JANTAR KONFRATERNIZASAUN HO KOMBATENTES SOBREVIVENTES LUTA ARMADA KONDEKORADUS HO PREZIDNTE REPÚBLIKA

by Mídia PR Posted on

“Ho onra, orgullu no domin mak ha’u oferese jantar konfraternizasaun ida ne’e, nu’udar biban ida atu hahii, oin ba oin, no hakbesik-an ba ha’u-nia maun-bin-alin sira, ne’ebé fó-an tomak ba Luta Libertasaun Nasional, liuhosi Frente Armada.”

 

Francisco Guterres Lú Olo
Prezidente RDTL
——————————-

DISKURSU HUSI SUA EXELÉNSIA PREZIDNTE REPÚBLIKA IHA JANTAR KONFRATERNIZASAUN HO KOMBATENTES SOBREVIVENTES LUTA ARMADA KONDEKORADUS HO ORDEN TIMOR-LESTE
Palásiu Lahane, 27 Novembru 2018

Ho onra, orgullu no domin mak ha’u oferese jantar konfraternizasaun ida ne’e, nu’udar biban ida atu hahii, oin ba oin, no hakbesik-an ba ha’u-nia maun-bin-alin sira, ne’ebé fó-an tomak ba Luta Libertasaun Nasional, liuhosi Frente Armada.

Tinan ida ne’e, ho forsa lei nian, ha’u fó fiar ba Konsellu Agrasiamentu no Órdens Onorifikas no ekipa Prezidénsia atu tun ba Kombatente ida-idak nia hela-fatin, hodi rekolha dadus no propoin kondekorasaun Orden Timor-Leste, tuir kritériu ne’ebé Lei no Konsellu ne’e define ba kombatentes Luta Libertasaun Nasional.

Hamutuk kombatente haat nulu resin ida no falesidu na’in lima mak sei simu aban rekoñesimentu no valorizasaun ho Órden Timor-Leste.

Husi grupu ida ne’e, maioria partisipa tinan rua nulu resin haat, tuituir malu iha Luta Libertasaun Nasional, liuhusi Frente Armada.

Maun-bin-alin, ha’u-nia kompañeirus-luta
Imi ida-idak simu sakrifísiu ho laran ksolok no domin, atu liberta ita-nia Pátria no Povu, durante luta naruk ida ho terus rohan-laek.

Kondekorasaun ne’e signifika katak Estadu rekoñese imi ida-idak ninia sakrifísiu no mós família nian. Família sira fahe malu no família sira simu sakrifísiu moris fahe malu no moris ho terus oioin.

Imi ida-idak iha esperiénsia murak rasik, atu sura ba ida seluk no ba ami hothotu, ba jerasaun ohinloron, liuliu ba ita-nia joven sira, atu hatutan ba jerasaun abanbairua.
Foin dala ida ne’e mak maluk balu, hosi Rejiaun oioin, se ha’u la sala, foin hetan malu, hafoin ita restaura independénsia, iha 20 Maiu 2002.

Foin dala ida ne’e mak Estadu Timor-Leste konvida mai eventu kondekorasaun ida de’it Kombatentes Libertasaun Nasional husi de’it Frente Armada. La kahur ho kondekorasaun ba Frente Klandestina ka Frente Diplomátika ka ho belun sira hosi solidariedade.

Señoras no Señores ne’ebé halo parte entidade relevante
Bainhira ekipa husi Prezidénsia Repúblika hamutuk ho Konsellu Agrasiamentu no Ordens Onorífikas tun ba ko’alia diretamente ho Kombatente sira ne’ebé aban simu kondekorasaun, membru ekipa no Konsellu haree no rona rasik katak sira barak sei moris hela iha kondisaun mukit tebetebes. Balu sei moris ho kilat musan iha sira-nia isin-lolon. Balu halerik tanba saúde ladi’ak no seidauk simu tratamentu. Balu seluk preokupa ho oan sira-nia edukasaun. Balu fali uma la iha.

Horseik, ohin no aban, entidade relevante sira bele rona rasik husi kombatente ida-idak ninia kondisaun-moris ohinloron.

Ha’u fiar katak ha’u-nia alin Gil da Costa Monteiro, nu’udar Secretário de Estado para os Assuntos dos Combatentes da Libertação Nacional, sei haree oinsá hatán lalais ba ida-idak ninia situasaun.

Señoras no señores
Ilustres konvidadus

Ba tinan ida ne’e, Estadu fó kondekorassaun ba kombatente sira ne’ebé iha Frente Armada. Aban kombatente-sobrevivente na’in sia mak simu Kolár Orden Timor-Leste tanba dedikasaun exkluziva iha Frente Armada, katak sira la sees-an husi Frente ne’e, durante tinan rua nulu resin hat tuituir malu.

Biar la kompleta tinan rua nulu resin haat iha ai-laran, merese simu Kolár Orden Timor-Leste, ita-nia kompatriota kombatente Ma’Huno Bulerek Karathayano, ne’ebé tama kedas ASDT/FRETILIN iha 1974 no sai kuadru superiór iha Frente Armada. Iha Abril 1993, militár indonéziu kaptura maibé Sr. Ma’Huno hala’o nafatin ninia knnar, nu’udar Kombatente Libertasaun Nasionál no kompleta 24 anos luta.

Kombatente falesidu na’in haat, biar la kompleta 24 anos luta, fó-an tomak to‘o mate ho, nune’e, sira merese mós simu Kolár Orden Timor-Leste husi Estadu Timor-Leste tanba sira pertense ba kuadru médiu no altu, iha estrutura funu nian.

Iha serimónia aban, Estadu Timor-Leste sei rekoñese no valoriza mós, liuhusi Medalla Orden Timor-Leste, sobreviventes Luta Armada na’in tolu nulu resin ida, inklui ita-nia feton na’in haat, tanba partisipa tinan rua nulu resin haat tutuir malu. Kombatente falesidu ida mós sei simu Medalha Orden Timor-Leste tanba fó-an to’o mate, nu’udar kuadru iha estrutura militár.

Kondekorasan ba Kombatentes Frente Armada sei kontinua nafatin iha serimónia ofisiál iha tempu oin mai.

Estadu no sidadaun hothotu tenke tau aas Kombatentes Libertasaun Nasional ne’ebé la sees-an husi dever serve Pátria no Povu tinan ba tinan.

Tuir ha’u-nia kompromisu fó-sai iha 20 Maio 2017, ida mak haree oinsá dignifika Kombatentes Libertasaun Nasional. Loos duni katak Estadu Timor-Leste buka rekoñese no valoriza dadaun ita-nia Kombatentes sira-nia sakrifísiu, liuhusi, kondekorasaun, subsídiu no serimónia omenájen ka hakoi falesidu sira iha semitériu eróis nian. Maibé valoriza signifika mós harii kondisaun ba kombatente- sobrevivente sira atu moris ho dignidade, katak hela iha uma ho bee-moos no ahi, hetan tratamentu saúde no oportunidade servisu ka habelar sira-nia kbiit rasik, liuhusi edukasaun, formasaun vokasionál no empreendorismu, no fó kbiit ba sira nia-oan, liuhusi eskola no bolsa-de-estudu!

Kombatente-sobrevivente sira, ne’ebé halo funu durante tinan 24, iha Frente Armada, la’ós barak. Tinan ida ne’e, ita lakon barak tanba hetan moras iha tempu funu no moris ho moras no kiak to’o mate.

Ha’u hatene katak Kombatentes barak moris ho trauma funu nian maibé Estadu Timor-Leste seidauk harii to’o ohinloron kondisaun ba sira-nia tratamentu.

Nune’e, ha’u husu entidade relevante sira atu identifika no tetu lalais kombatente idak-idak ninia situasaun ohinloron, iha aspetu hothotu.

Maun-bin-alin sira, ha’u-nia kompañeirus-luta

Nu’udar imi-nia kompanheiru-luta no nu’udar Prezidente Repúblika, ha‘u sei kontinua halo buat hothotu atu Estadu buka dalan atu hadi’a imi-nia kondisaun-moris no tau matan ba imi-nia oan sira, ne’ebé sei kiik ka seidauk remata eskola.

Aban ita selebra loron proklamasaun independénsia! Ita-nia mehi koletivu sai ona realidade. Ita manan UKUN-AN ne’e ho raan, kosar, kole, hamalaha no hamrook, ho sakrifísiu oioin. Imi maka sasin-moris ba sakrifísiu sira ne’e!

Ha’u haree katak, ohinloron, tanba influénsia oioin, valor-sira no prinsípiu-sira, ne’ebé ita hothotu tanen iha tempu luta, mihiis babeibeik iha ita-nia sosiedade laran. Ukun-an ne’e lakon dadaun signifikadu. Korrupsaun buras rohan la’ek no moras aat ne’e hamosu dadaun dezigualdade no injustisa sosiál. Grupu kiik ida riku babeibeik no maioria kiak babeibeik.

Ita tenke haree oinsá sátan moras aat ne’ebé sobu dadaun ita-nia relasaun ba malu, nu’udar Família Boot moris hamutuk iha rai ida de’it.

Atu valoriza iat-nia ukun-an ne’e, ha’u konta ho imi hothotu ninia kooperasaun, atu kaer-metin valór no prinsípiu-sira ne’ebé ita idak-idak tanen iha tempu Rezisténsia.

Ha‘u hein kooperasaun boot no metin husi imi, ha’u-nia kompañeirus-luta! Ha’u husu imi, nu’udar sobreviventes Luta Libertasaun Nasional atu koopera ho família sira, eskola, konfisaun relijioza, líder polítiku sira, partidu polítiku sira, organizasaun sosiedade no governu Timor-Leste. Ha‘u husu imi atu ajuda Estadu hala’o programa edukasaun sívika, ita territóriu tomak.

Ita presiza hahú lalais programa edukasaun sívika atu eduka ita-nia jerasaun ohinloron atu sai sidadaun responsável abanbairua. Eduka ho espíritu fó-an tomak ba Povu no Pátria. Atu hatene valór família nian, saída mak respeitu, onestidade, integridade morál, justisa no solidariedade sosiál. Eduka atu hatene halo diálogu no atu moris ho hakmatek no domin. Eduka atu joven sira hasees-an husi korrupsaun, moras ida ne’ebé da’it fásil no fera ita-nia fiar ba malu. Eduka atu joven sira aprende fó liman ba malu no lori Timor-Leste ba dezenvolvimentu atu hadi‘a Povu tomak ninia moris-di’ak.

Futuru rai ida ne’e nian depende husi oinsá ita prepara ita-nia joven sira, ohinloron. Nune’e, ha’u hein Kombatente sira, ne’ebé Estadu Timor-Leste rekoñese aban no uluk, atu hili ema na’in rua atu halo parte ekipa ne’ebé sei dezeña no tau matan ba programa edukasaun sívika.

Ha’u husu Konsellu Nasional Kombatentes Libertasaun Nasional atu ajuda dudu programa edukasaun sívika ba oin.

Ikusliu ha’u hakarak fó-hanoin fila fali entidade relevante sira atu: – Implementa lalais programas reinsersaun sosiál ba eis-FALINTIL no eis-FALINTIL-FDTL;

– Harii lalais estrutura ida hodi halibur kuadru superior FALINTIL no FALINTIL-FDTL ne’ebé husik ona ka sei husik vida militar, iha tempu badak.

– Dezenvolve lalais fatin istóriku sira ho envolvimentu eis-FALINTIL no eis-FALINTIL-FDTL atu haburas turismu istóriku hamutuk ho Centro Nacional CHEGA.

Horiuluk Horiwain Asu’uain servidór Timor-Leste nian!
Ita hotu hamutuk lori Povu Timor- Leste ba moris di’ak!.

Obrigado.