebé hahú iha ita-nia rai doben, iha 2007 no hala’o ona inisiativa barak ho susesu.

Importa fó-hanoin ohin katak CEPAD – Centro de Estudos para a Paz e Desenvolvimento –  harii iha 2007, hosi timoroan sira, hosi grupu kiik ida ne’ebé fó-an tomak atu ajuda Estadu Timor-Leste harii fila fali, habelar liután no hametin babeibeik kondisaun ida ne’ebé importante tebtebes ba dezenvolvimentu no ita-nia moris-di’ak. Kondisaun importante ne’e mak PÁS!

CEPAD mosu, nu’udar resposta organizadu ida, hosi timoroan rasik, hodi hatán ba efeitus krize 2006 nian. Grupu kiik ida, lideradu hosi Dr. João Boavida, hamutuk ho organizasaun internasionál, Interpeace, konsege hala’o ho susesu Programa Peskiza no Diálogu ba Pás.

Naran CEPAD ne’e di’ak tebtebes tanba fó-hanoin beibeik katak dezenvolvimentu bele la’o ba oin de’ it, bainhira ita moris iha pás nia laran.

Importante fó-hanoin mós ohin katak CEPAD hahú servisu ho polítika di’ak tebtebes: tuun uluk ba populasaun ninia hela fatin atu buka hatene ita-nia ema nia hanoin no hakarak rasik. Liuhosi prosesu peskiza no diálogu inkluzivu ida, iha tinan ida nia laran, promotór no partisipante sira fó hanoin-ba-malu no konsege identifika fatór sanulu resin neen, ne’ebé kontribui ba haburas korrupsaun iha ita-nia rai-laran — moras ida ne’ebé buras dadaun no ameasa maka’as ita-nia pás.

Tambasá korrupsaun ameasa pás? Tanba hamosu dezigualdade no injustisa sosiál katak ita-nia ema la hetan oportunidade hanesan no la hetan direitu hanesan, liuliu sira ne’ebé la koñese ka la iha família kaer servisus importantes Estadu nian. Favór selu favór hamosu nepotismu no sira ne’ébé hetan benefísiu tuur nonook de’it.

Mosu elite riku katak ema oituan de’it ne’ebé riku babeibeik enkuantu maioria kiak babeibeik.

Mosu elite riku katak ema oituan de’it ne’ebé riku babeibeik enkuantu maioria kiak babeibeik.

Tamba korrupsaun buras mós iha servisu públiku mak ita haree servidór públiku balun, biar simu vensimentu kiik, hatudu sinál boot katak halo korrupsaun. Sinál balun mak:  kaer kareta luxu ka/no harii uma boot-boot, sai ba rai-liur beibeik, nu’udar turista. Ha’u hanoin la’ós susar atu kaer-hetan servidór públiku sira ne’ébé uza rikusoin Estadu nian hodi hariku-an babeibeik. Naran katak iha vontade polítika hosi líder-sira no ukun-nain no responsável prinsipál sira, atu harii sistema ne’ebé bele buka tuir no kaer-hetan sira ne’ebé uza rikusoin Estadu nian hodi hariku-an. Sistema ne’e presiza hatuur liuhosi dalan legál atu servidór públiku no  sidadaun sira bele hatene kedas saída mak akontese ba sira, bainhira kaer-hetan halo korrupsaun. Importante mós Estadu haree oinsá proteje ema ne’ebé denunsia atu korrupsaun ruma.

Tuir estudu hosi Banku Mundiál 2015-2016, korrupsaun aas tebtebes iha Timor-Leste no, nune’e, hasa’e kustus investimentu. Atu hetan kontratu Governu, investidór ka emprezáriu sira tenke fó envelope ho 15%  enkuantu  rai sira seluk, iha ASEAN,  husu menus 3%. Tuir mós estudu  ne’e,  molok hetan kontratu,  tenke lolo uluk envelope no, entre rai hitu ASEAN nian, Timor-Leste okupa segundu lugar.

Tamba korrupsaun satán pás no dezenvolvimentu, importante haree oinsá ita halakon  ka hamenus korrupsaun. Se ita:

  • la halo buat ida ka
  • taka matan no la denunsia tanba korruptór ne’e família ida ka belun ida ka
  • ita rasik hakarak hetan mós benefísiu ruma,

moras boot ida ne’e sei da’it babeibeik no harahun ita-nia dignidade, nu’udar ema no nu’udar nasaun.

Maluk sira,

Pás la’ós preokupasaun ida ba de’ it Prezidente Repúblika ka ba lideransa polítika maibé tenke sai sosiedade tomak  ninia preokupasaun. Nune’e, sidadaun hothotu no Estadu tomak tenke apoia  CEPAD,  organizasaun ida ne’ebé rejista ona iha Ministériu Justisa, nu’udar asosiasaun ba interese públiku.

Haree ba importánsia CEPAD nian, biar iha servisu barak Estadu nian,  ha’u mai rasik iha ne’e hodi enkoraja no apoia,  nu’ udar Prezidente  Repúblika.  Molok mai iha ne’e, ha’u buka estuda  materiál sira ne’ebé ha’u simu hosi CEPAD. Haree ba materiál sira ne’ebé CEPAD prodúz ona no ba polítika, programa no dedikasaun tomak hosi fundadór no membru sira, iha tinan sanulu resin nia laran, ha‘u hanoin katak tempu to’o ona, atu Estadu Timor-Leste haree oinsá fó apoiu materiál no finanseiru babeibeik, atu garante Sentru ne’e habelar liután ninia kampaña sívika permanente ba públiku tomak.

Ho espíritu katak ita hothotu tenke hakoak no haburas pás, ha’u hanoin katak projetu Uma Pás CEPAD nian tenke kontinua. Iha ona Uma Pás iha munisípiu hitu no autoridade relevante sira presiza haree oinsá apoia  CEPAD atu harii tan Uma Pás neen iha distritu sira seluk .

CEPAD, nu’udar parseiru ativu no konxiente Estadu nian, merese apoiu ita hothotu nian. Hosi sidadaun ida-idak, hosi grupu ida-idak, hosi entidade ida-idak no órgaun Estado ida-idak!

Ha’u aproveita apela ba partidu polítiku sira, organizasaun sosiedade sivíl no konfisaun relijioza atu ajuda hala’o kampaña hasoru korrupsaun.

Maluk sira,

Ita hothotu hatene katak to’o ohinloron, ita seidauk iha Lei Anti-Korrupsaun. Iha tentativa barak ona atu Parlamentu Nasional diskute iha Plenáriu maibé ida ne’e seidauk akontese.

Iha fulan Jullu liubá, bankada rua PD-FRETILIN, aprezenta  projetu –Lei Anti-Korrupsaun no Prezidente Parlamentu baixa ona ba Komisaun A maibé seidauk halo apresiasaun to’o ohinloron.

Importante povu tomak hatene katak  iha ona projetu Lei Anti-Korrupsaun no Parlamentu nasionál iha obrigasaun atu aprova lalais no submete ba Prezidente Repúblika atu promulga no ikus mai  publika iha Jornal Repúblika atu hahú implementa.

Maluk sira

Molok ramata, ha’u hakarak fó hanoin katak VIII Governu  mós hakarak hala’o boa governasaun no kombate korrupsaun. Programa  VIII Governu,  ne’ebé’simu votu konfiansa hosi Parlamentu Nasionál, iha fulan Jullu 2018 hatete momós iha ne’ebá,  katak Governu lideradu hosi  Sr. Jenerál Taur Matan Ruak  sei hala’o knaar oioin atu kombate korrupsaun liuhosi boa governasaun. Ha’u  hein katak Parlamentu Nasional, nu’u udar órgaun Estadu fiskalizadór, sei tau matan beibeik no sukat didiak oinsá Governu kombate korrupsaun  no hala’o governasaun di‘ak.

 Korrupsaun ne’e moras aat ida. Bele oho Povu ida no Nasaun ida.

Mai ita hamutuk halakon korrupsaun, hametin pás no demokrasia, hala’o dezenvolvimentu no lori moris-diák ba ita-nia Povu.

Obrigadu.