PRIMEIRU VISE MINISTRU RELASAUN EXTERIORES CUBA HASORU PR

by Mídia PR Posted on

Palásiu Prezidente Nicolau Lobato Bairo Pite, loron-12 fulan-Outubru, Primeiru Vise Ministru Relasaun Exteriores Cuba, Marcelino Medina, halo audénsia ho Prezidente-da-Repúblika Francisco Guterres Lú Olo hodi ko’alia kona-ba relasaun bilaterál entre Timor-Leste no Nasaun Cuba.

Hafoin remata reuniuan, Primeiru Vise Ministru Relasaun Exteriores Cuba, hato’o katak nia senti honra boot bele hasoru malu ho Prezidente-da-Repúblika hodi ko’alia kona-ba relasaun bilaterál entre Cuba no Timor-Leste no oinsá atu hametin liu-tan kooperasaun ba futuru.
Marcelino Medina hateten katak sei hametin relasaun polítika altu nivel iha kontestu entre ofisiais importante husi nasaun rua tanba ne’e mak vizita mai Timor-Leste agora hodi identifika oinsá kontinua serbisu ne’e.

Vise Primeiru Ministru Cuba ne’e hato’o nia agradesimentu ba Prezidente-da-Repúblika, tanba Governu no povu Timor-Leste hatudu ona ninian ospitalidade ba Nasaun Cuba. Relasaun entre Cuba no Timor-Leste harii husi fiar no valór sai metin liu ne’ebé la’o tiha ona durante tinan barak nia laran, Tanba ne’e, nia optimista katak relasaun entre Timor-Leste ho Cuba sei hala’o iha ambiente di’ak liu no sei kontinua metin ba beibeik.

Mídia PR