DISKURSU PREZIDENTE REPÚBLIKA PROKLAMASAUN INDEPENDÉNSIA TIMOR-LESTE BA DALA-43

by Mídia PR Posted on

“Ita bele dehan katak ita proklama Primeira Repúblika, iha 28 Novembru 1975, ho lejitimidade istórika. Primeira Repúblika, Primeiru Prezidente, Primeiru-Ministru no Primeiru Governu hetan fiar no domin Povu doben nian, liuhusi FRETILIN, movimentu ne’ebé fanun no hamanas Povu nia laran, atu simu dalan UKUN-RASIK-AN.

Segunda Repúblika restaura mós ho lejitimidade istórika ne’e, iha 20 Maiu 2002, maibé Povu hetan mós oportunidade atu ezerse ninia poder polítiku liuhusi prosesu demokrátiku ida ne’ebé livre no justu, tuir regras ne’ebé mundu modernu rekoñese.

Segunda Repúblika harii ho rejime multipartidáriu, ho kultura simu malu ne’ebé ita hatasak durante períodu Rezisténsia. Prinsípiu hakoak ema hotu atu bele hetan UKUN RASIK-AN hahú ho FRETILIN, nu’ udar FRENTE. Prinsípiu ida ne’e fo dalan mós ba estrutura sira seluk hanesan CRRN/ Conselho Revolucionário da Resistência Timorense, CNRM / Conselho Nacional da Resistência Maubere no CNRT/Conselho Nacional da Resistência Timorense. Iha estrutura hothotu Rezistência nian, prinsípiu hakoak malu ne’e habelar babeibeik espíritu ekipa no sentidu koletivu.

Luta hothotu nesesita lideransa ida maibé, atu hetan vitória, tenke iha partisipasaun Povu nian.”

 

=============
DISKURSU HUSI SUA EXELÉNSIA PREZIDENTE REPÚBLIKA
FRANCISCO GUTERRES LÚ OLO
IHA SELEBRASAUN ANIVERSÁRIU BA DALA-43
PROKLAMASAUN INDEPENDÉNSIA TIMOR-LESTE

Palásiu Governu, 28 novembru 2018

Ohin ita halibur iha fatin istóriku ida ne’ebé iha signifikadu espesiál tebetebes ba ita hothotu. Centro Nacional CHEGA hatama ona Palásiu Governu, iha mapeamentu istóriku Dili nian. Livru ida ne’e hatudu fatin-istóriku hothotu ne’ebé iha relasaun ho ita-nia istória libertasaun nasional.

Ho onra no orgullu mak ha’u, nu’ udar Prezidente Repúblika, asina, iha 20 Maiu 2018, plaka komemorativa ne’ebé Centro Nacional CHEGA hari’i iha ne’e, atu fó hanoin beibeik momentu istóriku ida ne’ebé ita hahú foti ulun, nu’udar Estadu Timor-Leste, tinan hat nulu resin tolu liubá.

Fatin istóriku ida ne’e hanaran ona Praça da Proclamação da Independência. Iha didi-lolon Palásiu Governu nian, ita bele haree retratu oin-oin kona-ba loron proklamasaun independénsia.

Ida ne’e inisiativa ida organiza hosi Centro Nacional CHEGA atu fó-hatene istória kona-ba loron boot 28 Novembru. Ha’u hein katak ita-nia eskola sira, organizasoens naun-governamentais no grupus komunitárius sei halo vizita no estuda istória 28 Novembru nian.

Povu doben Timor-Leste,

Permite ha’u fó-hanoin faktus balun, atu maluk sira kompreende tanbasá Comité Central FRETILIN halo proklamasaun unilateral independénsia:

– Tanba akontese funu entre ita-nia forsa polítika rua, Governadór portugés, Señor General Lemos Pires, husik hela Dili bá Ataúro ho ninia ekipa-de-trabalho tomak no la fila mai Timor-Leste;

– Comité Central FRETILIN haruka telegrama beibeik ba Governu Portugués, iha Lisboa, atu fila mai kolónia Timor, hodi hakotu prosesu kore Timor-Leste husi kolonialismu portugés.

– Tanba la iha autoridade-ukun, FRETILIN, nu’udar forsa polítika únika, iha kolónia Timor, iha tempu ne’ebá, foti desizaun ukun “de-faktu” enkuantu hein Portugal fila.

– Comité Central FRETILIN hatene katak Karta Nasoens Unidas determina regra tuir mai: La iha país ida bele tama no okupa rai ida seluk ho forsa militar.

– Entretantu, tropa indonézia tama-sai ita-nia fronteira ho apoiu husi MAC – Movimentu Anti-Komunista. Situasaun manas babeibeik.

– Iha Outubru 75, Comité Central FRETILIN simu informasaun katak militar indonésiu tama iha Atabae. Balibó monu iha militar indonéziu nia liman, iha 16 Outubru 1975 no, jornalista estranjeiru na’in lima hetan tiru no mate. Tropa indonézia tama iha Batugadé, iha 26 Novembru 1975.

– Timor-Leste tama ona iha dalan klot ida. Invazaun bele akontese iha tempu badak.

– Haree ba Karta Nasoens Unidas no tanba iha ona apoiu garantidu husi nasaun belun balun, Comité Central FRETILIN barani foti desizaun halo proklamasaun unilaterál independénsia.

– Proklamasaun ne’e atu akontese loloos iha 1 Dezembru maibé Comité Central FRETILIN deside adianta tiha ba 28 Novembru 1975, hafoin Batugadé monu ba kontrole okupante nian.
– Haree ba importánsia atu halo kampaña hodi hetan rekoñesimentu internasional ba ita-nia independénsia , Comité Central FRETILIN deside haruka-sai membru na’in tolu ba rai-li’ur:
– Sr. Mari Alkatiri, Ministru de Estadu ba Assuntus Politkus no Minustru Plenipotensiáriu ;

– Sr. Ramos Horta, Ministru Relasoens Exteriores no Informsasaun;

– Sr. Rogério Lobato, Ministru Defeza.
Líder polítiku timoroan sira seluk husi FRETILIN no UDT, komunidade timoroan no grupus solidariedade, iha rai-li’ur, fó mós sira-nia kontribuisaun ba sira-na’in tolu ninia misaun diplomátika.

Povu doben Timor-Leste

Iha fatin ida ne’e mak ita-nia ilustre saudozu kompatriota Francisco Xavier do Amaral halo proklamasaun unilaterál independénsia Timor-Leste nian no jura serve Povu no Nasaun, nu’udar Prezidente Repúblika.
Povu doben Timor-Leste
Espíritu simu malu, ne’ebé baibain halo parte tradisaun povu Timor-Leste nian, hahú mosu mós iha vida polítika, iha kedas 1975. Tanba UKUN RASIK-AN sai ona objetivu ida de’it, forsa polítika boot rua iha Timor-Leste, FRETILIN no UDT deside asina koligasun, iha 20 Janeiru 1975.

Akordu polítiku dahuluk ne’e hatudu vontade polítika atu servisu hamutuk, nu’udar parte ida de’it, iha prosesu negosiasaun ho Governu Português, atu hakotu prosesu kore Timor-Leste husi kolonialismu português.

 

Durante fulan haat, biar ho hanoin polítiku no programa oinseluk, forsa polítika rua ne’e buka respeita malu. Ambiente ida ne’e di’ak tebetebes tanba loke dadaun neon no dalan ba demokrasia, iha Timor-Leste independente.

Maibé ho razaun ne’ebé lapresiza temi ohin, koligasaun ne’e nakfera iha Maiu 1975.

Biar nakfera, ha’u fiar katak espíritu simu malu la mate entre timoroan sira.

Unidade hari’i bazeia ba objetivu estratéjiku ida ne’ebé ita hothotu hakarak.

Dezembru 1975 loke faze foun ida ba ita-nia espíritu simu malu ho konxiénsia nasionalista. Husi loron ne’e, ha’u fiar katak nasionalista ka grupu ne’ebé la identifika-an ho FRETILIN, hahú hala’o mós knaar ruma, husi dalan seluk, hodi ajuda FRETILIN habelar neon UKUN RASIK-AN.

Ha’u hakarak hahii espesialmente papél importante Igreja Católica nian nu’udar instituisaun ida ne’ebé sempre hamriik iha Povu Timor-Leste ninia sorin. Naran rua ne’ebé ha’u hakarak temi iha loron independénsia mak Dom Martinho da Costa Lopes no Dom Carlos Filipe Ximenes Belo.

Hafoin Bazes-de-Apoiu rahun no maioria Comité Central FRETILIN mate, Rezisténsia re-organiza fila fali ho membru tolu hosi CCF, iha 1981, ho lideransa husi ita-nia kompatriota Xanana Gusmão.

Unidade Nasional institusionaliza liuhusi formatu oioin tuirmai:

– 1981: CRRN/Conselho Revolucionário da Resistência Nacional;

– 1986: Convergência Nacionalista asina iha Portugal entre FRETILIN no UDT

– 1987: FALINTIL laos ona FRETILIN nia liman kroat hodi sai formalmente Povu nia liman kroat. Xanana Gusmão husik lideransa FRETILIN hodi asumi knaar, nu’udar líder máximu Rezisténsia Nasional.

– 1988:Conselho Nacional da Resistência Maubere.

– 1995: Comissão Coordenadora da Frente Diplomática da Resistência Timorense

– 1998: Conselho Nacional da Resistência Timorense, órgaun ikus liu ne’e bé Rezisténsia tomak simu nu’udar órgaun reprezentativu ba komponente polítiku-partidária no nasionalista hothotu.

Ho Conselho Nacional da Resistência Timorense, ita tama iha períodu tranzitóriu ho Nasoens Unidas no hakaat ba Referendu 1999.

Liuhusi Referendu, “ema ida, votu ida”, ita konsege hetan UKUN RASIK-AN no restaura ita-nia independénsia iha 20 Maiu 2002.

Povu doben Timor-Leste

Iha movimentu simu-malu ho konxiénsia nasionalista ne’e, ita hala’o FRENTE TOLU: Frente Armada, Frente Klandestina no Frente Diplomátika/Frente Externa. Ida-idak ho ninia knaar maibé sustenta malu, fó forsa ba malu no hothotu tuir estratéjia ida de’it: liberta ita-nia rain husi okupasaun estranjeira.
Liuhusi evolusaun luta iha rai-laran, ita hare’e inisiativa oioin atu halibur nasionalista hothotu no ita konsege institusionaliza UNIDADE NASIONAL tanba iha vontade husi parte hotu-hotu, atu servisu hamutuk, hodi hetan objetivu ida de ‘it: UKUN RASIK-AN.

Povu doben Timor-Leste

Ita bele dehan katak ita proklama Primeira Repúblika, iha 28 Novembru 1975, ho lejitimidade istórika. Primeira Repúblika, Primeiru Prezidente, Primeiru-Ministru noPrimeiru Governu hetan fiar no domin Povu doben nian, liuhusi FRETILIN, movimentu ne’ebé fanun no hamanas Povu nia laran, atu simu dalan UKUN-RASIK-AN.

Segunda Repúblika restaura mós ho lejitimidade istórika ne’e, iha 20 Maiu 2002, maibé Povu hetan mós oportunidade atu ezerse ninia poder polítiku liuhusi prosesu demokrátiku ida ne’ebé livre no justu, tuir regras ne’ebé mundu modernu rekoñese.

Segunda Repúblika harii ho rejime multipartidáriu, ho kultura simu malu ne’ebé ita hatasak durante períodu Rezisténsia. Prinsípiu hakoak ema hotu atu bele hetan UKUN RASIK-AN hahú ho FRETILIN, nu’ udar FRENTE. Prinsípiu ida ne’e fo dalan mós ba estrutura sira seluk hanesan CRRN/ Conselho Revolucionário da Resistência Timorense, CNRM / Conselho Nacional da Resistência Maubere no CNRT/Conselho Nacional da Resistência Timorense. Iha estrutura hothotu Rezistência nian, prinsípiu hakoak malu ne’e habelar babeibeik espíritu ekipa no sentidu koletivu.

Luta hothotu nesesita lideransa ida maibé, atu hetan vitória, tenke iha partisipasaun Povu nian.

Povu doben Timor-Leste

Ita iha Konstituisaun moderna ida, ho órgauns Estadu ne’ebé iha ninia kompeténsia rasik maibé, iha relasaun ba malu. Tanba iha interdependénsia, responsável sira tenke halo diálogu, tenke hatene respeita malu ho responsabilidade individuál no sentidu koletivu.
Hanoin ida ne signifika mós katak Estadu- de-Direitu relasiona ho nesesidade Estadu nian atu bazeia nia funsionamentu ba buat ne’ebé define iha lei, katak poder desizaun Estadu nian iha limite tuir lei. Estado-de-Direitu Demokrátiku signifika mós katak poder desizaun tenke konsidera mós valores sosiais solidariedade nian, justisa, intelijénsia, respeitu ba dignidade umana no prinsípius fundamentais ne’ebé hatuur iha ita-nia Konstituisaun.

Iha kontestu Estadu-de- Direitu Demokrátiku, partidu polítiku iha kna’ar importante tebetebes tanba liuhusi partidu polítiku mak sidadaun sira exerse sira-nia sidadania no asegura demokrasia loos no loloos. Partidu polítiku sira mak liga sosiedade ho Estadu. Tanba relevánsia ida ne’e, partidu polítiku sira labele hanoin de’it manán eleisaun maibé tenke kuda mós iha sira-nia hanoin katak ukun ne’e tenke tuir lei no Konstituisaun. Ukun tenke mai ho objetivu ne’ebé klaru, programa ne’ebé integradu no ho estratéjia konsolidada, hodi hetan rezultadu ne’ebé di’ak ba Povu nia moris-di’ak.

Atu hametin demokrasia, ita presiza iha instituisoens ho kualidade.
Instituisoens ho kualidade ezije líderes no membrus responsáveis.
Horiuluk, tanba kondisaun luta mak ezije, ita iha Komandu úniku, ita iha poder sentralizadu, ita iha lideransa máxima.

Ohinloron ita tenke moris ho realidade foun ne’ebé restaurasaun independénsia lori mai ita.

Ohin ita moris ho ambiente pluripartidáriu katak ho partidu oin-oin, ho hanoin ketaketak. Hanoin oinseluk hariku ita ida-idak no ita hothotu no nune’e, ita tenke hatene rona malu atu hadi‘a ita-nia matenek koletivu no serve Povu ho di’ak.

Povu doben Timor-Leste

Lei Fundu Minarai ne’ebé estabelese iha tinan 2005, nu’udar fundu soberanu úniku, garante ita-nia Orsamentu Jeral Estadu, tinan-tinan. Infelizmente, reseitas seluk iha rai-laran, hanesan hosi impostu no taxa, laliu milhaun atus rua, tuir dadus estatístikus 2017. Ida ne’e signifika katak ita-nia ekonomia ka diversifikasaun rai-laran sei hakdasak nafatin!

Tamba ne’e, Estadu presiza kompleta lalais reforma fiskal. Reforma ne’e hahú ona maibé seidauk fó nia funan ka rezultadu tuir ita hotu nia hakarak. Wainhira ita iha sistema finanseiru ida klaru no justu ne’ebé halo luan liután baze no efikásia hodi kobra impostu no taxa, ita sei hasees evazaun fiskal (katak ema la selu impostu ka taxa). Atu hadi’a kestaun hirak ne’e, ita tenke iha Polítika Fiskal ida ne’ebé sólida no efikáz. Ita presiza hadi’a Lei Tributária atu haree oinsá Estadu kobra impostu. Purezemplu, bainhira ko’a saláriu atu selu impostu, sei ko’a tuir saláriu ida-idak nian. Ema sira ne’ebé manán barak liu, tenke selu taxa aas liu.

Ekonomia bele buras babeibeik ho fator rua:

Ida: Kréditu ba ekonomia ba setor privadu hodi substitui dependênsia husi Fundu Minarai;

Rua: Investe lolos iha kapital de desenvolvimento, hodi diversifika ekonomia.

Wainhira halo investimentu, Estadu gasta osan no nune’e tenke haree uluk sá retornu katak sá benefísiu ka osan hira mak sei hetan fila fali.
Nune’e, ita tenke hatene investe ita-nia fundu soberanu ida ne loloos, Ita tenke investe ho kuidadu, rigor no transparênsia.iha projetus ne’ebé bele garante retorno aas. Ita presiza investe iha áreas importantes no básikas ba Povu nia moris-di’ak hanesan saúde, bee- moos no saneamentu, edukasaun ho kualidade aas.

Agrikultura mak ita-nia baze ekonomia. Nune’e Orsamentu Jeral Estadu tenke aloka osan ne’ebé natón ba produsaun agríkola hodi estimula ita-nia ekonomia não-petrolífera, no garante mós seguransa alimentar.

Tenke tau osan mós ba turismu nu’udar fonte reseitas ba ita-nia rain.
Liuhusi investimentu iha agrikultura no turismu, ita halo diversifikasaun ekonómika no bele hamenus dezempregu.

Problema dezempregu afeta maioria populasaun no maioria ne’e mak ita-nia joven sira. Rihun ba rihun sai ba rai-li’ur tanba la hetan servisu iha rai-laran. Estadu iha dever atu diversifika ekonomia hodi kria empregu no hamenus kiak. Ita-nia demokrasia labele buras enkuantu maioria povu moris kiak no mukit.

Povu doben Timor-Leste

Infelizmente, ohin loron eskola barak mak monu dadaun, janela, odamatan no didin lolon naksobu, karteiras no kadeiras sei falta ba labarik sira atu tur, meza ladi’ak ba profesor sira, no sira la’o dook hosi uma ba eskola, bee- moos laiha, sentina intupidu, refeisaun manas ba labarik sira seidauk satisfáz di’ak no eskola balun laiha, biar orsamentu aprova ona hosi nai-deputadu sira.

Infraestruturas iha ita-nia rai-laran seidauk kompletu. Ita iha ona sentral elétrika boot rua (Betano no Hera) maibé populasaun iha sukus no aldeias balun seidauk iha ahi. Barak ne’ebé iha ona ahi, uza de’it ba kalan atu hetan naroman; populasaun seidauk uza ba halo buat seluk hodi hadi’a moris-rasik tanba ita seidauk iha indústria transformadora ida ne’ebé uza ita-nia eletrisidade atu halo buat di’ak no hamosu produtu ita-nian, atu hatama iha merkadu nasionál no internasionál. Biar ita gasta osan milhoens fulan- fulan hodi sosa kombustível, ita la hatene osan hira mak ita kobra hosi konsumidór sira.

Ita-nia estradas hosi kapital Dili ba munisípiu balun di’ak ona, maibé lakleur at. Sira ne’ebé at sei at ba nafatin no provoka dezastres barak ho índise ida ke aas tebtebes iha nível nasional.. Estradas balun halo dadaun ona iha Dili, Baucau, Viqueque no Lospalos. Ita iha ona auto-estrada hosi Suai to’o Zumalai maibé karreta no pasajeirus oituan mak liu hosi ne’ebá! Asesu ba subdistritu balun difísil tanba kondisaun estrada ladi’ak. Servisu ambulânsia la’ ós efisiente. Família sira mak tenke lori ita-nia feton isin-rua ba ospitál ne’ebe at.

Povu doben Timor-Leste,

Estadu Timor-Leste buka valoriza no rekonhese combatente veteranu sira ne’ebe fó sira-nia vida tomak, sakrifika-an no sakrifika sira-nia família, atu ita realiza ita-nia mehi UKUN RASIK-AN.

Iha tinan ida ne’e, Estadu fó kondekorasaun ba combatente sira ne’ebe partisipa iha Luta Libertasaun Nasional liuhusiFrente Armada. Ohin nain sanulu resin haat mak simu Kolár Orden Timor-Leste tamba dedikasaun exclusiva iha Frente Armada, katak sira la sees-an hosi frente ne’e.

Estadu Timor-Leste rekoñese mós, liuhusi Medalla Orden Timor-Leste combatente tolu nulu resin ida, ne’ebe sei moris no saudozu ida, ne’ebé partisipa iha Luta Libertasaun Nasional, liuhusi Frente Armada.
Horikalan Prezidente’Repúblika halo ona omenájen ba Kombatente-sira ne’ebé simu kondekorasaun ohin. Estadu Timor-Leste valoriza sira hotu nia sakrifísiu tomak hodi ohin ita bele selebra ita-nia independénsia.

Maibé, ita labele selebra no hanoin de’it istória pasadu nian. Ita presiza ko’alia no hanoin klean, saída loloos mak Estadu no ita hothotu tenke halo atu valoriza liután ita-nia Kombatente Libertasaun Nasional sira.

Sakrifisiu tomak no raan ne’ebé fakar hodi ita hetan Ukun Rasik- An iha de’it sentidu wainhira sidadaun Timor-Leste hothotu ksolok ona sira-nia moris no sente-an nu’udar ema ne’ebé livre no bele realiza mehi.

Demokrasia la significa de’it maioria! Tenke mai ho konseitu solidariedade, justisa no intelijénsia. Nu’udar Umanu ita hothotu labele hasees-an hosi sentimentu no domin. Domin iha ita-nia hanoin no hahalok halo ita besik liu ba malu no bele transforma ita-nia sosiedade ba sosiedade ida ne’ebé umanu liu.

Wainhira ita hari’i sistema demokrátiku ida, ita labele menospreza poder judisiál. Sidadaun hothotu tenke sente katak sira hetan protesaun hosi poder judisiál no sira tenke fiar instituisaun judisiál sira. Tanba ne’e mak Lei importante tebetebes.

Buat hotu ita bele halo de’it ho edukasaun! Kualifika ohin ita-nia sidadaun sira hodi ita manán abanbainrua. Investe iha edukasaun signifika katak ita gasta ohin hodi hetan retornu aban-bainrua ho sidadaun sira ne’ebé solidáriu, justu no intelijente. Ita sei manán batalla futuru nian wainhira ita investe iha saúde no edukasaun, nu’udar ferramentas humanizasaun nian, liuhusi matenek atu hala’o servisu ho di’ak nu’uda. atu serbí nia ema hanesan!

Molok remata, ha’u fó-hanoin katak ita konsege restaura ita-nia independénsia tanba ita simu apoiu husi komunidade internasionál.
Dezafiu sei barak tebetebes. Estadu ida labele hasoru dezafiu sira ne’e mesamesak. Ita presiza harii aliansa no servisu hamutuk ho Estadu sira seluk.

Ohin, hanesan horiluk, atu hametin ita-nia UKUN RASIK-AN, ita presiza nafatin apoiu husi komunidade internasionál.

Hamutuk, ita haburas ekonomia diversifikada iha ita-nia rain
Hamutuk ita hanenus kiak no mukit.

Viva Timor-Leste. Parabéns ba Povu Asu’uain Timor-Leste.

Obrigadu!